វិបត្តិប្រាក់បំណុលអឺរ៉ុប៖ ដំណើរឆ្ពោះទៅរកការបោះមូលបត្របំណុលរួម?
នៅថ្ងៃអង្គារ ១៦ សីហា ២០១១ស្អែកនេះ ប្រមុខដឹកនាំបារាំង និងអាល្លឺម៉ង់នឹងជួបពិភាក្សាគ្នា នៅទីក្រុងប៉ារីស ដើម្បីស្វះស្វែងរកយន្តការស្រោចស្រង់តំបន់ចាយលុយអឺរ៉ូចេញពីវិបត្តិបំណុល។ ការបោះមូលបត្របំណុលរួម ក្នុងក្របខ័ណ្ឌអឺរ៉ុប គឺជាយន្តការមួយ ដែលគាំទ្រដោយបារាំង ក៏ប៉ុន្តែ អាល្លឺម៉ង់បានជំទាស់យ៉ាងដាច់អហង្ការ។ ក៏ប៉ុន្តែ កាលពីថ្ងៃអាទិត្យម្សិលមិញនេះ កាសែតអាល្លឺម៉ង់មួយបានចុះផ្សាយថា រដ្ឋាភិបាលអាល្លឺម៉ង់អាចនឹងពិចារណាទទួលយកយន្តការបោះមូលបត្របំណុលរួមនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៤:៥៩
ការបោះមូលបត្របំណុលរួម គឺមានន័យថា គេត្រូវយកបំណុលរបស់រដ្ឋាភិបាលជាសមាជិកតំបន់អឺរ៉ូមកដាក់រួមគ្នាជាបំណុលតែមួយ។ វាគឺជាបំណុលរួម ហើយគ្រប់ប្រទេសជាសមាជិកទាំងអស់ត្រូវជាប់កាតព្វកិច្ចសាមគ្គី ក្នុងការសងបំណុលនេះ។ ក្នុងយន្តការនេះ ប្រទេសដែលមានចំណាត់ថ្នាក់ឥណទានខ្ពស់ (អាល្លឺម៉ង់ និងបារាំង) អាចជួយយោងប្រទេសដែលមានចំណាត់ថ្នាក់ទាប (ក្រិក ព័រទុយហ្កាល់ អៀរឡង់ ។ល។) ហើយគ្រប់ប្រទេសជាសមាជិកតំបន់អឺរ៉ូទាំងអស់នឹងអាចខ្ចីបំណុលក្នុងអត្រាការប្រាក់ដូចគ្នា។
អ៊ីតាលី បារាំង និងអង់គ្លេស សុទ្ធតែបានគាំទ្រសំណើនេះ ក៏ប៉ុន្តែ អាល្លឺម៉ង់ជំទាស់។ រដ្ឋមន្រ្តីក្រសួងសេដ្ឋកិច្ចអាល្លឺម៉ង់បានថ្លែងថា “អាល្លឺម៉ង់មិនអាចទទួលយកយន្តការបោះមូលបត្របំណុលរួមបានជាដាច់ខាត ដរាបណានយោបាយសារពើពន្ធនៅតែស្ថិតក្នុងដៃប្រទេសជាសមាជិកនីមួយៗ”។
អាល្លឺម៉ង់ប្រឆាំងនឹងការបោះមូលបត្របំណុលរួម ព្រោះបើធ្វើបែបនេះ អាល្លឺម៉ង់អាចនឹងត្រូវខ្ចីលុយដោយអត្រាការប្រាក់ខ្ពស់ជាងបច្ចុប្បន្ន។ ម្យ៉ាងទៀត អាល្លឺម៉ង់នឹងត្រូវទទួលរ៉ាប់រងធានាបំណុលរបស់ប្រទេសផ្សេងទៀត។
ក៏ប៉ុន្តែ កាលពីថ្ងៃអាទិត្យ ម្សិលមិញនេះ កាសែតស្និទ្ធនឹងគណបក្សរបស់លោកស្រីមែរកិល បានចុះផ្សាយថា ជាជម្រើសចុងក្រោយ រដ្ឋាភិបាលអាល្លឺម៉ង់អាចនឹងទទួលយកយន្តការមូលបត្របំណុលរួម ប្រសិនបើវាជាមធ្យោបាយចាំបាច់ខានមិនបាន ដើម្បីសង្រ្គោះតំបន់អឺរ៉ូពីការដួលរលំ។
ក៏ប៉ុន្តែ គេរំពឹងថា អាល្លឺម៉ង់ប្រាកដជាដាក់លក្ខខណ្ឌច្រើន មុននឹងសុខចិត្តទទួលយកយន្តការនេះ។ ដើម្បីដាក់បំណុលរួមគ្នាបាន ប្រទេសជាសមាជិកទំនងជាត្រូវប្រគល់នយោបាយថវិកាជាតិទៅឲ្យស្ថាប័នអឺរ៉ុបជាអ្នកគ្រប់គ្រង ពោលគឺ រដ្ឋជាសមាជិកត្រូវលះបង់អធិបតេយ្យខាងផ្នែកសេដ្ឋកិច្ច ទៅឲ្យអឺរ៉ុបគ្រប់គ្រងទាំងស្រុង។
នៅអឺរ៉ុប ក៏ដូចជា នៅតាមបណ្តាប្រទេសផ្សេងៗទៀតដែរ អធិបតេយ្យ គឺជាបញ្ហាដ៏រសើបបំផុត។ តើប្រទេសជាសមាជិកតំបន់អឺរ៉ូពិតជាសុខចិត្តលះបង់អធិបតេយ្យរបស់ខ្លួនទៅឲ្យស្ថាប័នអឺរ៉ុបដែរឬទេ? តើប្រជាពលរដ្ឋនៅតាមប្រទេសសមាជិកនីមួយៗសុខចិត្តឬទេ?
ទោះជាយ៉ាងណា អ្នកជំនាញខាងសេដ្ឋកិច្ចស្ទើរតែគ្រប់គ្នា សុទ្ធតែយល់ថា សហភាពអឺរ៉ុបមិនអាចបន្តអនុវត្តយន្តការបច្ចុប្បន្ននេះបានទេ។ ប្រទេសសមាជិកអឺរ៉ុបចាំបាច់ត្រូវតែជ្រើសរើសផ្លូវដើរមួយ៖ ឬមួយ លះបង់អធិបតេយ្យមួយផ្នែក ហើយបង្កើតជារដ្ឋបាលសេដ្ឋកិច្ចរួម ឬមួយ ចែកផ្លូវគ្នាដើរត្រឹមនេះ ហើយវិលត្រឡប់ទៅចាយលុយជាតិរៀងៗខ្លួនវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ