អឺរ៉ុបក្រោមក្រសែភ្នែកសម្តេចប៉ាប ហ្វ្រង់ស័រ
ចុះផ្សាយនៅថ្ងៃ៖
ស្តាប់ - ០៤:១៨
ដូចផ្លេកបន្ទោល ! នៅថ្ងៃអង្គារទី ២៥ វិច្ឆិកា ២០១៤ សម្តេចប៉ាប បាននិមន្តមកបំពេញទស្សនកិច្ចនៅក្រុងស្ត្រាស្បួរ ដែនដីបារាំង រយៈពេលប្រមាណតែ ៤ម៉ោង ក្នុងក្របខ័ណ្ឌអឺរ៉ុប។ នេះជាលើកទីមួយហើយ គិតចាប់តាំងពី ២៦ឆ្នាំមក ដែលប្រមុខសាសនាកាតូលិក សម្តេចប៉ាប ត្រូវថ្លែងសុន្ទរកថាទៅកាន់សភា និងក្រុមប្រឹក្សាអឺរ៉ុប។ ជាសុន្ទរកថាបែបនយោបាយ និងបែបផ្តល់មេរៀន ឱ្យ « អឺរ៉ុបចាស់គំរិល » (បើតាមសង្ឃដីការរបស់សម្តេចប៉ាប) ងាកទៅគិតគូរអំពី បញ្ហាមនុស្សធម៌ខ្លះ មិនមែនឱ្យតម្លៃតែលើសេដ្ឋកិច្ចមួយមុខប៉ុណ្ណោះទេ។
មិនមែនត្រឹមតែជាប្រមុខសាសនាទេ ! គឺជាបុរសរដ្ឋតែម្តងដែលបានបង្ហាញខ្លួននៅមុខស្ថាប័នសភាអឺរ៉ុប នាទីក្រុងស្ត្រាស្បួរ របស់បារាំង។ ខ្លឹមសារនៃសុន្ទរកថាទៅកាន់សមាជិកសភាអឺរ៉ុប និងទៅកាន់ក្រុមប្រឹក្សាសហភាព ដែលមានលម្អៀងខ្លាំងទៅខាងផ្នែកនយោបាយ និងពេលខ្លះមានលក្ខណៈការប្រៀនប្រដៅ ផ្តល់មេរៀនផង ផ្តោតសំខាន់ទៅលើប្រធានបទច្រើន ទាក់ទងទៅនឹងតួនាទីរបស់អឺរ៉ុប និងអំពីស្ថានភាពបច្ចុប្បន្ន។ អឺរ៉ុបដែលបើតាមសម្តេចប៉ាប ហាក់នៅឆ្ងាយពីប្រជាជន កាត់ផ្តាច់ពីពលរដ្ឋ។
សម្តេចប៉ាបបានផ្សព្វផ្សាយសារជាច្រើនអនេក លើកទឹកចិត្ត ផ្តល់នូវក្តីសង្ឃឹម ជូនដល់ពលរដ្ឋអឺរ៉ុប។ ជាសារដែលប្រកបដោយក្តី គោរព ភាពជាមនុស្ស និងជាឱកាសតឿនរំលឹកដល់អឺរ៉ុបឱ្យចេះរក្សាតម្លៃ និងគោលការណ៍ជាមូលដ្ឋានរបស់សហភាព ក្នុងវិស័យសិទ្ធិមនុស្ស។ មិនមែនដោយហេតុតែបរិយាកាសសេដ្ឋកិច្ចជួបការលំបាក ដែលអឺរ៉ុបត្រូវមើលរំលងភាពជាមនុស្សលោកបានឡើយ។ សម្តេចបានសម្តែងការប្រឆាំងនឹងការម៉ាក់ងាយជីវិតមនុស្ស មិនថាក្នុងកាលៈទេសៈណាទេ។
ក្តីព្រួយបារម្ភជាក់ស្តែងចំពោះមុខសម្រាប់សម្តេចប៉ាប គឺអនាគតរបស់ទ្វីបអឺរ៉ុប ! នៅចំពោះមុខសភាអឺរ៉ុប ដែលមានវត្តមានស្ទើរគ្មានបាត់ម្នាក់ និងនៅចំពោះមុខក្រុមប្រឹក្សាអឺរ៉ុប ដែលមានតំណាងមកពី ៤៧ប្រទេស សម្តេចប៉ាបបានរៀបរាប់ពិពណ៌នាថាអ្វីទីជារូបភាពអឺរ៉ុបក្នុងពេលបច្ចុប្បន្ននេះ ?! សម្តេចប៉ាបមើលឃើញអឺរ៉ុប ចាស់ជរា បើមើលពីក្រៅឬពីចម្ងាយ គឺពិតជាមិនគួរឱ្យទុកចិត្ត និងគួរឱ្យមានមន្ទិលណាស់ អឺរ៉ុបហាក់ដូចជាគ្មានសមត្ថភាពអ្វីប្រឈមនឹងវិបត្តិបច្ចុប្បន្ន ប្រកបដោយថាមពល និងយ៉ាងខ្លៀវក្លា ដូចអឺរ៉ុបពីមុនសោះ។ មកដល់អឺរ៉ុប យើងអាចចោទសួរ ឯណាទៅកម្លាំង ? ឯណាសម្ពាធដែលនាំដល់ភាពល្អឥតខ្ចោះ ភាពរស់រវើកមានជាប់ក្នុងប្រវត្តិសាស្ត្រ រហូតបានធ្វើឱ្យអឺរ៉ុបរីកធំនោះ ? ឯណាទៅគំនិតសតិចង់ចេះចង់ដឹង ចេះងើយឆ្ងល់ ? ឯណាទៅអឺរ៉ុបដែលស្រែកឃ្លានការពិត ?! បើតាមទស្សនៈរបស់សម្តេច សហភាពអឺរ៉ុបមានតែសភាពនឿយហត់ ចាស់ទ្រុឌទ្រោម គួរឱ្យខ្លាច មូរមុខ គ្មានជីវិត គ្មានការកកើតថ្មី » អឺរ៉ុបមិនគួរបាត់បង់ព្រលឹងយ៉ាងដូច្នេះសោះ។
មេរៀនអន្តោប្រវេសន៍ ជាប្រធានបទស្នូល។ សម្តេចសង្ឃកាតូលិក បានបន្ទោសសមាជិកទាំង២៧របស់សហភាពអឺរ៉ុប បានបោះបង់ភារកិច្ចនយោបាយ។ ប៉ុន្មានឆ្នាំចុងក្រោយនេះ ពលរដ្ឋបានចិញ្ចឹមភាពមុនទុកចិត្តលើស្ថាប័នអឺរ៉ុប ខ្វល់គិតតែបង្កើតក្បួនវិធាន បច្ចេកទេសនិងសេដ្ឋកិច្ច បំភ្លេចចោលធាតុពិតនៃមនុស្ស។ មិនតែប៉ុណ្ណោះអឺរ៉ុប គ្មានសមត្ថភាពរួបរួម ជួយគ្នាទៅវិញទៅមកសោះក្នុងវិបត្តិអន្តោប្រវេសន៍ ជ្រើសរើសដំណោះស្រាយដាច់ៗគ្នា រដ្ឋណាជួបបញ្ហារដ្ឋនោះត្រូវដោះស្រាយ។ នៅចំពោះមុខសភាអឺរ៉ុប ដែលស្នូរទះដៃយ៉ាងកងរំពង ស្ទើរគ្មានដាច់ សម្តេចប៉ាប បានប្រកាសប្រៀនប្រដៅថា « គេមិនអាចអនុញ្ញាតិឱ្យសមុទ្ទមេឌីទែរ៉ាណេ ក្លាយជាវាលកប់ខ្មោចដ៏មហាសាលបានទេ ! ទូកដឹកជនភៀសខ្លួនបានមកតោងឆ្នេរអឺរ៉ុបជារៀងរាល់ថ្ងៃ មានមនុស្សស្រីប្រុស ត្រូវការជំនួយ និងការសង្គ្រោះពីអឺរ៉ុប»។ មានតែពាក្យយូរហើយ ល្មមដល់ពេលដែលត្រូវស្ថាបនាអឺរ៉ុបមួយ ដោយមិនរំពឹងវិលជុំវិញតែលើសេដ្ឋកិច្ច តែជាអឺរ៉ុបដែលឈរលើគំនិតឱ្យតម្លៃដល់មនុស្ស។
សម្តេចប៉ាបបានអំពាវនាវយ៉ាងរំពងឱ្យជនគ្រប់រូបចេះភ្ជាប់ប្រយោជន៍បុគ្គលទៅនឹងប្រយោជន៍រួម ពោលគឺជាសារដែលមានអត្ថន័យមនុស្សធម៌ពិតៗ។ សម្តេចប៉ាបត្រួសត្រាយផ្លូវឱ្យអឺរ៉ុបដើម្បីរក្សាតម្លៃ និងអត្តសញ្ញាណរបស់ខ្លួន នៅចំពោះមុខស្ថាប័នអឺរ៉ុបតែម្តង នៅថ្ងៃម្សិលមិញដែលយើងអាចសង្ខេបសេចក្តីបានថា ប្រសិនបើអឺរ៉ុបចង់បានមកវិញនូវ ភាពជាអឺរ៉ុបដ៏ចំណាស់ និងភាពល្បីរន្ទឺលើពិភពលោក អឺរ៉ុបត្រូវតែភ្ជាប់ឬគល់ដើមរបស់ខ្លួនឡើងវិញ ជាមួយនឹងទស្សនៈជាមនុស្ស ព្រមទាំងឆន្ទៈនយោបាយ។
ជាថ្មីម្តងទៀត សម្តេចប៉ាប បានបង្ហាញសមត្ថភាពថ្លែងសារទៅកាន់ពលរដ្ឋ ក្នុងភាសាមួយដែលងាយយល់សម្រាប់មនុស្សគ្រប់ស្រទាប់។ លំហាត់បែបនេះបានបញ្ជាក់ឱ្យតែច្បាស់បន្ថែមទៀត ថាប្រមុខសាសនាកាតូលិក គ្រប់គ្រងស្ថានភាពអឺរ៉ុបបានយ៉ាងពេញលេញ និងមានដែនគំនិតនយោបាយធំធេង ខុសពីសម្តេចប៉ាបមុន បឺន័រ ទី ១៦ ដែលព្រះអង្គផ្តល់តម្លៃខ្លាំងតែលើផ្នែកសាសនា។ តែយ៉ាងណាក៏ដោយ ក៏វិហារកាតូលិក តែងនៅក្បែរនយោបាយជានិច្ច។ សម្តេចប៉ាប ជាប្រមុខវិហារកាតូលិក ដែលនៅក្នុងទ្វីបអឺរ៉ុបមានអ្នកកាន់និងជឿស៊ប់ដល់ទៅប្រមាណ២០០លាននាក់។ ហើយដោយហេតុថា អឺរ៉ុបតែងផ្តល់សិទ្ធិនិងស្តាប់សមាគមន៍ផ្សេងៗ ឬក្រុមLobbies រឿងអ្វីមិនផ្តល់ឱកាសឱ្យវិហារកាតូលិក ?!
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ