បញ្ហាសុខភាពលោកពូទីននាំឲ្យគេផ្អើលនិយាយច្រើន
មូលហេតុ មកពីនាពេលកន្លងទៅ គាត់រមែងលើកទៅពេលក្រោយទៅវិញ ទស្សនកិច្ច ដែលមានគ្រោងធ្វើនៅបរទេស បែបយ៉ាងនៅប្រទេសប៉ាគីស្ថាន ឥណ្ឌា តួកគី។ ហើយថ្ងៃនេះសោត ក្រុងតូក្យូបានប្រកាសថា ភាគីរុស្ស៊ី បានសុំឲ្យលោកនាយករដ្ឋមន្ត្រីជប៉ុន Yoshihiko Noda លុបជំនួបដែលមានគ្រោងប្រព្រឹត្តទៅ នៅម៉ូស្គូ ជាមួយលោកប្រធានាធិបតីរុស្ស៊ីពូទីន នៅខែធ្នូខាងមុខ។
ចុះផ្សាយនៅថ្ងៃ៖
ស្តាប់ - ០២:២៩
ជាការពិត ដែលតាំងពីលោកពូទីន ឡើងកាន់តំណែងកំពូល ជាប្រធានាធិបតីរុស្ស៊ី សម្រាប់មួយអាណត្តិថ្មី កាលពីខែឧសភាមក គឺមានតែ៣ប្រទេសជាអាទិភាពប៉ុណ្ណោះ ដែលគាត់បានអញ្ជើញទៅបំពេញទស្សនកិច្ចភ្លាមភ្លែត គឺ ប្រទេសចិន កាហ្សាក់ស្ថាន អ៊ូស្បេគីស្ថាន ព្រមទាំង ទស្សនកិច្ចខ្លីដូចផ្លេកបន្ទោរ នៅអាល្លឺម៉ង់ និងបារាំង ដើម្បីជួបស្គាល់ជាមួយលោក ប្រធានាធិបតីថ្មី François Hollande។
សូម្បីតែការធ្វើដំណើរក្នុងស្រុក របស់លោកពូទីន ក៏រយាលទៅដែរ។ ការនិយាយគ្នាពីមាត់មួយ ទៅមួយ ចាប់កើតឡើង ក្រោយពីវិមានក្រេមឡាំង បានប្រកាសជាបន្តបន្ទាប់ តាំងពីខែតុលាមក អំពីការលើកពេលទស្សនកិច្ចរបស់លោកពូទីន ទៅកាន់ប្រទេស ប៉ាគីស្ថាន ឥណ្ឌា តួកគី។
ចំណែកលោកនាយករដ្ឋមន្ត្រីមេដវេដេវ ជាមនុស្សលំដាប់ទី២ នៅរុស្ស៊ី ហើយដែលទទួល បន្ទុកចម្បង គឺខាងសេដ្ឋកិច្ច បែរទៅជាឧស្សាហ៍ចេញមុខលើឆាកអន្តរជាតិ បែបយ៉ាង ចូលរួម ក្នុង “ជំនួបកំពូលនៃវេទិកាអាស៊ី-អឺរ៉ុប” លើកទី៧ នៅក្រុងវៀងចន្ទន៍ពេលថ្មីៗ និងបន្ទាប់មក បំពេញទស្សនកិច្ច នៅប្រទេសវៀតណាម ហ្វាំងឡង់ដ៍ និងបារាំង ផងដែរ។
ក្នុងដំណើរទស្សនកិច្ចនោះ តបនឹងសំនួរអ្នកកាសែត អំពីសុខភាពលោកពូទីន លោកមេដវេដេវ ថ្លែងថា គ្មានបញ្ហាអ្វីជាធំដុំទេ ក្នុងសុខភាពលោកប្រមុខរដ្ឋរុស្ស៊ី។ ចំណែកអ្នកនាំពាក្យផ្លូវការ របស់ប្រធានាធិបតីរុស្ស៊ី លោក Dmitri Peskov ថែមទាំងបានថ្លែងបដិសេធច្រានចោលទៅផង ដំណឹងដែលថា ចៅហ្វាយគាត់ មានសុខភាពអាក្រក់ស្អីណា និងថា លោកពូទីនស្រួលខ្លួន ធម្មតាសោះ គ្រាន់តែមួយដងមួយកាល របួសបណ្តាលមកពីគាត់ហាត់កីឡា ជះចំហាយទៅលើ សរីរាង្គកាយគាត់។
អំពីរបួសនេះ លោកប្រធានាធិបតីបេឡារុស Alexandre Loukachenko ព័ណ៌នារៀបរាប់ទៅ ទីភ្នាក់ងារព័ត៌មានអង់គ្លេស Reuters ថា មានម្តង ពេលបោកចំបាប់ Judo ជាកីឡាចំណូលចិត្តរបស់គាត់ លោកពូទីនបានលើក គូប្រកួតគាត់បោះកាត់ស្មាគាត់ទម្លាក់ទៅលើព្រំ ប៉ុន្តែ ពេលបោះនោះ គឺបណ្តាលឲ្យមានផលប៉ះពាល់ដល់ឆ្អឹងខ្នងគាត់តែម្តង។
ទោះយ៉ាងណាក្តី ក៏វិមានក្រេមឡាំងគូសបញ្ជាក់ថា លោកពូទីន បំពេញការងារគាត់ជាប្រមុខរដ្ឋ គ្មានលោះថ្ងៃណាទេ បំពេញនេះ ភាគច្រើន គឺនៅឯនិវេសនដ្ឋានប្រធានាធិបតី ជាយក្រុងម៉ូស្គូ។
មិនតែប៉ុណ្ណោះ នៅថ្ងៃចន្ទទី៣ធ្នូខាងមុខ លោកពូទីននឹងអញ្ជើញ ទៅបំពេញទស្សនកិច្ច នៅប្រទេសតួកគី ក្រោយពីបានលើកពេលមក។ ហើយ ក្នុងចំហៀងទី១ នៃខែធ្នូដែរ លោកពូទីន នឹងធ្វើមហាសន្និសីទកាសែត បូកសរុបតុល្យាការឆ្នាំ២០១២នេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ