ភេរវកម្មដ៏សែនសាហាវ មួយលើកទៀត ប្រឆាំងប្រទេសរុស្ស៊ី
រសៀលម្សិលមិញ វេលាម៉ោង ១៦និង៣២នាទី នៅអាកាសយានដ្ឋានអន្តរជាតិ ក្រុងម៉ូស្គូ ឈ្មោះ Domodiedovo មានភេររវជនអត្តឃាត បានបំផ្ទុះគ្រាប់បែកនៅជាប់នឹងខ្លួនវា ដែលបន្ទាប់មក ត្រូវសមត្ថកិច្ចរុស្ស៊ី ប៉ាន់ស្មានថា មានកម្លាំងផ្ទុះយ៉ាងខ្លាំង ស្មើ នឹងធាតុ TNT ពី៥ដល់៧គីឡូក្រាម លុះទាល់តែផ្តាច់ជីវិតមនុស្ស អស់រាប់សឹបនាក់ និងរបួសដល់ជិត ២០០នាក់ឯណោះ។ សោកនាដកម្មនេះ ដែលសឲ្យឃើញពីបរាជ័យនៃនយោបាយរុស្ស៊ី ខាងបង្ក្រាបអំពើភេរវកម្ម បានញ៉ាំងឲ្យមានប្រតិកម្មជួយឈឺឆ្អាល និងសាមគ្គីពីសំណាក់ សហគមន៍អន្តរជាតិ។
ចុះផ្សាយនៅថ្ងៃ៖
បទអន្តរាគមន៍ របស់ កែវ ឆាយា ពីទីក្រុង ម៉ូស្គូ
ទី១- ជាបឋម គួរនិយាយថា អាកាសយានដ្ឋាន Domodiedovo ជាអាកាសយានដ្ឋានធំជាងគេ នៃប្រទេសរុស្ស៊ី។ គ្រាន់តែក្នុងមួយឆ្នាំ ២០១០កន្លងទៅ វាបានទទួលអ្នកដំណើរឲ្យហោះ ចេញ ចូល គឺដល់ ២២លាននាក់ឯណោះ ឫ ជាង៦ម៉ឺននាក់ក្នុង១ថ្ងៃៗ។ សេវាអាកាសយានដ្ឋាននេះ ប្រើប្រាស់ ដោយក្រុមហ៊ុនអាកាសចរណ៍បរទេស ចំនួន៧៦ ក្រុមហ៊ុន បូកទាំង ក្រុមហ៊ុនអាកាសចរណ៍ Thai Airlines និង Vietnam Airlines ដែលយន្តហោះរបស់ក្រុមហ៊ុនទាំងពីរនេះ តែងត្រូវខ្មែរយើងនៅរុស្ស៊ី និយមជិះ ពេលធ្វើដំណើរទៅស្រុក និងធ្វើដំណើរត្រឡប់មកវិញ។
សំរាប់ជាការប្រៀបធៀប អាកាសយានដ្ឋាន Domodiedovo ថែមទាំងធំជាង អាកាសយានដ្ឋាន Sheremetievo ដែលបានត្រូវសង់ឡើងនៅម៉ូស្គូ ដោយក្រុមហ៊ុនអាល្លឺម៉ង់ សំរាប់ទទួលភ្ញៀវដែលមកចូលរួម ក្នុងកីឡាអូឡាំពិកនៅរុស្ស៊ី កាលក្នុងឆ្នាំ ១៩៨០ទៅផង ដ្បិត Sheremetievo ក្នុង១ឆ្នាំមុន បានបម្រើ អ្នកធ្វើដំណើរ តែ ១៥លាននាក់ប៉ុណ្ណោះ ឫតែជាង ៤ម៉ឺននាក់ក្នុង១ថ្ងៃ។
ខ្ញុំរៀបរាប់នេះ គឺដើម្បីរំលេចឲ្យឃើញពីគោលដៅយង់ឃ្នងនៃ ពួកភេរវជន ដែលជ្រើសយក អាកាសយានដ្ឋាន Domodiedovo ជាទីដៅនៃការវាយប្រហាររបស់វាគឺកន្លែងណាដែលមានមនុស្សនាំគ្នាផ្តុំកកកុញ ដើម្បីពេលវាបំផ្ទុះគ្រាប់បែក គឺផ្ចាញ់ឲ្យមានអ្នកស្លាប់ និងអ្នករបួសយ៉ាងច្រើនមែនទែន។ មិនខុសគ្នាឡើយ ពី១០ខែមុន ពេលពួកវាបំផ្ទុះគ្រាប់បែក ក្នុងMetro ម៉ូស្គូ គឺ បានផ្តាច់ជីវិតមនុស្សអស់ ៤០នាក់តែម្តង។ រួចលើកនេះ វាបានបំផ្ទុះគឺដោយឈរបន្លំខ្លួន ជាមួយជនានុជន ដែលរង់ចាំស្វាគមបងប្អូនគេ និង ជាតិបរទេសហោះមកពីក្រៅ តាម ជើងយន្តហោះអន្តរជាតិ។ មុនពេលផ្ទុះនោះ មានយន្តហោះបែបនេះ បានចុះចតចំនួន ៥ជើង គឺមកពី ក្រុង Bruxelles Londres ប្រទេស Grec Egypte Ukraine។ មិនមែនចៃដន្យទេ ដែលក្នុង ចំណោមអ្នកធ្លាក់ខ្លួនស្លាប់ មានជាតិបរទេសដល់៨នាក់ ពីក្នុងនោះ ជាតិអង់គ្លេស២នាក់ ក្រៅពីនេះ គឺជាតិ Bulgarie Allemand Ukraine Tadjikistan Ouzbekistan Kirghizstan។ ហើយក្នុងចំណោមអ្នករបួស ១១នាក់ មានជាតិ បារាំង អ៊ីតាលី Serbie Slovaquie Slovenie Tadjikistan។ គោលដៅ ពួកដែលបានតាក់តែងឡើងជា Scenario បំផ្ទុះគ្រាប់បែក នោះ ក៏ បំភ័យជាតិបរទេស កុំឲ្យគេធ្វើដំណើរ មករុស្ស៊ី ក្នុងឋានៈជាប្រទេសគ្រោះថ្នាក់។
ទី២- ស្របនឹងការធ្វើវិភាគ នៃពួកនយោបាយវិទូសេរីនិយម មូលហេតុនៃចន្លោះធូររលុង ក្នុងការចាត់វិធានការការពារ ទល់នឹងពួកភេរវជន គឺមិនអាចចៀសផុតឡើយ ពីអំពើពុករលួយ។
សូម្បីតែ លោកប្រធានាធិបតីរុស្ស៊ី Medvedev តាមរយៈសម្ភាសន៍ខ្លួនឲ្យទៅកាសែតមួយដ៏ធំ នៃក្រុងម៉ូស្គូ ក៏សំដែងនូវការងឿងឆ្ងល់ក្រៃ តើហេតុដូចម្តេច បានជាភេរវជន អាចយកតាមខ្លួនដោយធូរល្ហុយបែបនេះ នូវគ្រឿងផ្ទុះដល់ ៥ ឫ ៧គីឡូក្រាម? គាត់ទម្លាក់កំហុស ទៅលើពួកភ្នាក់ងារសន្តិសុខរបស់ អាកាសយានដ្ឋានផ្ទាល់។ ប្រសាសន៍លោក Medvedev ត្រូវ ពួកអ្នកវិភាគ បកស្រាយថា ពួកភ្នាក់ងារសន្តិសុខនោះ អាចដើរតួជា” រនុកក្នុង “ លក់ខ្លួនឲ្យពួកភេរវករទិញក្បាលបាន ដោយថែមទាំងអាចជួយលាក់គ្រឿងផ្ទុះនោះ ទុកជាមុននៅកន្លែងណា មួយ នៃអាកាសយានដ្ឋានទៅផង។ ចំណែកពួកអ្នកកាសែត មិនញញើតនឹងចោទ ទាំងនគរបាល ទាំងតម្រួតចរាចរណ៍ខ្លះ ថាពិតជា ទទួលសំណូកពីដៃជើងពួកភេរវជន ហើយបិទភ្នែកធ្វើមិនឃើញ ប្រតិបត្តិការលួចលាក់ខាងត្រៀមគ្រឿងផ្ទុះ ដោយពួកភេរវជនមកពីតំបន់ភ្នំកូកាស និង ខាងដឹកជញ្ជូនគ្រឿងផ្ទុះនោះ។
ទី៣- ប្រតិកម្ម ជួយឈឺឆ្អាល និងសំដែងការរួមមរណទុក្ខ បានត្រូវផ្ញើមកកាន់ថ្នាក់ដឹកនាំរុស្ស៊ី ដោយ ប្រមុខរដ្ឋ ប្រមុខរដ្ឋាភិបាល ប្រទេសជាច្រើននៃបស្ចិមលោក។ ឧទាហរណ៍ លោកប្រធានាធិបតីស.រ.អា. Barack Obama ចាត់ទុកភេរវកម្មនៅ អាកាសយានដ្ឋាន Domodiedovo ក្រុងម៉ូស្គូ ថាជា “ អំពើនាំឲ្យក្តួលក្តៅក្រៃលែង “ អំពើដែលត្រូវតែទទួល ការថ្កោលទោសប្តូរផ្តាច់។ តាមប្រសាសន៍ លោក Obama ស.រ.អា.ត្រៀមផ្តល់នូវរាល់តែជំនួយណា ដែលរុស្ស៊ីត្រូវការ សំរាប់វែកមុខរកពួកអ្នកចាត់ចែងអំពើភេរវកម្មនោះ។
លោកប្រធានាធិបតីបារាំង Nicolas Sarkozy ដោយថ្កោលទោសភេរវកម្មនេះ បានសំដែងនូវការរួមមរណទុក្ខយ៉ាងជ្រាលជ្រៅ ដល់គ្រួសារអ្នកស្លាប់ ព្រមទាំងសាមគ្គីភាពពេញទី របស់បារាំង ជាមួយប្រជាជនរុស្ស៊ី នៅពីមុខ “ ភេរវកម្មដ៏សែនព្រៃផ្សៃនេះ “។ សារសំដែងការថ្កោលទោសភេរវកម្មនៅម៉ូស្គូ ក៏បានត្រូវផ្ញើមក ដោយលោក អគ្គលេខាធិការ អ.ស.ប.
Ban Ki-moon លោក អគ្គលេខាធិការ បក្សសម្ព័ន្ធ OTAN Rasmussen និង មេដឹកនាំរាប់សិបប្រទេស។
ទី៤- ជាបឋម ជំនួយពីខាងរដ្ឋាភិបាលក្រុងម៉ូស្គូ សំរាប់គ្រួសារអ្នកស្លាប់ម្នាក់ៗ គឺក្នុងទឹកប្រាក់ ២លានរូប្ល ឫ ប្រមាណ ៦ម៉ឹន៧ពាន់ដុល្លារអាមេរិក សំរាប់អ្នករបួសធ្ងន់ គឺ ១លាន៥សែនរូប្ល ឫស្មើនឹង ៥ម៉ឺន$ សំរាប់អ្នករបួសកម្រិតមធ្យមនិងស្រាល គឺ ១លានរូប្ល ឫ ជាង ៣ម៉ឺន៣ពាន់៣$។ មិនតែប៉ុណ្ណោះ ការចំណាយសំរាប់បញ្ចុះសពអ្នកស្លាប់ គឺទទួលរ៉ាប់រង ដោយ សាលាក្រុងម៉ូស្គូដែរ។ កូនដែលបាត់បង់ឪពុកម្តាយ ក្នុងសោកនាដកម្មនោះ នឺងទទួល ប្រាក់ជំនួយប្រចាំខែ ពីថវិកាក្រុង រហូតដល់វាពេញវ័យ។ តាមដែលលោកនាយករដ្ឋមន្ត្រី Poutine ប្រកាសឲ្យដឹង សំរាប់អ្នករងគ្រោះនិង គ្រួសារអ្នកស្លាប់ទាំងនោះ ក៏នឹងមានរំលែកចេញពីថវិកាសហព័ន្ធរុស្ស៊ី នូវប្រាក់ឧបត្ថម្ភយ៉ាងក្រាស់ក្រែលដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ