រុស្ស៊ីជាមហាអំណាចពិភពលោកដែលកំពុងរលុបទៅ
នេះជាចំណងជើងនៃរបាយការណ៍ ចេញផ្សាយនៅថ្ងៃម្សិលមិញ ដោយពួកអ្នកប្រាជ្ញ “វិជ្ជាស្ថានក្រុងប៊ែរឡាំងខាងបញ្ហាបណ្តាជន និងអភិវឌ្ឍន៍”។ ស្របនឹងរបាយការណ៍នេះ ចំនួន អ្នកស្រុកក្នុងប្រទេសរុស្ស៊ី នឹងរួញខើចទៅ ដោយចង្វាក់លឿនជាង ការប៉ាន់ស្មាននៃ ព្យាករណ៍ ដ៏សែនទុទិ្ទដ្ឋនិយមទៅផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៦
តាមទិន្នន័យពួកអ្នកប្រាជ្ញទាំងនោះ ទៅទល់ឆ្នាំ២០៣០ បណ្តាជនរុស្ស៊ី នឹងថយចំនួនអស់ ១៥លាននាក់។ ទៅទល់ឆ្នាំ២០៥០ សូម្បីបើមានចរន្តជនអន្តោប្រវេសន៍ក្តី ក៏ប្រទេសរុស្ស៊ី នឹងមានបណ្តាជនធ្លាក់ចុះចំនួនអស់ ២០%ទៀត លុះនៅសល់តែ ១១៦លាននាក់ រួចជាប់ត្រឹមតែ លេខ ១៤ប៉ុណ្ណោះ ខាងចំនួនបណ្តាជន នៅក្នុងលោក។
ព្រមជាមួយនេះ ចុះថយច្រើនមែនទែន គឺចំនួនអ្នកដែលមានសមត្ថភាពធ្វើការ ដែលជាបង្អែកនៃសេដ្ឋកិច្ចតែម្តង។ ទៅទល់ ឆ្នាំ២០៣០ នៅរុស្ស៊ី នឹងមានចំនួនចុះទាប គឺមនុស្សវ័យក្មេង ការី ការិនីប្រកបដោយសុខភាពល្អ។ ប៉ុន្តែ បែរទៅជាមានចំនួនកើនឡើង គឺមនុស្សចាស់ជរា។
របាយការណ៍វិជ្ជាស្ថានក្រុងប៊ែរឡាំង បំភ្លឺអំពីមូលហេតុចម្បង នៃការបាត់បង់បណ្តាជននៅរុស្ស៊ី គឺមកពីអត្រាមរណៈដ៏ខ្ពស់ ក្នុងចំណោមបុរសដែលសកម្ម ក្នុងសេដ្ឋកិច្ច ប៉ុន្តែ ដែលយីយា ដោយរោគបេះដូង ព្រមទាំងជម្ងឺថ្លើម បែបយ៉ាងមកពីការនិយមហូបសុរាច្រើនជ្រុល។
ចំណែកលោកស្រី រដ្ឋមន្ត្រីក្រសួងសុខាភិបាលរុស្ស៊ី Tatiana Golikova ថ្លែងថ្ងៃនេះ ក្នុងសភាឌូម៉ា បានលើកឡើងថា បណ្តាជនរុស្ស៊ីកំពុងមានកំណើន កើនឡើងទេតើ រួចគិតពីដើមឆ្នាំនេះមក កំណើនធម្មជាតិនេះ គឺក្នុងចំនួន ១ម៉ឺន ៥ពាន់នាក់។
ដោយឡែក ពួកអ្នកប្រាជ្ញរបស់អង្គការសហប្រជាជាតិ បានតាក់តែងឡើង ”ផែនទីនៃការស្លាប់ ផុតពូជទៅរបស់មនុស្សជាតិ”។ ស្របនឹងផែនទីនេះ រុស្ស៊ីស្ថិតក្នុងចំណោម ១០ប្រទេសដែលរលុបបាត់ទៅមុនគេ។ និយាយឲ្យចំ បណ្តាជនរុស្ស៊ីនឹងផុតពូជទៅ គឺក្នុងឆ្នាំ២៨៨៨ បានន័យថា ក្នុង៨០០ឆ្នាំទៀត។
បច្ចុប្បន្ន ប្រទេសរុស្ស៊ីដែលមានដែនដីធំជាងគេ ប៉ុន្តែខាងចំនួនបណ្តាជនវិញ ដែលមានតែ ១៤២ លាននាក់ គឺជាប់ត្រឹមលេខ ៩ប៉ុណ្ណោះ ដោយស្ថិតនៅឆ្ងាយពីក្រោយ ៣ប្រទេសនាំមុខគេ ពោល គឺ ចិនដែលមាន ១.៣០០លាននាក់ ឥណ្ឌា ១.២០០លាននាក់ និង ស.រ.អា.ដែលមាន ៣១០លាននាក់។
“នយោបាយប្រជាសាស្ត្រ” ដែលរដ្ឋាភិបាលរុស្ស៊ី បានតាក់តែងឡើង សម្រាប់ឆ្នាំ ២០១១-២០១៥ គឺ សំដៅទ្រទ្រង់ចំនួនបណ្តាជនប្រទេស ឲ្យនៅក្នុងចំនួន ១៤២លាននាក់ដដែល ដោយក្នុងពេល ជាមួយគ្នា បង្កើនឲ្យបាន១ឆ្នាំ អាយុមធ្យមរបស់ពលរដ្ឋប្រទេស ពី ៦៩ ដល់ ៧០ឆ្នាំ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ