បាតុកម្មនៅអាល្លឺម៉ង់មុនដំណើរទស្សនកិច្ចរបស់លោកអូបាម៉ា
មនុស្សរាប់ម៉ឺននាក់នាំគ្នាចេញធ្វើបាតុកម្ម នៅក្នុងប្រទេសអាល្លឺម៉ង់ នៅថ្ងៃសៅរ៍ មួយថ្ងៃមុនពេលដែលលោកអូបាម៉ាត្រូវធ្វើដំណើរទៅបំពេញទស្សនកិច្ចនៅទីនោះ។ បាតុកម្មនេះធ្វើឡើង ដើម្បីបង្ហាញពីការប្រឆាំងទៅនឹងគម្រោងចុះកិច្ចព្រមព្រៀងពាណិជ្ជកម្មសេរី ដែលសហភាពអឺរ៉ុបកំពុងតែចរចាជាមួយនឹងសហរដ្ឋអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥០
“យើងមិនមែនធ្វើបាតុកម្មប្រឆាំងនឹងវត្តមានរបស់លោកអូបាម៉ាទេ តែដើម្បីប្រឆាំងនឹងកិច្ចព្រមព្រៀងពាណិជ្ជកម្មសេរីសហភាពអឺរ៉ុប-អាមេរិក” នេះគឺជាការអះអាងរបស់តំណាងអង្គការក្រៅរដ្ឋាភិបាលមួយ ដែលចូលរួមនៅក្នុងចលនាបាតុកម្ម នៅអាល្លឺម៉ង់ កាលពីថ្ងៃសៅរ៍។
គួរបញ្ជាក់ថា ការចរចាលើកិច្ចព្រមព្រៀងពាណិជ្ជកម្មសេរីនេះ កំពុងស្ថិតក្នុងការចរចា រវាងសហរដ្ឋអាមេរិក និងសហភាពអឺរ៉ុបជាប្លុករួមទាំង ២៨ប្រទេសជាសមាជិក ក្នុងនោះ ក៏មានអាល្លឺម៉ង់ផងដែរ។ នៅអាល្លឺម៉ង់នេះហើយ ដែលគេសង្កេតឃើញមានចលនាប្រឆាំងខ្លាំងជាងគេ ទៅនឹងកិច្ចព្រមព្រៀងនេះ។ កាលពីខែតុលាឆ្នាំទៅមិញ ក៏ធ្លាប់មានការធ្វើបាតុកម្មប្រឆាំងនឹងកិច្ចព្រមព្រៀងនេះម្តងរួចមកហើយ នៅក្នុងទីក្រុងប៊ែរឡាំង ដោយពេលនេះ មានមនុស្សចូលរួម ប្រមាណពី ១៥ម៉ឺននាក់ ទៅ ២៥ម៉ឺននាក់។ ការស្ទាបស្ទង់មតិកាលពីពេលថ្មីៗនេះបង្ហាញថា ប្រជាជនអាល្លឺម៉ង់តែ ១៧%ប៉ុណ្ណោះ ដែលគាំទ្រកិច្ចព្រមព្រៀងពាណិជ្ជកម្មសេរី រវាងសហភាពអឺរ៉ុប និងអាមេរិក ពោលគឺមានការធ្លាក់ចុះខ្លាំង បើធៀបនឹងកាលពី២ឆ្នាំមុន ដែលមានប្រមាណជា ៥៥%។
នៅក្នុងបទសម្ភាសន៍ជាមួយកាសែតអាល្លឺម៉ង់ Bild នៅមុនពេលធ្វើដំណើរទៅដល់អាល្លឺម៉ង់ លោកអូបាម៉ាបានព្យាយាមលើកទឡ្ហីករណ៍ជាច្រើន ដើម្បីការពារគម្រោងចុះកិច្ចព្រមព្រៀងពាណិជ្ជកម្មសេរីនេះ ក្នុងនោះ លោកប្រធានាធិបតីអាមេរិកបានធ្វើការសង្កត់ធ្ងន់ថា កិច្ចព្រមព្រៀងនេះគឺជាមធ្យោបាយដ៏ប្រសើជាងគេ ក្នុងការជំរុញកំណើនសេដ្ឋកិច្ច និងបង្កើតការងារដល់ប្រជាជន ទាំងនៅអាមេរិក និងនៅអឺរ៉ុប។
លោកស្រីអង់ហ្គេឡា មែរកិល ក៏បានផ្ញើសារជាវីដេអូមួយដែរ ដោយព្យាយាមរំងាប់ក្តីបារម្ភចលនាប្រឆាំងថា រដ្ឋាភិបាលរបស់លោកស្រីនឹងធ្វើការចរចាយ៉ាងស្វិតស្វាញបំផុត ដោយមិនឲ្យអាល្លឺម៉ង់បាត់បង់ផលប្រយោជន៍ដោយសារតែកិច្ចព្រមព្រៀងនេះទេ។ ផ្ទុយទៅវិញ យោងតាមលោកស្រីប្រមុខរដ្ឋាភិបាលអាល្លឺម៉ង់ កិច្ចព្រមព្រៀងពាណិជ្ជកម្មសេរីនេះ នឹងផ្តល់ផលប្រយោជន៍ទាំងសងខាង គឺទាងខាងសហរដ្ឋអាមេរិក និងសហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ