បទអន្តរាគមន៍ លោកប្រមុខការទូតរុស្ស៊ី ក្នុងព្រឹទ្ធសភាជាតិ
គឺក្នុងកម្មវិធី “ ម៉ោងរដ្ឋាភិបាល “ ដែលថ្ងៃពុធ២០ឧសភា លោករដ្ឋមន្ត្រីការបរទេសរុស្ស៊ី ស៊ែរហ្គៃ ឡាវ៉្រូវ បានឡើងថ្លែងពីលើវេទិកាព្រឹទ្ធសភាជាតិ ដែលនៅរុស្ស៊ី មានឈ្មោះជាផ្លូវការថា “ក្រុមប្រឹក្សាសហព័ន្ធ” ដោយគាត់បានលើកឡើង មុខព្រួញសំខាន់ៗ នៃនយោបាយក្រៅប្រទេសរបស់រុស្ស៊ី ទាំងចាប់ផ្តើម ពីស្ថានការណ៍ក្នុងលោកបច្ចុប្បន្នដែល ស្រុតចុះស្មុគស្មាញ ហើយតាមសម្តីគាត់ គឺបណ្តាលជាបឋម មកពីនយោបាយបស្ចិមលោក នាំមុខ ដោយស.រ.អា. បង្ខំរដ្ឋឯទៀតឲ្យដើរតាមបន្ទាត់ខ្លួន។
ចុះផ្សាយនៅថ្ងៃ៖
ស្តាប់ - ០២:១៦
តាមប្រសាសន៍លោកប្រមុខការទូតរុស្ស៊ី ស៊ែរហ្គៃ ឡាវ៉្រូវ ៖ ដើម្បីតាំងសណ្តាប់ធ្នាប់ ក្នុងលោក តាមឆន្ទៈឯកតោភាគី ពួកគេមិនញញើតនឹងបំពានលើច្បាប់អន្តរជាតិ មិនញញើត នឹងប្រកាន់ ”ស្តង់ដារមុខពីរ” ក្នុងន័យថា ជុំវិញសាច់រឿងតែមួយ រមែងបកស្រាយតាមបែបពីរ ផ្ទុយគ្នា ៖ បើស្របនឹងផលប្រយោជន៍ខ្លួនទង្វើនោះគឺ ត្រូវ តែបើមិនឆ្លើយស្របនឹងប្រយោជន៍ខ្លួនទេ ទង្វើនោះគឺ ខុស។ ពួកគេ លូកដៃចូលកិច្ចការផ្ទៃក្នុងរបស់រដ្ឋអធិបតេយ្យ ហើយរដ្ឋណា ដែលមិនយល់ព្រមតាមបន្ទាត់គេនោះ គឺគេមានវិធានការពេញមួយចង្កោម សម្រាប់គាបសង្កត់ តាំងពីដាក់ទណ្ឌកម្មជាឯកតោភាគីដែលខុសច្បាប់សោះ រហូតដល់ធ្វើ អន្តរាគមន៍យោធាត្រង់ៗតែម្តង។ តាមយោបល់ខ្ញុំ សកម្មភាពបែបនេះរបស់ពួកគេ គឺមិនគ្រាន់តែល្មើសលើច្បាប់ប៉ុណ្ណោះទេ តែគឺរាក់កំភែលមិនចេះមើលឆ្ងាយទៅមុខ ដ្បិតស្ថានការណ៍ក្នុងលោកបច្ចុប្បន្ន មិនអាចកំណត់ តែដោយរដ្ឋណាមួយ ឬ តែដោយប្រទេសមួយក្រុមណាឡើយ។
លោក ឡាវ៉្រូវ សង្កត់ធ្ងន់ថា រុស្ស៊ីនឹងការពារខ្ជាប់ សច្ចធម៌និងយុត្តិធម៌ ការពារសិទ្ធិជនរួមឈាមខ្លួន ហើយគ្មាននរណាអាចបង្ខំរុស្ស៊ី ឲ្យក្បត់នឹងផលប្រយោជន៍ជាតិរបស់ខ្លួនឡើយ។ ដូចដែល លោកប្រធានាធិបតីពូទីន តែងបានគូសបញ្ជាក់ម្តងហើយម្តងទៀត មិនមែនរុស្ស៊ីទេ ជាអ្នកបានបង្ខូចទំនាក់ទំនងអន្តរជាតិ ហើយល័ក្ខខ័ណ្ឌសម្រាប់ស្តារឡើងវិញទំនាក់ទំនងនេះ គឺត្រូវចេះគោរព សិទ្ធិនិងផលប្រយោជន៍ស្របច្បាប់ របស់រុស្ស៊ី។ គោលជំហររុស្ស៊ី គឺឈរលើការស្រាក់កម្លាំងគ្នា ដើម្បីដោះស្រាយបញ្ហាប្រកបដោយបច្ចុប្បន្នភាពនៅក្នុងលោក ដោយទទួលស្គាល់ តួនាទីនាំមុខជាចម្បងរបស់ អ.ស.ប. ឈរលើមូលដ្ឋាននៃច្បាប់អន្តរជាតិ ឈរលើភាពជាដៃគូស្មើភាពគ្នា ហើយទទួលស្គាល់សិទ្ធិរបស់ប្រជាជននិមួយៗ កំណត់វាសនាខ្លួន ដោយខ្លួនឯង។
លោករដ្ឋមន្ត្រីការបរទេសរុស្ស៊ី ក៏បានលើកឡើងអំពីកិច្ចសហប្រតិបត្តិការប្រកបដោយផ្លែផ្ការបស់រុស្ស៊ី ជាមួយដៃគូខ្លួន ក្នុងក្រុម៥ប្រទេស BRICS មាន រុស្ស៊ី ចិន ឥណ្ឌា ប្រេស៊ីល អហ្វ្រិកខាងត្បូងជាសមាជិក និង ក្នុងអង្គការសហប្រតិបត្តិការក្រុងសៀងហៃ ហៅកាត់ថា OCS ដែលក៏មានចិន រុស្ស៊ី និង ៤ រដ្ឋឯករាជ្យ នៃអតីតសហភាពសូវៀត នៅតំបន់អាស៊ីកណ្តាលជាសមាជិក៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ