អ៊ីនធ័រនែតដង្ហើមថ្មីនៃពាណិជ្ជកម្មអឺរ៉ុបជាមួយនឹងចិន
ចុះផ្សាយនៅថ្ងៃ៖
ស្តាប់ - ០៤:០០
ទិញក៏បាន ឬលក់ក៏បាន ពាណិជ្ជកម្មតាមប្រព័ន្ធអ៊ីនធ័រនែត កំពុងតែពេញនិយមខ្លាំងឡើងៗ មិនស្គាល់ឡើងពាក្យថា “វិបត្តិ”។ រនាំងភាសា និងវប្បធម៌ មិនមែនជាឧបសគ្គ ក្នុងការធ្វើពាណិជ្ជកម្ម តាមបែបទំនើប សម័យថ្មី -តាមប្រព័ន្ធព័ត៌មានវិទ្យាទេ។ ប្រទេសនៅអឺរ៉ុបជាបន្តបន្ទាប់ បានបង្កើតវិបសៃតិ៍ ពិសេស ដើម្បីសម្រួលការធ្វើពាណិជ្ជកម្ម ដោយផ្ទាល់ ជាមួយអតិថិជនអ្នកមានថ្មីចិន។ នៅប្រទេសបារាំងវិបសៃត៍នោះមានឈ្មោះថា Vendreauxchinois.fr។
ការលក់ដូរតាមអ៊ីនធ័រនែត មិនត្រឹមតែជាមូទ័របង្វិលប្រព័ន្ធ Web ឱ្យដើរឥតឈប់ប៉ុណ្ណោះទេ ប៉ុន្តែក៏ជាឱកាសមួយសម្រាប់អ្នកលក់ដូរតូចតាច ដែលតាមទម្លាប់ប្រពៃណី ពាណិជ្ជកម្មបុរាណ រួញតែជ្រុងផ្សាររបស់ខ្លួននោះ អាចមានមុខមានមាត់ប្រកួតប្រជែង ឆ្លងពិភពលោកបានតែក្នុងពេលតែមួយប៉ប្រិចភ្នែក។ ទីផ្សារបែបទំនើបសម័យកុំព្យូទ័រនេះ កាន់តែរីកលូតលាស់ជាលំដាប់។
ក្នុងមួយឆ្នាំ២០១២កន្លងទៅ គេប៉ាន់ប្រមាណថាមានទឹកប្រាក់រាប់ពាន់លានកោដិ បានចំណាយតាមប្រព័ន្ធអ៊ីនធ័រនែត។ សហរដ្ឋអាមេរិក ជាជើកឯកលេខមួយក្នុងវិស័យលក់ដូរតាមអ៊ីនធ័រនែត។ ជាឧទាហរណ៍ ក្រុមហ៊ុនPaypal អាមេរិក តែមួយនេះតំណាងឱ្យ១០៥ពាន់លានដុល្លារទៅហើយ ក្នុងឆ្នាំ២០១២ តួលេខនឹងកើនឡើងបីដង នៅប្រាំឆ្នាំខាងមុខ។ ប៉ុន្តែអ្នកវិភាគសេដ្ឋកិច្ចប៉ាន់ប្រមាណថា នៅឆ្នាំ២០១៣នេះ តំបន់អាស៊ីប៉ាស៊ីហ្វិក នឹងវ៉ាឈ្នះអាមេរិក។ តំបន់អាស៊ីឡើងខ្លាំងដូច្នេះក៏ព្រោះដោយសារតែ ចិន ប្រជាជនចិន ថ្នាក់កណ្តាល ដែលមានកំរិតជីវភាពមធ្យម អាចមានលទ្ធភាពចាយវាយខ្លាំង មានចំនួនដល់ទៅ៣០០លាននាក់។
ជាមួយនឹងស្ថិតិនេះ អ្នកជំនួញ និង ពាណិជ្ជកម្មលក់ដូរតាមអ៊ីនធ័រនែត ពិតជាអាចមើលរំលងបានឡើយ ហើយអាចកែច្នៃឱ្យកាន់ប្រសើរ និងកាន់តែមានប្រយោជន៍ទៀត។ មិនមែនត្រឹមជាការលក់ដូរសម្លៀកបំពាក់ ឬស្បែកជើង កាបូបទេ គឺឈានដល់ទំនាក់ទំនងពាណិជ្ជកម្មទូទៅតែម្តង។ ជាក់ស្តែង នៅដើមឆ្នាំ២០១៣នេះ ប្រទេសអ៊ីតាលី បានបង្កើតនិងអភិវឌ្ឍវិបសែត៍មួយ www.VendrereAiCinesi.it សម្រាប់សម្រួលទំនាក់ទំនងពាណិជ្ជកម្មរវាងអ៊ីតាលីនិងចិន ដោយផ្ទាល់ គ្មានទៀតឡើយរនាំងឧបសគ្គវប្បធម៌ ឬភាសា ដែលបែងចែងអរិយធម៌ទាំងពីរ។ អ្នកលក់ចុះផ្សាយបង្ហោះដំណឹងលក់ឬទិញអ្វីមួយជាភាសាអ៊ីតាលី ភ្លាមមួយរំពេច ដំណឹងនោះត្រូវបកប្រែជាភាសាចិន និងបង្ហោះចេញភ្លែត នៅលើទំព័រវិបសែត៍ www.maimaiouzhou នៅប្រទេសចិន (maimai មានន័យថា ទិញនិងលក់ ឯពាក្យថា Ouzhou គឺអឺរ៉ុប)។
វិបត្តិសេដ្ឋកិច្ចដ៏ធ្ងន់ធ្ងរនៅអឺរ៉ុប អ៊ីតាលីមានសេដ្ឋកិច្ចងាប់ស្តូក គឺជាបុព្វហេតុ រុញច្រានឱ្យមានការផ្តួចផ្តើមបង្កើតវិបសែត៍ប្រភេទនេះ ដើម្បី និងដោយសង្ឃឹមថាអាចទៅគោះសេដ្ឋកិច្ចឱ្យកំរើកឡើងវិញបាន។ ព្រោះបើក្នុងរូបភាពផ្ទាល់ជាក់ស្តែង គឺពិតជាគ្មានជនជាតិចិននរណាហ៊ានជន្ល ឬប្រថុយប្រថាន យកប្រាក់ទៅធ្វើវិនិយោគអ្វីមួយ ឆ្លងដែន ឆ្លងទឹកឆ្លងអាកាសមកធ្វើទម្លាក់ក្នុងប្រទេសមួយដែលរួមរិតដោយពាក្យថាវិបត្តិ ដូចយ៉ាងអ៊ីតាលីសព្វថ្ងៃនេះឡើយ។ ហើយបណ្តាជនអ៊ីតាលីដែលចង់ធ្វើវិនិយោគជាមួយចិន ក៏ធ្វើដំណើរទៅរកចាប់ចិនត្រង់ៗដែរ។ ដូច្នេះមានតែប្រព័ន្ធអ៊ីនធ័រនែតនេះឯងដែលជាអ្នកកណ្តាលជាស្ពានភ្ជាប់ទំនាក់ទំនងអ៊ីតាលីជាមួយចិន។
ឯលទ្ធផល បានដូចចិត្ត និងយ៉ាងទាន់ហន់ទៀត ! ពេលនេះបណ្តាប្រទេសមានវិបត្តិសេដ្ឋកិច្ចផ្សេងទៀត ដូចយ៉ាងប្រទេសអេស្បាញ និងបារាំង ក៏ចាប់ផ្តើមបង្កើតវិបសៃត៍ពាណិជ្ជកម្មដែរ។ ពាណិជ្ជកម្មតាមអ៊ីនធ័រនែត បែបអាល្លឺម៉ង់ នឹងត្រូវបង្អួតខ្លួន លើបណ្តាញព័ត៌មានវិទ្យា នៅរវាងពីរបីថ្ងៃទៀត។
ពាណិជ្ជកម្មតាមអ៊ីនធ័រនែត បានទទួលចំណាប់អារម្មណ៍ និងជោគជ័យខ្លាំង ក៏ព្រោះតែបែបបទរដ្ឋបាលមានលក្ខណៈសាមញ្ញ និងឆាប់រហ័ស មិនស្មុគស្មាញដូចបែបបទធ្វើពាណិជ្ជកម្មតាមបែបធម្មតា ឬថាតាមបែបបូរាណនោះទេ។ ការលក់ដូរតាមអ៊ីនធ័រណែតនៅអឺរ៉ុបនេះ មានលក្ខណៈទូលំទូលាយខ្លាំង និងមានលក្ខណៈជាការធ្វើពាណិជ្ជកម្មទ្រង់ទ្រាយធំផង លើគ្រប់ប្រភេទ ដូចជា លក់ហាង លក់អាគារ ផ្ទះ វាំង វិមាន សណ្ឋាគារ ឃ្លាំង វត្ថុប្រណិតៗមានតម្លៃ ជំនួយសេវាការងារ សំណើស្វែងរការងារធ្វើ ឬសេវាផ្តល់ប្រាក់កម្ចី ឬដល់លក់យន្តហោះផងក៏មាន។ នៅប្រទេសបារាំង តាមរយៈ ទំព័រវិបសៃត៍ Vendreauxchinois.fr ទាំងអ្នកលក់ ទាំងអ្នកទិញ មិនត្រូវបានទាមទារឱ្យបង់ប្រាក់កុំមីហ្សុង ពេលទិញដូរទេ គឺបង់តែថ្លៃសេវាបកប្រែតែប៉ុណ្ណោះ ដែលមានតម្លៃមិនដល់៤០អឺរ៉ូផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ