ធាតុអាកាសក្តៅហួតហែងយ៉ាងយូរបានញ៉ាំងឲ្យ អត្រាមរណៈកើនឡើង
ជាលើកទី១ដែលរដ្ឋាភិបាលរុស្ស៊ីទទួលស្គាល់តួលេខទើបចេញផ្សាយ ដោយ”ទីភ្នាក់ងារខាងស្ថិតិសហព័ន្ធរុស្ស៊ី” ហៅកាត់ថា RosStat ស្តីអំពីអត្រាមរណៈក្នុងមួយខែកក្កដាកន្លងទៅ ដែលបានស្ទុះឡើងដល់ទៅជាងពាក់កណ្តាលនៅរដ្ឋធានីម៉ូស្គូ និងបានកើនឡើង៨,៦% នៅទូទាំងប្រទេសរុស្ស៊ីបើប្រៀបទៅនឹងខែកក្កដាឆ្នាំទៅមិញ គឺដោយមកពីធាតុអាកាសក្តៅហួតហែងយ៉ាងយូរមិនធ្លាប់មានដូច។
ចុះផ្សាយនៅថ្ងៃ៖
សេចក្តីរាយការណ៍របស់ កែវ ឆាយា
ស្របនឹងស្ថិតិនេះកំណើនមរណៈខ្ពស់មែនទែន ដល់ទៅ ៥០,៧% ត្រូវបានកត់ត្រាឃើញនៅរដ្ឋធានីម៉ូស្គូ គឺថា បើក្នុងខែកក្កដាឆ្នាំមុន មានបណ្តាជនក្រុងបានទទួលអនិច្ចកម្ម ៩.៥១៤នាក់ នោះក្នុងខែកក្កដាឆ្នាំនេះ គឺវាត់ដល់១៤.៣៤០នាក់ បានន័យថាចំនួន អ្នកស្លាប់កើនឡើង ៤.៨២៤នាក់ឯណោះ។
អំពីតួលេខសំរាប់សំគាល់អត្រាមរណៈទូទាំងប្រទេសរុស្ស៊ីវិញ ទីភ្នាក់ងារស្ថិតិរុស្ស៊ី RosStat ចង្អុលឲ្យឃើញថា វាមានកំរិតកើនឡើង៨,៦% គិតជាចំនួនមនុស្សស្លាប់ដែលកើនឡើងនោះ គឺ ១៤.៤៧៤នាក់ ពោលគឺថា បើក្នុងខែកក្កដាឆ្នាំមុន មានស្លាប់ ១៥៣.៨២៨នាក់ នោះក្នុងខែកក្កដាឆ្នាំនេះ ចំនួនអ្នកស្លាប់ឡើងដល់ ១៦៨.៣០២ នាក់។ ការដែលស្ថិតិរុស្ស៊ីលើកយកមកនិយាយ គឺតួលេខនៃប្រជាពលរដ្ឋដែលអភ័ព្វស្លាប់ទៅក្នុងខែកក្កដានោះ ព្រោះខែនោះឯងបានទៅជាខែមហាក្តៅនៅរុស្ស៊ី ដែលតាមសេចក្តីសន្និដ្ឋាននៃក្រសួងសុខាភិបាលពិតជាបានជះផលប៉ះពាល់យ៉ាងអាក្រក់ជាពិសេសទៅលើអាការៈសុខភាពមនុស្សវ័យចាស់ជរានិងអ្នកដែលទន់ខ្សោយស្រាប់មកពីជម្ងឺរ៉ាំរ៉ៃប្រចាំកាយ។ ទន្ទឹមនេះ កំណើនម្លឹងៗនៃអត្រាមរណៈក៏សឲ្យឃើញពីអវត្តមាននៃវិធានការការពារសុខភាពពលរដ្ឋដែលគប្បីចាត់ឲ្យបានសមស្របនឹងស្ថានការណ៍អាសន្ននោះ។
ប៉ុន្តែស្ថិតិរុស្ស៊ីឥតលាតត្រដាងឲ្យឃើញទេចំនួនអ្នកស្លាប់ត្រង់ៗដោយមកពីធាតុអាកាសក្តៅខ្លាំងយ៉ាងយូរអស់ពីរខែជាប់ ដែលបានគ្របដណ្តប់លើភូម៌ភាគខាងលិចនៃប្រទេសរុស្ស៊ីអស់២ខែជាប់ពីកណ្តាលខែមិថុនាដល់កណ្តាលខែសីហា។
ទិន្នន័យដែលមានឥតគន់គិតអំពីខែសីហាឯណាខែកាលដែលធាតុអាកាសក្តៅហួតហែងបានបង្កជាអគ្គិភ័យឆេះព្រៃនិងចំការធ្យូងថ្មឆៅ ឆេះយ៉ាងសន្ធោសន្ធៅទាល់តែផ្សែងពុលរបស់វា ហុយមកគ្របដណ្តប់ពេញលើរដ្ឋធានីម៉ូស្គូ លុះញ៉ាំងឲ្យអត្រាមរណៈក្នុងក្រុងនេះ កើនឡើងជា២ ជា៣ដង នេះបើតាមពត៌មានចេញដោយDepartement សុខាភិបាលក្រុងម៉ូស្គូ ប៉ុន្តែដូចជាសព្វមួយដងអ៊ីចឹង គឺមិនលំអិតឲ្យឃើញតួលេខជាក់ស្តែងឡើយ។
ក្រៅពីរដ្ឋធានីម៉ូស្គូក្នុងខេត្តចំនួន១៤នៅប៉ែកខាងលិចនិងភូម៌ភាគកណ្តាលនៃប្រទេសរុស្ស៊ីដែលឆាបឆេះដោយអគ្គិភ័យអត្រាមរណៈនាខែកក្កដាកន្លងទៅបានកើនឡើងក្នុងរង្វង់ពី
១៧ទៅ២០%៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ