មតិពីរផ្ទុយគ្នានៅស.រ.អា.ចំពោះអាណត្តិទី៣ជាប្រធានាធិបតីរុស្ស៊ីរបស់លោកពូទីន
មតិផ្ទុយគ្នានេះ សំដែងដោយម្នាក់ខាងបក្សសាធារណរដ្ឋ គឺលោកស្រី Condollezza Rice អតីតរដ្ឋមន្ត្រីការបរទេសអាមេរិកាំង ជំនាន់លោកប្រធានាធិបតី George W. Bush ពីឆ្នាំ២០០១ ដល់ ឆ្នាំ២០០៩ និងម្នាក់ទៀតខាងបក្សប្រជាធិបតេយ្យ គឺលោក Bill Clinton ដែលធ្លាប់ជាប្រធានាធិបតីអាមេរិកាំង ពីឆ្នាំ១៩៩៣ ដល់ឆ្នាំ២០០១។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
ជាបឋម គួររំលឹកថា លោកពូទីន បច្ចុប្បន្នជានាយករដ្ឋមន្ត្រី មានរហ័សនាម ជា ”បុរសខ្លាំង”នៅរុស្ស៊ីធ្លាប់បានធ្វើជាប្រធានាធិបតីអស់២អាណត្តិទៅហើយ គឺពីឆ្នាំ២០០០ ដល់ ២០០៨។ កាលពីថ្ងៃ២៤កញ្ញាកន្លងទៅ គាត់បានត្រូវលោកប្រធានាធិបតីសព្វថ្ងៃ មេដវេដេវ ស្នើឲ្យឈរឈ្មោះជាថ្មីជាបេក្ខជនប្រធានានាធិបតីក្នុងការបោះឆ្នោតនៅខែមីនាឆ្នាំ២០១២ខាងមុខ។ បើគាត់ជាប់ឆ្នោតជាថ្មី នោះស្របនឹងវិសោធនកម្មដែលមានបញ្ចូលទៅក្នុងរដ្ឋធម្មនុញ្ញ អាណត្តិទី៣របស់គាត់ នឹងពន្យារទៅរហូតដល់៦ឆ្នាំឯណោះ។
ម្សិលមិញ នាពិធីបង្ហាញសៀវភៅស្នាដៃរបស់ខ្លួន ក្រោមចំណងជើងថា No Higher Honor អាចប្រែថា “គ្មានអ្វីខ្ពស់ជាងកិត្តិយស” លោកស្រី Condollezza Rice អតីតរដ្ឋមន្ត្រីការបរទេស អាមេរិកាំងខាងបក្សសាធារណរដ្ឋតបនឹងសំនួរ៖“តើគាត់យល់ឃើញយ៉ាងណាដែរ អំពីអនាគតអាណត្តិទី៣របស់លោកពូទីន?” ឆ្លើយក្នុងន័យអវិជ្ជមានក្រៃ។ តាមមតិលោកស្រីការវិលត្រឡប់របស់លោកពូទីន ទៅកាន់វិមានក្រេមឡាំង គឺនឹងបង្កើនការគាបសង្កត់ ទៅលើបក្សប្រឆាំងហើយនឹងប្រមូលផ្តុំក្នុងដៃគាត់នូវអំណាចកាន់តែច្រើនជាងកាលពី២អាណត្តិមុនទៅទៀត។ តាមលោកស្រីបស្ចិមលោកនៅចងចាំថា អំណាចពូទីនជាប្រធានាធិបតីលើកមុន គឺបានរឹតត្បិតសេរីភាពនៅរុស្ស៊ី និងបានបំផ្លាញគោលការណ៍ នៃឧត្តមភាពច្បាប់។
ប៉ុន្តែព្រមជាមួយនេះ លោកស្រី Condollezza Rice សង្ឃឹមថា សមាហរណកម្មរបស់រុស្ស៊ីទៅក្នុងសេដ្ឋកិច្ចពិភពលោក មុខជានឹងរំខានលោកពូទីនមិនឲ្យឈានជំហានតឹងរ៉ឹងជ្រុលឡើយ ពីព្រោះរុស្ស៊ីក្នុងករណីនោះ នឹងទទួលលទ្ធភាពប្រៀបផ្ទឹមសភាពការណ៍ក្នុងប្រទេសខ្លួនទៅនឹងស្ថានការណ៍ជាក់ស្តែងនៅតាមប្រទេសឯទៀត។
ចំណែកមតិផ្ទុយពីលោកស្រី Condollezza Rice ខាងបក្សសាធារណរដ្ឋ គឺសំដែងមកដោយលោកអតីតប្រធានាធិបតី អាមេរិកាំង Bill Clinton ខាងបក្សប្រជាធិបតេយ្យ។ ថ្លែងក្នុងពិធីបង្ហាញសៀវភៅខ្លួនតាមកាណាល់ទូរទស្សន៍ MSNBC គាត់បានបញ្ចេញយោបល់ថា គ្មានអ្វីជាអាក្រក់ឡើយ ដែលបុគ្គលណាធ្លាប់បានកាន់អំណាចអស់២អាណត្តិហើយ ស្រាប់តែបញ្ឈរ ឈ្មោះដើម្បីជាប់ជាប្រធានាធិបតី អាណត្តិទី៣ បែបយ៉ាងករណីលោកពូទីន។ តាមមតិលោក Bill Clinton គប្បីតែប្រែរបៀបរបបនេះ ឲ្យទៅជាក្បួនច្បាប់តែម្តងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ