អឺរ៉ុប និងអាមេរិកផ្តើមកិច្ចចរចាជាថ្មីរវាងគ្នាដើម្បីស្វែងរកកិច្ចព្រមព្រៀងដោះដូរពាណិជ្ជកម្មដោយសេរី
ចាប់ពីថ្ងៃចន្ទ ទី១១ វិច្ឆិការហូតដល់ថ្ងៃសុក្រចុងសប្តាហ៍នេះ សហភាពអឺរ៉ុប និងអាមេរិកផ្តើមកិច្ចចរចាជាថ្មីរវាងគ្នានៅក្នុងទីក្រុងព្រុចសែល ប្រទេសបែលហ្ស៊ិកក្នុងការស្វែងរកកិច្ចព្រមដោះដូរពាណិជ្ជកម្មដោយសេរី។ កិច្ចចរចាជាថ្មីពេលនេះបានធ្វើឡើង បន្ទាប់ពីបានផ្អាកមួយរយៈដោយសារតែវិបត្តិថវិកានៅអាមេរិក និងការផ្ទុះរឿងអាស្រូវចារកិច្ចអាមេរិក។
ចុះផ្សាយនៅថ្ងៃ៖
ស្តាប់ - ០២:១២
តាមការព្រាងទុក ជំនួបជាលើកទី២ថ្ងៃនេះបានគ្រោងធ្វើតំាងពីពាក់កណ្តាលខែតុលាកន្លងទៅមកម្ល៉េះ តែភាគីទំាងពីរបានសម្រេចផ្អាកមួយរយៈដោយសារតែអាមេរិកបានជួបវិបត្តិថវិកាផ្ទៃក្នុង។ បន្ទាប់មកទៀត ក៏ស្រាប់តែមានផ្ទុះឡើងនូវរឿងអាស្រូវចារកិច្ចអាមេរិកពីសំណាក់ទីភ្នាក់ងារសន្តិសុខជាតិអាមេរិកមកលើថ្នាក់ដឹកនំាអឺរ៉ុបមួយចំនួន មានលោកស្រីប្រមុខរដ្ឋាភិបាលអាល្លឺម៉ង់អង់ហ្គេឡាមែរកិលជាឧទាហរណ៍ជាក់ស្តែង។ គឺរឿងអាស្រូវចារកិច្ចអាមេរិកនេះឯងដែលបានបំផុសឲ្យមានភាពតានតឹងយ៉ាងខ្លំាងរវាងអាមេរិក និងអឺរ៉ុប ព្រមទំាងមានការអំពាវនាវឲ្យព្យួរកិច្ចចរចាជាមួយអាមេរិកមួយរយៈទៀតផង។ តែថ្នាក់ដឹកនំាអឺរ៉ុបបានបដិសេធមិនធ្វើតាម។
ចំណែកខាងភាគីអាមេរិកំាងវិញ លោកប្រមុខការទូត John Kerry បានព្យាយាមពន្យល់បកស្រាយកាលពីសប្តាហ៍មុនថា គេមិនគួរភ្ជាប់កិច្ចចរចារវាងអឺរ៉ុប និងអាមេរិកក្នុងការស្វែងរកកិច្ចព្រមព្រៀងដោះដូរពាណិជ្ជកម្មដោយសេរីទៅនឹងរឿងអាស្រូវចារកិច្ចអាមេរិក ឬមួយក៏រឿងអ្វីផ្សេងដែលនំាឲ្យកើតមានឧបសគ្គឡើយ។ សម្រាប់លោក John Kerry រឿងចារកិច្ចអាមេរិកមិនត្រូវក្លាយជាប្រធានបទនៃកិច្ចចរចារវាងអាមេរិក និងអឺរ៉ុបស្តីពីរឿងពាណិជ្ជកម្មទេ។
យ៉ាងណាក៏ដោយ កិច្ចចរចារវាងអាមេរិក និងអឺរ៉ុបក្នុងសប្តាហ៍នេះនឹងត្រូវផ្តោតលើប្រធានបទសំខាន់មួយចំនួន មានផ្នែកសេវា វិនិយោគ និងផ្នែកថាមពល។ ក្រៅពីនោះ នៅមានវិស័យសំខាន់ៗមួយចំនួនទៀតដែលអាមេរិក និងអឺរ៉ុបត្រូវលើកទៅជជែក រួមមានវិស័យយានយន្ត អនាម័យ កសិកម្ម ឬមួយផ្នែកសេវាហិរញ្ញវត្ថុជាដើម។ នៅក្នុងវិស័យទំាងនេះ មានវិស័យខ្លះដែលអឺរ៉ុប និងអាមេរិកពិបាកនឹងឯកភាពគ្នា ពិសេសវិស័យកសិកម្មទាក់ទងនឹងដំណំាដែលបង្កាត់ពូជតាមបែបវិទ្យាសាស្រ្ត។ ដំណំាប្រភេទនេះត្រូវបានអនុញ្ញាតនៅសហរដ្ឋអាមេរិក តែហាមឃាត់នៅក្នុងសហភាពអឺរ៉ុប។
តែទោះជាយ៉ាងនេះក្តី អឺរ៉ុប និងអាមេរិកព្យាយាមលើកយកប្រធានរឿងណាដែលគេអាចនិយាយចុះសម្រុងគ្នាបាន។ គណៈកម្មការអឺរ៉ុបដែលជាអ្នកចរចាជួសមុខឲ្យប្រទេសសមាជិកនីមួយៗសង្ឃឹមថា នឹងអាចយកកិច្ចព្រមព្រៀងដោះដូរដោយសេរីជាមួយប្រទេសកាណាដាចុះហត្ថលេខាកាលពីពាក់កណ្តាលខែតុលា មកធ្វើជាគំរូក្នុងការចរចាជាមួយសហរដ្ឋអាមេរិក។
យ៉ាងណាក៏ដោយ បើកិច្ចចរចាលើកទីពីរនេះនឹងគ្មានលទ្ធផលអ្វីទេ អឺរ៉ុប និងអាមេរិកគ្រោងនឹងជួបគ្នាជាលើកទី៣ នៅពាក់កណ្តាលខែធ្នូខាងមុខក្នុងទីក្រុងវ៉ាស៊ីនតោន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ