វិបត្តិហិរញ្ញវត្ថុ គំរាមការប្រយុទ្ធប្រឆាំងនឹងជំងឺស៊ីដា
សន្និសីទអន្តរជាតិស្តីពីជំងឺស៊ីដា ឬ អេសដ៍ លើកទី១៨ នឹងផ្តើមប្រព្រឹត្ត ពីថ្ងៃអាទិត្យស្អែកទី ១៨ ដល់ថ្ងៃទី ២៣ កក្កដា ២០១០ ទៅទីក្រុង វីយែន ប្រទេសអូទ្រីស។ កម្មវត្ថុនៃសន្និសីទដែលរៀបចំធ្វើរាល់ពីរឆ្នាំម្តងនេះ នឹងផ្តោតទៅលើ “ការព្យាបាលជាសាកល” ប៉ុន្តែក្នុងបរិបទនៃវិបត្តិហិរញ្ញវត្ថុ ការបន្ថយជំនួយពីសំណាក់ប្រទេសអ្នកមានក៏នឹងក្លាយជារបៀបវារៈ មួយនៃសន្និសីទនេះដែរ។ មួយថ្ងៃមុនការបើកសន្និសីទនេះ តំណាងសាសនាធំៗលើពិភពលោកបានជួបប្រជុំគ្នា ចំណែកពិធីជប់លៀងរាត្រីស្រមោលសប្រមូលមូនិធិនឹងត្រូវរៀបចំនៅថ្ងៃយប់នេះ។
ចុះផ្សាយនៅថ្ងៃ៖
សេចក្តីរាយការណ៍របស់ អៀង សុខម៉ិញ
ជំងឺស៊ីដា ឬ អេសដ៍ ជាកង្វល់របស់ពិភពលោក ! ចាប់ពីម៉ោង ១២ ថ្ងៃត្រង់នេះទៅ ម៉ោងនៅប្រទេសអូទ្រីស បណ្តាអ្នកតំណាងសាសនាធំៗនៅលើពិភពលោក រួមមានសាសនាគ្រិស្ត សាសនាJudaïsme សាសនាអ៊ីស្លាម និងសាសនាព្រះពុទ្ធ បានបើកសន្និសីទមួយ នៅទីក្រុងវីយែន ក្នុងក្របខណ្ឌមុនការបើកសន្និសីទអន្តរជាតិស្តីពីជំងឺស៊ីដា ឬអេដស៍លើកទី ១៨។
សន្និសីទអន្តរជាតិលើកទី ១៨ ដែលប្រព្រឹត្តរយៈពេលមួយសប្តាហ៍ គិតចាប់ពីថ្ងៃទី ១៨ ដល់ថ្ងៃទី ២៣កក្កដា ២០១០ នឹងមានការចូលរួមពីសំណាក់ថ្នាក់ដឹកនាំនយោបាយជាន់ខ្ពស់ អ្នកស្រាវជ្រាវ អ្នកផ្ទុកមេរោគហ៊ីវ(VIH) អ្នកមានជំងឺស៊ីដា ឬ អេសដ៍ អង្គការក្រៅរដ្ឋាភិបាល សមាគមនានា និងក្រុមគ្រូពេទ្យ ដែលសរុបប្រមាណជាងពីរម៉ឺនប្រាំពាន់នាក់។
ប្រធានបទចំបងនៃសន្និសីទអន្តរជាតិលើកនេះគឺ “សិទ្ធិ នៅទីនេះ និងពេលនេះ” ក្នុងការទទួលបានការការពារ និងព្យាបាលជំងឺស៊ីដា ឬ អេសដ៍។ ប៉ុន្តែ ការរីករាលដាល- ចម្លងនៃជំងឺ យុទ្ធសាស្រ្តការពារ និងការវិវឌ្ឍន៍នៃការស្រាវជ្រាវរកថ្នាំព្យាបាលមេរោគ ក៏ដូចជាទំនួលខុសត្រូវរបស់ថ្នាក់ដឹកនាំប្រទេសក្នុងការផ្តល់សេវាដល់អ្នកមានផ្ទុកមេរោគ ឬអ្នកមានជំងឺស៊ីដា ឬ អេសដ៍ ក៏ត្រូវលើកយកពិភាក្សាផងដែរ។
ជាពិសេស សន្និសីទនេះ រៀបចំធ្វើឡើងជួនចំពេលដែល សហគមន៍សុខាភិបាល និងអង្គការប្រយុទ្ធប្រឆាំងនឹងជំងឺស៊ីដា ឬ អេសដ៍នានា កំពុងតែព្រួយបារម្ភនឹងបញ្ហាថវិកា។ ព្រោះ ក្នុងចំនួនប្រាក់ ២ម៉ឺនលានដុល្លារអាមេរិក ដែលបណ្តាប្រទេសអ្នកមានបានសន្យា នៅឆ្នាំ២០០៥ សម្រាប់រយៈពេលបីឆ្នាំ (មុនវិបត្តិហិរញ្ញវត្ថុ) ដើម្បីសម្រួលដល់ការព្យាបាលជាសាកល មូនិធីទទួលបានចូលក្នុងហិបតែប្រមាណ១០០លានប៉ុណ្ណោះ។ វិបត្តិហិរញ្ញវត្ថុ និងនយោបាយត្បិតត្បៀតបានជំរុញបណ្តាប្រទេសទាំងនោះកាត់បន្ថយជំនួយរបស់ខ្លួន។ នេះបើតាមការអះអាងរបស់មហាសេដ្ឋី Bill Gates និងភរិយា។
ដោយយល់ពីបញ្ហាហិរញ្ញវត្ថុនេះ ពិធីរាត្រីស្រមោលស Life Ball មួយនឹងត្រូវរៀបចំឡើង នៅយប់នេះ ដើម្បីប្រមូលថវិកាយកទៅបញ្ជូលក្នុងហិបមូនិធិសម្រាប់ប្រយុទ្ធប្រឆាំងនឹងជំងឺស៊ីដា ឬ អេសដ៍ ដោយមានវត្តមានលោក ប៊ីល គ្លីនតុន អតីតប្រធានាធិបតីអាមេរិក និងសិល្បការិនីអាមេរិក Whoopi Goldbergផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ