រុស្ស៊ីមិនចុះហត្ថលេខា លើសទ្ធិសញ្ញាគ្រប់គ្រងចរាចរណ៍អាវុធ របស់អ.ស.ប.ទេ
មន្រ្តីការបរទេសរុស្ស៊ីម្នាក់ បានបញ្ជាក់ប្រាប់អ្នកសារព័ត៌មាន នៅថ្ងៃអាទិត្យ ទី ១៧ឧសភា ថា រុស្ស៊ីនឹងមិនចុះហត្ថលេខាលើ សន្ធិសញ្ញា ស្តីពីការគ្រប់គ្រងពាណិជ្ជកម្មអាវុធគ្រប់ធុន ដែលបានតាក់តែងឡើង ដោយអង្គការសហប្រជាជាតិ ទេ។ រុស្ស៊ីយល់ថា សន្ធិសញ្ញនេះ ក្រៅតែពីមិនបានផ្តល់ជាអត្ថប្រយោជន៍ឲ្យរុស្ស៊ីហើយ ថែមទាំងបានបន្ថែមការលំបាក ឲ្យប្រទេសហត្ថលេខីទៀត។ ដូច្នេះ រុស្ស៊ីគ្មានហេតុផលអ្វី ត្រូវយកវាមកអនុវត្តនោះទេ។
ចុះផ្សាយនៅថ្ងៃ៖
ស្តាប់ - ០២:០៦
សន្ធិសញ្ញាស្តីពីការគ្រប់គ្រង ក្នុងជំនួញជួញដូរអាវុធ ដែលបានតាក់តែងឡើង ដោយអង្គការសហប្រជាជាតិ បានចូលជាធរមាន កាលពី ខែធ្នូឆ្នាំ ២០១៤។ រហូតមកដល់ពេលនេះ មានប្រទេសចំនួន១៣០ហើយ ដែលបានចុះហត្ថលេខា ហើយប្រទេសចំនួន ៦៧បានធ្វើសច្ចាប័ន ដាក់ឲ្យអនុវត្តរួចរាល់ហើយដែរ។ យ៉ាងណាក៏ដោយ ក្នុងចំណោមប្រទេសសមាជិក ក្រុមប្រឹក្សាសន្តិសុខអង្គការសហប្រជាជាតិ នៅមានប្រទេស៤ ដែលមិនទាន់ចុះហត្ថលេខា គឺចិន រុស្ស៊ី ហ្សកដានី និងវ៉េណេហ្ស៊ុយអេឡា។
លោក បាន គីមូន អគ្គលេខាធិការអង្គការសហប្រជាជាតិ បានសរសេរលិខិត ផ្ញើរទៅកាន់ ប្រទេសដែលមិនទាន់ចុះហត្ថលេខា ថាឲ្យឆាប់ចុះហត្ថលេខា នៅក្នុងខែឧសភានេះ។ រុស្ស៊ីទើបតែបានផ្តល់ចំលើយ តាមរយៈមន្រ្តីការទូតរបស់ខ្លួនថា រុស្ស៊ីនឹងមិនចុះហត្ថលេខាលើសន្ធិសញ្ញានេះទេ។ រុស្ស៊ីចាត់ទុកថាវាជាសន្ធិសញ្ញាដែលមានលក្ខណៈទន់ជ្រាយ ហើយបង្កការលំបាកច្រើន ដល់ប្រទេសហត្ថលេខី។ លោក មីខាអ៊ីល អ៊ូលីយ៉ាណូវ ប្រធាននាយកដ្ឋានគ្រប់គ្រងការរីកសាយភាយអាវុធរុស្ស៊ី បាននិយាយថា លោកគ្មានអ្វីធំដុំ ជំទាស់នឹងខ្លឹមសាររបស់សន្ធិសញ្ញានេះទេ គ្រាន់តែលោក មិនឃើញពីសារៈប្រយោជន៍របស់សន្ធិសញ្ញានេះ សម្រាប់រុស្ស៊ី។ អ្វីដែលមានចែង ក្នុងសន្ធិសញ្ញា រុស្ស៊ីបានអនុវត្តវា រួចទៅហើយ ជាមួយបណ្តាប្រទេសផ្សេងទៀតនៅអឺរ៉ុប។
សូមបញ្ជាក់ថា សន្ធិសញ្ញាស្តីពីការគ្រប់គ្រងជំនួញអាវុធនេះ គឺមានចែងជាអាទិ៍ ទាក់ទិនទៅនឹង ការត្រួតពិនិត្យចរាចរណ៍អាវុធគ្រប់ប្រភេទ មិនថា ជាការនាំចេញ នាំចូល រឺគ្រាន់តែជាការឆ្លងកាត់ក៏ដោយ។ អាវុធដែលមានចែងក្នុងសន្ធិសញ្ញានេះ មានដូចជាកាំភ្លើងខ្លី យន្តហោះ និងនាវាចម្បាំង និងរួមទាំងគ្រាប់មីស៊ីលផងដែរ។ តាមរយៈសន្ធិសញ្ញានេះ ប្រទេសហត្ថលេខីទាំងអស់ ត្រូវតែត្រួតពិនិត្យមើលឲ្យបានម៉ត់ចត់ ពីគោលដៅនៃចរាចរណ៍អាវុធទាំងនោះ មុននឹងអនុញ្ញាតឲ្យមានការនាំចេញ នាំចូល ឬឆ្លងកាត់ ដើម្បីចៀសវាង កុំឲ្យអាវុធទាំងនោះ ធ្លាក់ទៅក្នុងដៃរបស់គូបដិបក្ស នៅតាមតំបន់ ដែលមានសង្រ្គាម និងការកាប់សម្លាប់ប្រជាជនស្លូតត្រង់។
ក្រៅពីអាមេរិក រុស្សី និងចិន គឺជាប្រទេស ដែលផលិតនិងនាំ គ្រឿងប្រដាប់អាវុធគ្រប់ធុន ចេញទៅលក់ ច្រើនជាងគេបំផុតក្នុងលោក។ ការចិញ្ចឹមសង្គ្រាមឲ្យនៅរ៉ាំរ៉ៃ តាមតំបន់នានា អាចធ្វើឲ្យប្រទេសឧស្សហកម្មអាវុធទាំងនេះ លក់អាវុធយកលុយច្រកហោប៉ៅ បានយ៉ាងងាយស្រួល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ