មហាសន្និសីទកាសែត លោកប្រធានាធិបតីពូទីន
ត្រូវបានអញ្ជើញ ឲ្យវត្តមាន ក្នុងសន្និសីទកាសែតថ្ងៃនេះ គឺអ្នកកាសែតជាតិ ១.០៤០នាក់ មកពីគ្រប់ខេត្តដែលចំណុះសហព័ន្ធរុស្ស៊ី និងអ្នកកាសែតបរទេសជិត ២០០នាក់ តំណាងឲ្យប្រព័ន្ធផ្សព្វផ្សាយ ធំៗនៅក្នុងលោក។ សន្និសីទកាសែតលើកនេះ ជាលើកទី៨ តាំងពីលោកពូទីន កាន់តំណែងកំពូល ជាប្រមុខរដ្ឋរុស្ស៊ី។
ចុះផ្សាយនៅថ្ងៃ៖
ស្តាប់ - ០២:៤៤
ដោយហេតុថា វិមានក្រេមឡាំងបានប្រកាសថា ខ្លឹមសារនៃសន្និសីទកាសែត គឺដើម្បី បូកសរុបតុល្យាការឆ្នាំ២០១២ ដែលជិតកន្លងផុតទៅ បានជាលោកប្រធានាធិបតីពូទីន ចាប់ផ្តើម គឺពី លទ្ធផលដែលគាត់ចាត់ទុកជាវិជ្ជមាន សម្រេចបានដោយប្រទេសជាតិ បែបយ៉ាង ៖
- កំណើននៃ ផលិតផលសរុបក្នុងប្រទេស ហៅថា GDP ទោះបីវាទាបជាងឆ្នាំមុនដែលមាន កម្រិត ដល់ ៤,៣% ក៏ គ្រាន់តែក្នុង១០ខែដំបូងឆ្នាំនេះ វាបានកើនឡើង ៣,៧% ទៅហើយ។ លទ្ធផល នេះ តាមយោបល់លោកពូទីន គឺល្អ ក្នុងផ្ទៃនៃចង្វាក់ថមថយ ក្នុងសេដ្ឋកិច្ចដែល គេសង្កេតឃើញ នៅ សហភាពអឺរ៉ុប និង ស.រ.អា.។
- ប៉ុន្តែ កសិផល បែរទៅជាទាបជាងឆ្នាំមុនដែលមានប្រមូលបានផលស្រូវសាលី ដល់៩០លាន តោន ក្នុងឆ្នាំនេះ ដោយមកពីធាតុអាកាសរាំងស្ងួត គឺមានប្រមូលបានតែ ៧៤ លានតោន។
- ខាងផ្តោះប្តូរពាណិជ្ជកម្ម ឆ្នាំ២០១២នេះ រុស្ស៊ីនាំចេញ ច្រើនជាងនាំចូល គឺក្នុងទឹកប្រាក់
១៨៧.០០០លានដុល្លារ គឺលើសពីឆ្នាំមុន ដែលបានមានទំហំ ១៦៤.០០០លានដុល្លារ។
- អតិផរណា បើប្រៀបទៅនឹងឆ្នាំ២.០០០ ដែលមានកម្រិតដល់៣៦% ពេលគាត់ទើបឡើងកាន់អំណាច ឥឡូវ លុះកន្លងផុត១២ឆ្នាំ បានធ្លាក់មកនៅត្រឹម៦,៣%ប៉ុណ្ណោះ។
- អត្រាអ្នកអត់ការងារ តាមការបូកគុណឃើញនៃ ”អង្គការការងារអន្តរជាតិ” នៅរុស្ស៊ីឆ្នាំនេះ គឺតែ ៥,៥% ទាបជាង៦,៦% កាលពីឆ្នាំមុន។
- បំណុលរដ្ឋរុស្ស៊ី បន្តស្ថិតនៅទាបជាងឆ្ងាយពី ប្រទេសលូតលាស់ធំៗនៅក្នុងលោក ដោយមាន កម្រិតតែ ១០% នៃ GDP ហើយពីក្នុងនោះ គឺតែ២,៥%ប៉ុណ្ណោះ ជា បំណុលក្រៅប្រទេស។
រីឯសំនួរទី១ ចោទដោយអ្នកកាសែត តើគាត់ ប្រកាន់ឥរិយាបថយ៉ាងណាដែរ ចំពោះ ច្បាប់ អនុម័តម្សិលមិញ ដោយសភាឌូម៉ា ដែលហាមមិនឲ្យពលរដ្ឋអាមេរិកាំង សុំកុមាររុស្ស៊ីយកទៅធ្វើ ជាកូនចិញ្ចឹម លោកពូទីន ឆ្លើយថា ច្បាប់នេះ ជាចម្លើយ តបនឹងទង្វើ” អមិត្ត “ ពីខាងស.រ.អា. ដែលបានចេញ ច្បាប់ប្រឆាំងរុស្ស៊ី ដោយគ្មានអ្វីជា ដើមហេតុសោះ។ ចំណែកអាមេរិកខ្លួនឯង តាមសំដីលោកពូទីន មិនចេះមើលឃើញឡើយ ទង្វើខ្លួនដែលរំលោភបំពានរាប់មិនអស់ លើ សិទ្ធិមនុស្ស ហើយបែរទៅហ៊ាន ប្រដៅនិងបង្រៀនអ្នកដទៃទៅវិញ ក្នុងបញ្ហានេះ។
សំនួរ ដែលគួរឲ្យចាប់អារម្មណ៍ដែរ គឺទាក់ទងនឹងអាការៈសុខភាពគាត់ ៖ លោកពូទីនបញ្ចេញ យោបល់ថា ប្រភពដែលខំទម្លាយដំណឹង នាំឲ្យមានសូរខ្ទរភ្ញាក់ផ្អើលបែបនេះ គឺចេញមកពីខាង ពួកប្រឆាំង ពួកដែលរមែងស្រមៃ ចង់ឃើញគាត់ចាកចេញ ពីមុខតំណែង។
សន្និសីតកាសែតលោកពូទីន នៅបន្តទៅនៅឡើយ។ លើកមុន ក្នុងឆ្នាំ ២០០៧ សន្និសីទ បែប នេះ បានពន្យារទៅអស់ ៤ម៉ោងនិង៤០នាទី ជាទីដែលគាតបានឆ្លើយ តបនឹងសំនួរសរុប ទៅ ចំនួន ១០៦ សំនួរ ឯណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ