ប្រធានធនាគារពិភពលោក៖វិបត្តិសេដ្ឋកិច្ចដែលនឹងធ្វើឲ្យភូមិសាស្រ្តនយោបាយផ្លាស់ប្តូរ
ការធ្លាក់ចុះចំណាត់ថ្នាក់សេដ្ឋកិច្ចអាមេរិក និងភាពវឹកវរនៅទីផ្សារមូលបត្រ បានធ្វើឲ្យប្រធានធនាគារពិភពលោក បានបង្ហាញពីគំនិតទុទិ្ទដ្ឋិនិយមទៅលើអនាគតសេដ្ឋកិច្ចពិភពលោក។ នៅក្នុងបទសម្ភាសន៍ជាមួយទស្សនាវដ្តីអូស្ត្រាលី Weekend Austraian នៅថ្ងៃសៅរ៍ម្សិលមិញ លោក Robert Zoellick បានទាញសញ្ញាប្រកាសអាសន្ន ដោយបានលើកឡើងពីដំណើរសេដ្ឋកិច្ចពិភពលោក ឈានចូលទៅក្នុងស្ថានភាពគ្រោះថ្នាក់។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១១
សម្រាប់ប្រធានធនាគារពិភពលោក សេដ្ឋកិច្ចពិភពលោកបច្ចុប្បន្នគ្រាន់តែស្ថិតនៅក្នុងដំណាក់កាលដំបូងនៃខ្យល់ព្យុះសង្ឃរាថ្មី ប៉ុណ្ណោះ ហើយវាក៏កំពុងតែឈានចូលបន្តិចម្តងៗ ទៅក្នុងស្ថានភាពដ៏គ្រោះថ្នាក់មួយ។ វិបត្តិសេដ្ឋកិច្ចលើកនេះ គឺខុសពីវិបត្តិសេដ្ឋកិច្ចសកល ឆ្នាំ ២០០៨។ លោកRobert Zoellick វាយតម្លៃថា ក្នុងរយៈពេល ប្រហែល ១៥ថ្ងៃ គេនឹងឃើញ ការរីកចម្រើនសេដ្ឋកិច្ច នៅក្នុងប្រទេសរីកលូតលាស់ថ្មី ដូចជាចិន និងអូស្ត្រាលីជាដើម ប៉ុន្តែ ក្នុងប្រទេសអភិវឌ្ឍដូចជា អាមេរិក និងអឺរ៉ុប វិញ គេនឹងឃើញដំណើររារែក ដោយសារតែវិបត្តិប្រាក់បំណុល។
ប្រធានធនាគារពិភពលោកបានព្រមានទុកមុនរួចហើយថា គេត្រូវដោះស្រាយវិបត្តិប្រាក់បំណុលនៅអឺរ៉ុប ឲ្យបានឆាប់រហ័សបំផុត ជាពិសេសបំណុលរបស់ក្រិក និងរបស់អេស្ប៉ាញ បើមិនដូច្នោះទេ មិនមែនតែសេដ្ឋកិច្ចរបស់ប្រទេសក្នុងតំបន់អឺរ៉ូដែលត្រូវគំរាមកំហែង សូម្បីតែប្រាក់អឺរ៉ូក៏អាចប្រឈមនឹងការរលាយបាត់មុខដែរ។
បើតាមគំនិតរបស់ប្រធានធនាគារពិភពលោកមានតែនយោបាយរឹតត្បិត និងការបង្កើនពន្ធដែលជាដំណោះស្រាយចាំបាច់ និងបន្ទាន់ដើម្បីស្រោចស្រង់អឺរ៉ុប។ សេដ្ឋកិច្ចអឺរ៉ុបដែលដើរតួនាទីសំខាន់ មួយដែរក្នុងការរក្សាលំនឹងសេដ្ឋកិច្ចពិភពលោក។
ម្យ៉ាងវិញទៀត ក្រៅតែពីផលប៉ះពាល់លើផ្នែកហិរញ្ញវត្ថុ លោក Robert Zoellickបានកត់សំគាល់ថា វិបត្តិសេដ្ឋកិច្ចនឹងធ្វើឲ្យមានការប្រែប្រួល ក្រឡាប់ចាក់ខ្លាំងខាងផ្នែកភូមិសាស្រ្តនយោបាយ នោះគឺ អំណាចនិងឥទ្ធិពលរត់ពីប្រទេសលោកខាងលិច ទៅនៅតំបន់អាស៊ី ជាពិសេសនៅប្រទេសចិន។ ចក្ខុប្រវត្តិសាស្ត្រនឹងផ្លាស់ប្តូរទាំងស្រុង បន្ទាប់ពីអំណាចសេដ្ឋកិច្ចធ្លាក់ពីដៃអាមេរិក និងអឺរ៉ុប ទៅនៅមហាអំណាចចិន។
ចិនពេលនេះកំពុងជួបបញ្ហាក្នុងស្រុក ដូចជាអតិផរណា ការផ្លាស់ប្តូរប្រព័ន្ធពន្ធអាករ ការបំពុលបរិស្ថាន និងការរក្សាលំនឹងហិរញ្ញវត្ថុរវាងសហគ្រាសរដ្ឋ និងក្រុមហ៊ុនឯកជនមិនទាន់អាចទទួលយកអំណាចឥទ្ធិពលមកគ្រប់គ្រងភ្លាមៗទេ។ ប៉ុន្តែ គេបានប្រមាណថា ពីពេលនេះ ដល់ឆ្នាំ ២០៥០ ប្រសិនបើចិន នៅបន្តមានកំណើនសេដ្ឋកិច្ច ហើយប្រទេសលោកខាងលិចនៅបន្តជួបបញ្ហាវិបត្តិបំណុល និងការដើរថយក្រោយសេដ្ឋកិច្ច នោះមិនយូរ មិនឆាប់ ចិននឹងចូលទៅជំនួសអាមេរិក ក្នុងតំណែងជាមហាអំណាចសេដ្ឋកិច្ចពិភពលោកទីមួយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ