បោះឆ្នោតប្រធានាធិបតីបារាំង ៖ រដ្ឋាភិបាល លម្អិតវិធានការសន្តិសុខ
នៅសល់តែមួយសប្តាហ៍ទៀតគត់ ការបោះឆ្នោតប្រធានាធិបតីបារាំងជុំទីមួយនឹងចូលមកដល់។ ប៉ូលិស នគរបាល កងអាវុធហត្ថ ជាង៥ពាន់នាក់បន្ថែមទៀត ត្រូវបានប្រមូលផ្តុំកម្លាំងដើម្បីរក្សាសន្តិសុខការិយាល័យបោះឆ្នោតទាំង៦៧០០០មណ្ឌល។ បេក្ខជនប្រធានាធិបតីនីមួយ ៗ ក៏បានទទួលបទបញ្ជា ពិសេសពីភ្នាក់ងារសន្តិសុខជាតិ។
ចុះផ្សាយនៅថ្ងៃ៖
ទោះមានកងកម្លាំងយោធាល្បាតក្នុងផ្ទៃប្រទេសដើម្បីរក្សាសន្តិសុខហើយក៏ក្តី ក៏ក្រសួងមហាផ្ទៃមិនធ្វេសប្រហែស ! ដើម្បីជាកិច្ចការពារ រដ្ឋាភិបាលបានប្រមូលកម្លាំងនគរបាល កងរក្សាសន្តិសុខប្រមាណជាង៥០០០នាក់បន្ថែមទៀត សម្រាប់ចេញធ្វើអន្តរាគន៍នៅតាមការិយាល័យបោះឆ្នោតដែលមានចំនួនជាង៦ម៉ឺន៧ពាន់កន្លែង ក្នុងករណីចាំបាច់ជាយថាហេតុ ណាមួយ។ នេះបើតាមប្រសាសន៍ រដ្ឋមន្ត្រីក្រសួងមហាផ្ទៃបារាំង។
ការបោះឆ្នោតឆ្នាំនេះ ប្រព្រឹត្តទៅក្នុងបរិបទនៃការគំរាមកំហែងភេរវកម្មផង និងការផ្ទុះសណ្តាប់ធ្នាប់សង្គមផង។ ការគំរាមភេរវកម្មនៅតែមានកំរិតធ្ងន់ធ្ងរខ្លាំង និងជាប់ជានិច្ចនៅឡើយ មិនថាក្នុងកំរិតថ្នាក់អឺរ៉ុប ឬថ្នាក់ជាតិបារាំងផ្ទាល់ទេ។ ភេរវកម្មនៅទីក្រុងឡុងដ៏ កាលពីថ្ងៃទី២២មីនា ភេរវកម្មនៅស្តុកខុមប្រទេសស៊ុយអែរកាលពីថ្ងៃទី ៧ ជាឧទាហរណ៍ជាក់ស្តែង រំលឹកអំពីហានិភ័យភេរវកម្ម ហើយម្យ៉ាងទៀត ប្រទេសបារាំងផ្ទាល់ក៏ទើបស្រាវ ចាប់បណ្តាញភេរវនិយមបាន១៩នាក់ កាលពីខែមីនាកន្លងទៅថ្មីៗនេះដែរ។
បេក្ខជននីមួយៗ ជាពិសេសបេក្ខជនបក្សធំៗ ដែលមានសំឡេងនាំមុខគេ សុទ្ធតែបានទទួលបទបញ្ជាសន្តិសុខពិសេសពីភ្នាក់ងារជាតិ ព្រោះការគំរាមកំហែងមានលក្ខណៈដៅចំបុគ្គលបេក្ខជនប្រធានាធិបតី ឬទីស្នាក់ការបក្សរបស់ពួកគេ។ ការបញ្ជូនទាហានដៃឆើត និងកងកម្លាំងធ្វើអន្តរាគមន៍ពិសេស នៅពេលបេក្ខជនប្រធានាធិបតីធ្វើមិទ្ទិញ ឬយានយន្តចាប់ជាតិផ្ទុះត្រួតពនិត្យកន្លែងធ្វើមិទ្ទិញ មុនបេក្ខជនទៅដល់ ...ទាំងអស់នេះ សុទ្ធសឹងជាវិធានការពិសេសសម្រេចដោយរដ្ឋាភិបាល។
កងកម្លាំងអាជ្ញាធរសន្តិសុខ មានភារៈត្រូវតាមដានការពារសណ្តាប់ធ្នាប់សង្គមខ្លាំង ខ្លាចក្រែងមានការជ្រុលជ្រួលណាមួយរហូតដល់មានការប៉ះទង្គិចគ្នា បណ្តាលមកពីភាពជ្រុលនិយមខ្លាំងសកម្មជនគាំទ្រនយោបាយគ្រប់បក្ស នៅក្រោយលទ្ធផលឆ្នោត ជុំទីមួយ និងមុនការបោះឆ្នោតជុំទីពីរ។ ការបោះឆ្នោតដែលបើតាមការស្ទង់មតិជាច្រើនបង្ហាញថា បេក្ខជននៃបក្សស្តាំជ្រុលនិយម អាចជាប់ឆ្នោតឡើងដល់ជុំទីពីរផង។
ដោយឡែក ការបោះឆ្នោតតាមប្រព័ន្ធអ៊ីនធ័រនែត សម្រាប់ពលរដ្ឋបារាំងដែលរស់នៅបរទេស ត្រូវលុបចោល ព្រោះខ្លាចមាន មានការចូលលុកលុយ បន្លំទិន្ន័យពីពួកចោរព័ត៌មានវិទ្យា ដែលអាចធ្វើឲ្យខូចលទ្ធផលសម្លេងឆ្នោត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ