រឿងអាស្រូវវ៉ុលវ៉ាហ្គែន ៖ NGO អាចជាភ្នែកច្រមុះពិភពលោកបានត្រឹមណា ?!
ចុះផ្សាយនៅថ្ងៃ៖
ស្តាប់ - ០៤:២១
ក្រុមហ៊ុនតូតាល់នៅភូមា ក្រុមហ៊ុនវ៉ាំងស៊ី នៅកាតា ជាប់រឿងអាស្រូវ... ថ្ងៃនេះដល់វេនក្រុមហ៊ុនផលិតឡានម៉ាហ្ស៊ូត វ៉ុលវ៉ាហ្គែនម្តង ! ចុះថ្ងៃស្អែកជាវេននរណា ? មិនថាជាបញ្ហាសិទ្ធិមនុស្ស ឬបញ្ហាបរិស្ថាន អង្គការក្រៅរដ្ឋាភិបាល ឬហៅដោយខ្លីថា NGO ជាភាសាអង់គ្លេស បានដើរតួកាន់តែសំខាន់ឡើងៗ ក្នុងការព្រមាន ពញ្ញាក់ស្មារតីពិភពលោក និងបើកកកាយឱ្យបានដឹងអំពីសកម្មភាពអនុវត្តខុសឆ្គងរបស់រដ្ឋាភិបាល និងរបស់ក្រុមហ៊ុនអន្តរជាតិធំៗ។ សកម្មភាពរបស់អង្គការក្រៅរដ្ឋាភិបាលគ្នាព្រំដែន តែនៅមានកំរិត។
រឿងអាស្រូវ ដែលកំពុងរញ្ជួយផ្អើលពិភពលោក ក្នុងក្រុមហ៊ុនផលិតរថយន្តអាល្លឺម៉ង់ (ក្រុមហ៊ុនយក្ស មានបុគ្គលិកជាង៥៩០០០០នាក់ មានប្រាក់ចំណូលប្រចាំឆ្នាំជាង២០០ពាន់លានអឺរ៉ូ ឧស្សាហកម្មរថយន្តតំណាងឱ្យ១ភាគ៧នៃទីផ្សារការងាររបស់អាល្លឺម៉ង់) ត្រូវបានទម្លាយឱ្យដឹងតាមរយៈអង្គការInternational Council on Clean Transportation។ ជាអង្គការក្រៅរដ្ឋាភិបាល ដែលមានទីស្នាក់ការនៅសហរដ្ឋអាមេរិក និងមានសហការីអចិន្ត្រៃយ៍តែ២៧នាក់ ប៉ុណ្ណោះទៅទូទាំងពិភពលោក។ នេះបើតាមអ្វីដែលមានបញ្ជាក់ក្នុងគេហទំព័ររបស់អង្គការ។
ជាសម្ព័ន្ធមិត្តការងាររបស់អ្នកស្រាវជ្រាវនៅសាកលវិទ្យាល័យVirginie Occidentale អង្គការនេះបានបង្ហើបឱ្យដឹងអំពីល្បិចរបស់ក្រុមហ៊ុនវ៉ុលវ៉ាហ្គែនដែលបានបំពាក់ម៉ាស៊ីនមានកម្មវិធីទំនើប នៅក្នុងគ្រប់រថយន្តម៉ាហ្ស៊ូត សម្រាប់ផ្តល់ទិន្នន័យបន្លំពេលធ្វើតេស្តផ្លូវការវាស់ការបំពុលបរិយាកាសនៃឡាននីមួយៗ។ ក្រុមហ៊ុនវ៉ុលវ៉ាហ្គែនបានទទួលសារភាពអំពីកំហុសនេះ និងទទួលស្គាល់ថាបើបំពាក់កម្មវិធីទំនើបបែបនេះនៅក្នុងរថយន្តជាង១១លានគ្រឿងនៅលើពិភពលោក មិនមែនត្រឹមជាង៤៨គ្រឿងនៅសហរដ្ឋអាមេរិកទេ។ ការបន្លំនេះបានធ្វើឱ្យក្រុមហ៊ុនខាតបង់ប្រាក់រាប់រយពាន់លាន និងសំខាន់ជាងនេះទៅទៀត គឺកិត្តិយស។ អាល្លឺម៉ង់ទាំងមូលត្រូវបាក់មុខ ! លោកស្រី Angela Merkel ដែលក្នុងនាមជា ប្រមុខរដ្ឋាភិបាលអាល្លឺម៉ង់ បានទាមទារឱ្យក្រុមហ៊ុនធ្វើគ្រប់យ៉ាងដើម្បីតម្លាភាព និងដែលធ្លាប់ធ្វើជាគំរូនាំមុខគេក្នុងដោះស្រាយវិបត្តិផ្សេងដូចជានុយក្លេអ៊ែរ និងបរិស្ថាន នឹងត្រូវធ្វើមុខយ៉ាងណា នៅពេលឡើងទៅអង្គការសហប្រជាជាតិ ដើម្បីជំរុញឱ្យសន្និសីទស្តីពីអាកាសធាតុនៅទីក្រុងប៉ារីសខែក្រោយបានសម្រេចជោគជ័យនោះ ?!
ផលវិបាកសម្រាប់អាល្លឺម៉ង់ជារឿងមួយមិនអាចវាស់វែងបាន ប៉ុន្តែអ្វីដែលច្បាស់ គឺពេលនេះ អង្គការក្រៅរដ្ឋាភិបាល បានក្លាយជាតួឯកមិនអាចខ្វះបានក្នុងបរិហាររឿងអាស្រូវរបស់ក្រុមហ៊ុនធំៗ រកស៊ីឆ្លងទ្វីប។ មានក្រុមហ៊ុនជាច្រើនរួចមក ដែលជាប់ក្នុងសំណាញ់អង្គការក្រៅរដ្ឋាភិបាល។ កាលពីខែសីហា យុទ្ធនាការប្រឆាំងនឹងការរុករករ៉ែនៅអូស្ត្រាលីប៉ះពាល់ដល់ធនធានធម្មជាតិក្រោមសមុទ្ទ បានធ្វើឱ្យធនាគារអន្តរជាតិជាច្រើនលែងផ្តល់ហិរញ្ញវត្ថុ។ ដោយសារអង្គការក្រៅរដ្ឋាភិបាល ក្រុមហ៊ុនសម្លៀកបំពាក់ល្បីៗ ព្រមបង់វិភាគទានដល់ជនរងគ្រោះជាកម្មករកាត់ដេរ បង់ក្លាដែស ក្រោយការរលំអាគាររ៉ាណាផ្លាហ្សា។ ក្រុមហ៊ុនApple ជាប់ចោទថាបិទភ្នែកមិនមើលលក្ខខណ្ឌការងារនៅចិន បានសុខចិត្តចុះត្រួតពិនិត្យមើលក្រុមហ៊ុនដេញថ្លៃតនៅចិន ក្រោមគំនាបអង្គការក្រៅរដ្ឋាភិបាល។ ការអង្កេតរបស់NGO បានធ្វើឱ្យរដ្ឋាបាលពន្ធដារចាប់អារម្មណ៍ពីល្បិចបង្វៀងការបង់ពន្ធរបស់ក្រុមហ៊ុនSterbucks ឬ Google។ល។ និង។ល។
កាលពី១០ឆ្នាំមុន នៅពេលតំណាងអង្គការក្រៅរដ្ឋាភិបាលសុំចូលជួបរដ្ឋាភិបាល គឺដើម្បីសុំជំនួយមនុស្សធម៌ តែថ្ងៃនេះរដ្ឋាភិបាលសុំជួប NGO ព្រោះចង់បានរបាយការណ៍ជំនាញ ឬព្រោះអង្គការមានរឿងរំខានក្នុងដៃ។ តំណាងអង្គការOxfam បានអះអាងថា NGO ពេលនេះមានភាពជំនាញ និងរឹងមាំខ្លាំង។ រឿងអាស្រូវរបស់ក្រុមហ៊ុនផលិតរថយន្តអាល្លឺម៉ង់ វ៉ុលវ៉ាហ្គែននេះ ឆ្លុះឱ្យឃើញកាន់តែច្បាស់អំពីភាពជំនាញរបស់សកម្មជនអង្គការ NGO ដែលមានសកម្មជនសុទ្ធសឹងជាអតីតអ្នកជំនាញជាន់ខ្ពស់ក្នុងវិស័យឧស្សាហកម្មរថយន្ត មានសញ្ញាប័ត្រវិទ្យាសាស្ត្រខ្ពស់។
រឿងអាស្រូវវ៉ុលវ៉ាហ្គែន បញ្ជាក់ពីតួនាទីដ៏សំខាន់របស់ NGO ប៉ុន្តែក៏បានបង្ហាញពីចំណុចខ្វះខាតដែរ។ ខ្វះខាត ព្រោះអង្គការក្រៅរដ្ឋាភិបាលមានមធ្យោបាយទាបណាស់ ! អង្គការចង់ធ្វើការច្រើន ជាភ្នែកច្រមុះពិភពលោក តែធ្វើយ៉ាងដូចម្តេចអាចនៅពីក្រោយគ្រប់ក្រុមហ៊ុន គ្រប់បំណងទៅកើត បើមិនគ្រប់ក្រពះខ្លួនឯងផងពេលខ្លះ ? នេះជាការពន្យល់របស់ប្រធានអង្គការក្រៅរដ្ឋាភិបាលSherparដែលធ្លាប់រំពឹងច្រើនលើក្រុមមេធាវី និងអ្នកច្បាប់ដើម្បីបាននាំក្រុមហ៊ុនជាច្រើនឱ្យទៅប្រឈមមុខតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ