យុវជនពុំធ្លាប់មានរឿងហេតុម្នាក់ជាភេរវជនអត្តឃាត
អាជ្ញាធររុស្ស៊ីនៅតែបន្តធ្វើអង្កេតស្រាវជ្រាវស៊ីជម្រៅ បន្ទាប់ពីមានអំពើភេរវកម្មអត្តឃាតសម្លាប់រង្គាល នៅអាកាសយានដ្ឋានDomodedovo នៅម៉ូស្គូ ថ្ងៃទី២៤មករាមុននេះមក។ ស្របតាមប្រធានក្រសួងសន្តិសុខ មានការចាប់ខ្លួនជាច្រើននៅក្នុងរង្វង់ពពួកជននៃអត្តឃាតជនដែលបាន ធ្វើឱ្យផ្ទុះគ្រាប់បែកសម្លាប់ខ្លួនឯងនិងអ្នកដទៃទៀត។ ការវះពិនិត្យសាកសពរបស់វាបង្ហាញឱ្យឃើញថា យុវជននេះបានទទួលឥទ្ធិពលពីគ្រឿងញៀន ពីស្រានិងថ្នាំដែលមានឥទ្ធិពលទៅលើផ្លូវចិត្ត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ វីនស្តុន រតនា
ជាយុវជនមិនសូវនិយាយស្តី លាក់មុខនិងពុំធ្លាប់មានរឿងហេតុនេះហើយជាការពិពណ៌នារបស់អ្នកភូមិAli-lourt នៅតំបន់Ingouchieអំពីយុវជនឈ្មោះMagomed Evloev ។ ស្របតាមមធ្យោបាយឃោសនាមហាជនរុស្ស៊ី និស្សិតរៀនខាងគណនេយ្យនេះ អាយុប្រមាណជា២០ឆ្នាំបានចាកចេញពីលំនៅឋានគ្រួសារនៅខែកញ្ញាមុន។ វាបានពន្យល់ប្រាប់ម្តាយខ្លួនធ្វើជាអ្នកគ្រូបង្រៀននិងឪពុកខ្លួនជាអ្នកប្រកបរបរជាអ្នកបើកបររថយន្តក្រុងចូលនិវត្តន៍ថា វាចាកចេញដើម្បីទៅធ្វើជាកម្មករធ្វើការតាមរដូវនៅតំបន់Krasnodar ដែលនៅខាងជើងតំបន់ភ្នំកូកាស។
ប៉ុន្តែស្របតាមប្រភពជិតដិតនឹងការធ្វើអង្កេត វាបានទៅចូលរួបរួមជាមួយពួកឧទ្ទាមអ៊ីស្លាមនិយមជ្រុល។ នៅពេលក្រោយបន្តិចពីការផ្ទុះ នៅអាកាសយានដ្ឋានDomodedovoគ្រួសាររបស់ភេរវជនអត្តឃាតបានចាកចេញពីភូមិខ្លួន បន្ទាប់ពីបានទទួលទស្សនកិច្ចរបស់ភ្នាក់ងារនៃក្រសួងសន្តិសុខរុស្ស៊ី។ ធាតុADNត្រូវបានស្រង់យកពីសាច់ញាតិរបស់យុវជននេះនិងកំពុងត្រូវធ្វើកោសលវិច័យនៅទីក្រុងម៉ូស្គូ។
ក្រុមអ្នកទទួលខុសត្រូវខាងធ្វើអង្កេតពុំបញ្ជាក់អះអាងព័ត៌មានទាំងនេះទេ។ គេគ្រាន់តែបានអះអាងថា អ្នកធ្វើភេរវកម្មគឺជាយុវជនម្នាក់មានអាយុប្រមាណជា២០ឆ្នាំនិងមានដើមកំណើតមកពីសាធារណរដ្ឋកូកាសរុស្ស៊ី។ គេសង្កត់ធ្ងន់ថា ការវះពិនិត្យសាកសពរបស់វាបានបង្ហាញឲ្យឃើញចំនួនដ៏ច្រើននៃគ្រឿងញៀន ជាតិស្រានិងថ្នាំដែលមានឥទ្ធិពលទៅលើផ្លូវចិត្តនៅក្នុងសព៌ាង្គកាយរបស់វា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ