សំណុំរឿងលួចស្តាប់អតីតប្រធានាធិបតីបារាំង កំពុងធ្វើឱ្យរដ្ឋាភិបាលទើសទាល់
មានសេចក្តីប្រកាសផ្សេងៗគ្នា និងយ៉ាងចម្រូងចម្រាសបំផុត នៅក្នុងជួររដ្ឋាភិបាលបារាំង បន្ទាប់ពីមានផ្ទុះរឿងអាស្រូវ លួចស្តាប់ អតីតប្រធានាធិបតី លោក នីកូឡា សាកូហ្ស៊ី តាមទូរស័ព្ទ។ តុលាការទំនងជាបានលួចស្តាប់កិច្ចសន្ទនារវាង អតីតប្រធានាធិបតី ជាមួយមេធាវី និងជាមួយអតីតរដ្ឋមន្ត្រីក្រសួងមហាផ្ទៃទាំងពីរក្រោមបង្គាប់លោកនីកូឡា សាកូហ្ស៊ី។ សម្រាប់អ្នកគាំទ្រលោកនីកូឡាសាកូហ្ស៊ី ការលួចស្តាប់នេះជាផែនការរៀបចំឡើយដោយរដ្ឋាភិបាលកំពុងកាន់អំណាច និងជាចារកិច្ចនយោបាយ ! សមាជិករដ្ឋាភិបាលបានសាកល្បងការពារខ្លួន តែសេចក្តីថ្លែងការណ៍ហាក់មានលក្ខណៈចម្រូងចម្រាសគ្នាខ្លាំង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២១
មិនធ្លាប់មានពីមុនមកទេ ដែលតុលាការសម្រេចលួចស្តាប់អតីតប្រធានាធិបតី សន្ទានាតាមទូរស័ព្ទ ជាមួយមេធាវី និងអតីតរដ្ឋមន្ត្រីក្រសួងមហាផ្ទៃក្រោមបង្គាប់យ៉ាងដូច្នេះ។ តុលាការទំនងជាចាប់អារម្មណ៍នឹងចំណងទាក់ទងរវាងលោកនីកូឡា សាកូហ្ស៊ី ជាមួយមេប៉ូលិស និងក្រុមចៅក្រម ដែលអាចផ្តល់ព័ត៌មាន ក្នុងសំណុំរឿងរសើបៗ ពាក់ព័ន្ធនឹងអតីតប្រធានាធិបតី។
ដើមហេតុដំបូងដែលរុញច្រានឱ្យតុលាការសម្រេចលបស្តាប់លោកអតីតប្រធានាធិបតី និងអតីតរដ្ឋមន្ត្រីមហាផ្ទៃក្រោមបង្គាប់ គឺសំណុំរឿងហិរញ្ញវត្ថុធ្វើយុទ្ធនាការឃោសនាបោះឆ្នោតប្រធានាធិបតីបារាំងកាលពីឆ្នាំ២០០៧ ដែលគេសង្ស័យថាបានមកពីប្រទេសលីប៊ី។ ការលបស្តាប់ កិច្ចសន្ទនារវាងលោកសាកូហ្ស៊ីនិងមេធាវី ដែលបានផ្តល់ព័ត៌មានច្រើនពាក់ព័ន្ធនឹងសំណុំរឿងផ្សេងៗមួយទៀត ៖ ការរឹបអូសសៀវភៅកំណត់ហេតុប្រចាំថ្ងៃប្រធានាធិបតីក្នុងពេលកាន់អំណាច។ បើតាមកាសែត ឡឺម៉ុង មេធាវីការពារលោកសាកូហ្ស៊ី មានអ្នកផ្តល់ព័ត៌មាន ស្តីពីការវិវឌ្ឍន៍សំណុំរឿងក្តី ជាថ្នូរនឹងតួនាទីសំខាន់មួយ នៅម៉ូណាកូ។
កិច្ចសន្ទនារវាងកូនក្តីនិងមេធាវី អាចចាត់ទុកថាកិច្ចការសម្ងាត់វិជ្ជាជីវៈ ដែលត្រូវគោរព។ ជាងនេះទៅទៀត សារព័ត៌មានជាទីទុកចិត្តបំផុត បានបញ្ជាក់ថារដ្ឋាភិបាលបានដឹងព័ត៌មាននេះ តាំងពីថ្ងៃទី ២៦ខែកុម្ភៈ ពោលគឺមុនការចុះផ្សាយតាមសារព័ត៌មានទៅទៀត។ ហេតុដូច្នេះហើយបានជាគណបក្សប្រឆាំង ព្រមទាំងអ្នកគាំទ្រលោកនីកូឡា សាកូហ្ស៊ី យល់ថាជាចារកិច្ចនយោបាយ និងបានស្នើសុំឱ្យប្រធានាធិបតីបារាំង ពន្យល់បំភ្លឺសំណុំរឿងតុលាការមានល្បាយនយោបាយ ដែលស្ទើរក្លាយជារឿងអាស្រូវរដ្ឋ។
ប៉ុន្តែសេចក្តីបំភ្លឺរបស់រដ្ឋាភិបាលហាក់មានសភាពចម្រូងចម្រាសគ្នា។ តើអ្នកបានដឹង អ្នកមិនបានដឹង ? ផ្ទុយពីលោកស្រីរដ្ឋមន្ត្រីក្រសួងយុត្តិធម៌ លោកនាយករដ្ឋមន្ត្រី នៅពេលល្ងាចមិញ ប្រកាសទទួលស្គាល់ តាមកញ្ចក់ទូរទស្សន៍ជាតិថា រូបលោកផ្ទាល់ និងរដ្ឋមន្ត្រីក្រសួងយុត្តិធម៌ ក្រសួងមហាផ្ទៃ បានទទួលដំណឹងទាក់ទងនឹងការលួចស្តាប់កិច្ចសន្ទនារបស់អតីតប្រធានាធិបតីតាមទូរស័ព្ទមែន ប៉ុន្តែគ្មានសមាជិករដ្ឋាភិបាលណាម្នាក់ រាប់ទាំងលោកប្រធានាធិបតីបច្ចុប្បន្ន ហ្វ្រង់ស័រ ហូឡង់ផង ពុំបានដឹងអំពីខ្លឹមសារនៃកិច្ចសន្ទនានោះឡើយ។ បន្ទាប់មកទៀត នៅព្រឹកថ្ងៃពុធនេះ រដ្ឋមន្ត្រីក្រសួងមហាផ្ទៃ បានចេញមុខប្រកាសដែរថាបានទទួលព័ត៌មានមួយថ្ងៃមុនការចុះផ្សាយក្នុងទំព័រកាសែត តាមរយៈសារព័ត៌មាន ឯប្រធានាធិបតីបានដឹងបីថ្ងៃមុនប៉ុណ្ណោះ។
លោកហ្វ្រង់ស័រ ហូឡង់ ប្រកាសត្រៀមនឹងទទួលជួបតំណាងមេធាវី និងតំណាងសហជីពចៅក្រម ដោយឈរលើគោលការណ៍បែងចែងអំណាចប្រតិបត្តិនិងអំណាចតុលាការ មិនលូកលាន់ក្នុងសំណុំរឿងក្តីនេះឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ