តើអ្វីទៅជាការតាមដានអេឡិចត្រូនិក ?
ចុះផ្សាយនៅថ្ងៃ៖
ស្តាប់ - ០៤:០៦
នៅថ្ងៃអង្គារទី ២៦កក្កដា ២០១៦ បារាំងបានរងភេរវកម្មអារកសម្លាប់សង្ឃកាតូលិក ដ៏គួរឱ្យតក់ស្លុតមួយទាំងព្រលឹម បង្កឡើងដោយជនជីហាត Adel Kermiche បំរើឱ្យមនោគមវិជ្ជាអង្គការរដ្ឋអ៊ីស្លាម។ ភាពរន្ធត់និងកំហឹងបានផ្ទុះឡើងកាន់តែខ្លាំង នៅពេលឃើញអត្តសញ្ញាណរបស់ភេរវជន ដែលប៉ូលិសស្គាល់យ៉ាងច្បាស់ ព្រោះជាជនជាប់ទោស ស្ថិតក្រោមការតាមដានរបស់ប៉ូលិស និងមានពាក់ឧបករណ៍អេឡិចត្រូនិកជាប់នឹងខ្លួន។ បើមានពាក់ឧបករណ៍តាមដានហើយ ហេតុអ្វីក៏ជនជាប់ទោសរូបនេះនៅតែអាចបង្កភេរវកម្មបានទៀត ? ឧបករណ៍អេឡិចត្រូនិក ឬការតាមដានអេឡិចត្រូនិកជាអ្វី ?
រៅអំពីការតក់ស្លុត នឹងភេរវកម្មអារកសម្លាប់សង្ឃកាតូលិក មានសំណួរជាច្រើនបានចោទឡើង ទាក់ទងនឹងប្រព័ន្ធត្រួតពិនិត្យអ្នកទោសរបស់បារាំង។ ឧបករណ៍អេឡិចត្រូនិក ប្រៀបបាននឹងខ្នោះគ្មានច្រវ៉ាក់ ត្រូវបានគេយកមកប្រើ សម្រាប់ឃ្វាលអ្នកទោស ដែលជាប់ឃុំឃាំងនៅក្នុងគេហដ្ឋាន ឬអ្នកទោសក្នុងពេលរង់ចាំការកាត់ក្តី តែកម្រប្រើបំផុតក្នុងសំណុំរឿងភេរវកម្ម។
បុគ្គលដែលស្ថិតនៅក្រោមការតាមដានអេឡិចត្រូនិក ជាទណ្ឌិត បានអនុវត្តទោស បានមួយរយៈតូច មួយរយៈធំ ឬជិតអស់... នៅពេលសើរើមើលទោសឡើងវិញ ទណ្ឌិតអាចសុំសិទ្ធនៅក្រៅពន្ធនាគារ ដោយពាក់កងអេឡិចត្រូនិកនៅនឹងជើង។ ការទាមទារសើរើទោស ក៏អាចធ្វើឡើងភា្លមបាន ដោយចៅក្រមខាងអនុវត្តទោស ប្រសិនមើលឃើញមានភាពចម្រូងចម្រាសខ្លាំងនៅក្នុងអំឡុងពេលសវនការ។
ចៅក្រមអាចបើកពិនិត្យមើលសំណើរបស់ទណ្ឌិតបាន ដរាបណាទណ្ឌិត បំពេញលក្ខខណ្ឌគ្រប់គ្រាន់ និងធានាអះអាងបានថាអាចចូលចុះក្នុងសង្គម សម្របខ្លួនទៅតាមរបត់សង្គមបាន មានផ្ទះស្នាក់នៅប្រាកដប្រជា មានគ្រួសារជ្រោមជ្រែង និងមានគម្រោងចង់ប្រកបមុខរបររកស៊ីចិញ្ចឹមជីវិត...
ប៉ុន្តែភេរវជន Adel Kermiche ដែលជាប់ឃុំឃាំងបណ្តោះអាសន្ន ពីបទមានពាក់ព័ន្ធនឹងក្រុមភេរវនិយម ត្រូវបានដាក់ឱ្យ ស្ថិតក្រោមការត្រួតពិនិត្យអេឡិចត្រូនិក ក្នុងករណីដោយឡែកមួយផ្សេងទៀត គឺពាក់ឧបករណ៍តាមដាន ជាប់នឹងខ្លួនជាប្រចាំ ក្នុងអំឡុងពេលស៊ើបអង្កេត និងក្នុងពេលរង់ចាំការកាត់ក្តី។
បច្ចុប្បន្ននេះ ប្រទេសបារាំងមាន ជនជាប់ចោទភេរវកម្ម៧នាក់ កំពុងជាប់ទោសឃុំឃាំងក្នុងផ្ទះ ក្រោមការតាមដានអេឡិចត្រូនិក និងទណ្ឌិតភេរវកម្ម៦នាក់ ពាក់ឧបករណ៍អេឡិចត្រូនិកជាប់នឹងខ្លួន។ គិតត្រឹមថ្ងៃទី ១កក្កដា បារាំងមានទណ្ឌិត នៅក្រៅពន្ធនាគារ ចំនួន១០៦៤២នាក់កំពុងស្ថិតក្រោមការត្រួតពិនិត្យអេឡិចត្រូនិក ដែលកំពុងរង់ចាំការសើរើទោស ក្នុងនោះ ៣១៥នាក់ ពាក់កងអេឡិចត្រូនិកដើម្បីអនុវត្តទោសបង្ហើយ។
ឃុំខ្លួនក្រៅគុក ដោយមានការតាមដានអេឡិចត្រូនិក គឺពាក់កងនៅកជើង អាចបាំងជិតក្នុងជើងខោ អាចមុជទឹកប៉ះ និង ដើរហើរដោយសេរី តែខ្សែជើងនេះ មានបណ្តាញភ្ជាប់នឹងប្រអប់មួយនៅផ្ទះ និងពន្ធនាគារ។ ប្រសិនបើទណ្ឌិត និងកង មិននៅក្នុងផ្ទះតាមម៉ោងកំណត់ នោះសំឡេងរោរិ៍នឹងលាន់ឮឡើងដោយស្វ័យប្រវត្តិ អាជ្ញាធរមានសមត្ថកិច្ចនឹងតាមរកទណ្ឌិតភ្លាម ឬអាចបញ្ជូនឱ្យត្រលប់ចូលពន្ធនាគារវិញ។
ប៉ុន្តែនៅក្នុងម៉ោងអនុញ្ញាត ជនជាប់ទោសអាចចេញធ្វើអ្វីក៏បាន គ្មានសញ្ញាអ្វីផ្តល់ឱ្យអ្នកយាមឡើយ។ អាដែល គេមីច្ស បានប្រើពេលម៉ោងមានសេរីភាពនេះយកទៅប្រព្រឹត្តអំពើភេរវកម្មតែម្តង។
ដូច្នេះមានន័យថា ឧបករណ៍អេឡិចត្រូនិកមិនអាចគ្រប់គ្រងពួកអ្នកជ្រុលនិយមបានទេមែនទេ ? ពិតជាមែន ហើយ ! ពាក់ឧបករណ៍តាមដានហើយ នៅអាចសម្លាប់មនុស្សបាន គឺពិតណាស់ថាមានបញ្ហា ! ក្រុមសហភាពសហជីពចៅក្រម បានទទួលស្គាល់បញ្ហានេះ ប៉ុន្តែ នៅតែយល់ថាកងអេឡិចត្រូនិក ជាជម្រើសមួយប្រសើរជាងចាប់ញាត់គុកណែនផ្អែស។
តាំងពីឆ្នាំ២០១២មក បារាំងមានច្បាប់ប្រឆាំងភេរវនិយមច្រើន តែគ្មាននរណាគិតគូរដល់ចំណុចចាប់ឃុំឃាំងបណ្តោះអាសន្នជាចាំបាច់ជនជាប់ចោទភេរវកម្មទេ។ ដរាបណាគ្មានច្បាប់ ការចាប់ឃុំឃាំងដោយបណ្តោះអាសន្ន ដោយមិនឆ្លងកាត់តុលាការ ពិតជានឹងត្រូវរងការរិះគន់ឥតឈប់ជាក់ជាមិនខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ