លីទុយអានីលើកអនុវត្តវិញរបបកោះហៅយុវជនឲ្យបរិច្ចាគកិច្ចយោធាក្នុងកងទ័ព
ចុះផ្សាយនៅថ្ងៃ៖
ស្តាប់ - ០៤:០៦
មូលហេតុតាមការអះអាងនៃថ្នាក់ដឹកនាំលីទុយអានី គឺមកពីសន្តិសុខប្រទេសជាតិបន្តស្ថិតនៅក្រោមការគម្រាមកំហែងពីខាងរុស្ស៊ីក្នុងបរិបទនៃព្រឹត្តិការណ៍ដែលវិវឌ្ឍទៅនៅអ៊ុយក្រែន។ អំណះអំណាងនេះ គឺយោងទៅលើសេចក្តីសន្និដ្ឋានទាញយកដោយបក្សសម្ព័ន្ធអូតង់ដែលមានលីទុយអានីចូលជាសមាជិកតាំងពីឆ្នាំ២០០៤មករួមជាមួយ ប្រទេស២ទៀតនៃតំបន់មាត់សមុទ្របាល់ទិកគឺ ឡេតូនីនិងអេស្តូនី ហើយដែលទាំងបីនេះ សុទ្ធតែជាសាធារណរដ្ឋ ធ្លាប់ស្ថិតនៅក្រោមអំណាចសូវៀត ពីឆ្នាំ១៩៤០ដល់១៩៩០។
ជាបឋម គួររំលឹកថា របបកោះហៅយុវជនឲ្យបរិច្ចាគកិច្ចយោធាក្នុងកងទ័ពត្រូវបាន លីទុយអានីលុបចោលកាលក្នុងឆ្នាំ២០០៨ បានន័យថា ៤ឆ្នាំក្រោយពីខ្លួនបានចូលជាសមាជិកអូតង់។
ន្តែនៅពីមុខកាលៈទេសៈថ្មី បង្កឡើងដោយស្ថានការណ៍នៅអ៊ុយក្រែន ដោយថ្លែងក្នុង អង្គប្រជុំនៃក្រុមប្រឹក្សារដ្ឋខាងផ្នែកការពារប្រទេស ថ្ងៃ២៤កុម្ភៈកន្លងទៅលោកស្រីប្រធានាធិបតីលីទុយអានី Dalia Grybauskaite បានលើកឡើងថា ៖ រដ្ឋលីទុយអានី សម្រេច លើកយកមកអនុវត្តវិញ របបកោះហៅយុវជនឲ្យបរិច្ចាគកិច្ចយោធា ដែលជាកាតព្វកិច្ចបម្រើក្នុងកងទ័ពដូចដែលមានចែងក្នុងរដ្ឋធម្មនុញ្ញប្រទេស។
គួរដកឃ្លានិយាយថា ក្រុមប្រឹក្សារដ្ឋខាងផ្នែកការពារប្រទេសលីទុយអានី ដែលបានរួមប្រជុំជាបន្ទាន់៣ថ្ងៃមុនមានសមាជិក៥នាក់គឺ រូបប្រធានាធិបតីផ្ទាល់, រូបនាយករដ្ឋមន្ត្រី, រូបប្រធានរដ្ឋសភា, រូបរដ្ឋមន្ត្រីការពារជាតិនិងរូបមេទ័ពលីទុយអានី។
តាមប្រសាសន៍លោកស្រីប្រធានាធិបតី ដែលស្របនឹងរដ្ឋធម្មនុញ្ញ ជា មេបញ្ជាការជាន់ខ្ពស់ បំផុតនៃកងកម្លាំងប្រដាប់អាវុធ ៖
-គឺស្ថានការណ៍ភូមិសាស្ត្រ-នយោបាយកើតឡើងបច្ចុប្បន្ននេះ ដែលតម្រូវឲ្យលីទុយអានី មានព្រំដែនជាប់នឹងប្រទេសរុស្ស៊ីផ្ទាល់យល់ថា ចាំបាច់ត្រូវអនុវត្តឡើងវិញ របបកោះហៅយុវជនឲ្យចូលបរិច្ចាគកិច្ចយោធាក្នុងកងទ័ព។
-របបកោះហៅនេះ នឹងពន្យារទៅសម្រាប់រយៈពេល៥ឆ្នាំទៅមុខ។
-មូលហេតុ មកពីមានការគម្រាមជាប់ជានិច្ចដល់សន្តិសុខប្រទេសជាតិ ពីខាងរុស្ស៊ី។
-យុវជនដែលនឹងកោះហៅនោះ មានចំនួន៣.៥០០នាក់ឬ ១,៧% នៃរាល់អ្នកដែលត្រូវកោះហៅ
-គេម្នាក់ៗនឹងធ្វើការបរិច្ចាគកិច្ចយោធាក្នុងកងទ័ពរយៈពេល៩ខែ។
-យុវជន ដែលត្រូវកោះហៅនោះគឺអាយុពី ១៩ដល់២៦ឆ្នាំ។
ជាការប្រៀបធៀប នៅរុស្ស៊ីយុវជនកោះហៅបែបនេះ គឺអាយុ ពី១៨ ដល់ ២៧ឆ្នាំ ហើយរយៈពេលបរិច្ចាគកិច្ចយោធាសោតគឺ ១២ខែ។
លោកស្រីប្រធានាធិបតី Dalia Grybauskaite ក្នុងបទអន្តរាគមន៍ខ្លួនក៏លំអិតថា ៖
-លីទុយអានី ឥឡូវឆ្លងពីកងទ័ពអាជីពសុទ្ធសាធ ដែលមានយោធា១២.០០០នាក់ ទៅជា កងទ័ពចម្រុះទៅវិញ។
-កងទ័ពចម្រុះ ជាកងទ័ពដែលមានប្រជាប្រិយភាព នៅតាមប្រទេសស្កង់ឌីណាវ បែបយ៉ាង Danemark Finlande Suede Norvege Islande ។
ចំណែកមេទ័ពលីទុយអានី លោកឧត្តមសេនីយ Jonas Vitautas Jukas បានថ្លែងក្នុងកិច្ចប្រជុំ នៃ ក្រុមប្រឹក្សារដ្ឋខាងផ្នែកការពារប្រទេសនោះថា ៖
-ទោះបីប្រទេសរុស្ស៊ី ក្នុងដំណាក់ឥឡូវ ឥតផ្តុំទ័ពនៅជិតព្រំប្រទល់លីទុយអានីក្តី ក៏ស្ថានការណ៍នៅអ៊ុយក្រែនបម្រើជាឧទាហរណ៍ឲ្យប្រទេសនៅជិតខាងនឹងរុស្ស៊ីប្រុងប្រយ័ត្ន ជានិច្ច។
-ស្ថានការណ៍ ដែលកើតឡើងនៅតំបន់ខាងកើតអ៊ុយក្រែន តាមមើលទៅ មិនអាចដោះស្រាយដោយសន្តិវិធីឡើយ។
លោកមេទ័ពលីទុយអានី ក៏បំភ្លឺឲ្យដឹងថា យុវជនកោះហៅ នឹងទទួលការបណ្តុះបណ្តាលក្នុងកងទ័ពជា២ផ្នែក ៖ ផ្នែកទី១-គឺបង្រៀនគេម្នាក់ៗ ឲ្យក្លាយជាអ្នកឯកទេសយោធា , ផ្នែកទី២- គឺបង្ហាត់គេឲ្យចេះច្បាំងក្នុងស្មារតីសមូហភាព។
ក្រសួងការពារជាតិលីទុយអានី បង្ហើបឲ្យដឹងថា ក្នុងឆ្នាំ២០១៥នេះ តាមការបូកគុណឃើញ ត្រួសៗ ជាមុនប្រតិបត្តិការខាងកោះហៅយុវជនឲ្យចូលបរិច្ចាគកិច្ចយោធានឹងតម្រូវឲ្យ ថវិកាជាតិ ចំណាយប្រមាណ ៣២លានអឺរ៉ូ
៩.០០០អឺរ៉ូ សម្រាប់អ្នកបរិច្ចាគកិច្ចយោធាម្នាក់ៗ។
ជាការកត់សម្គាល់ ក្នុងចំណោម ៣ប្រទេសបាល់ គឺលីទុយអានីតែម្តង ដែលសត្រូវនឹងក្រុងម៉ូស្គូខ្លាំងជាងគេ។ ពិតជាលោកស្រីប្រធានាធិបតីប្រទេសនេះ ដែលតែងចេញមុខអំពាវនាវ សហភាពអឺរ៉ុបនិង ស.រ.អា. ឲ្យបង្កើនទណ្ឌកម្មនិងរឹតបន្តឹងសម្ពាធប្រឆាំងរុស្ស៊ី។ពិតជារូបគាត់ ដែលក្នុងដំណើរទស្សនកិច្ចការងារនៅក្រុងគៀវ ថ្ងៃ២៤វិច្ឆិកាឆ្នាំទៅមិញពេលចរចាជាមួយលោកប្រធានាធិបតីប៉េត្រូ ប៉ូរ៉ូឆេនកូ បានសន្យាផ្តល់អាវុធទៅអ៊ុយក្រែន សម្រាប់ប្រឈមតាមសម្តីគាត់គឺទល់នឹង“ អំពើឈ្លានពាន” ពីខាងរុស្ស៊ី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ