សហជីព៖ កម្មករ ផ្ទុះកូដកម្ម ច្រើនកន្លែងប្រឆាំងនឹងការសម្រេចតម្លើងប្រាក់ខែតិចតួច
រហូតដល់ព្រឹកថ្ងៃពុធ ទី២៥ ខែធ្នូនេះ ក្រុមកម្មកររោងចក្រកាត់ដេររាប់ម៉ឺននាក់ បានបន្តកូដកម្ម នៅច្រើនកន្លែងផ្សេងទៀត នៅតាមបណ្តារោងចក្រជាច្រើននៅភ្នំពេញ ខេត្តកំពង់ស្ពឺ កំពង់ចាម កំពង់ឆ្នាំង ខេត្តស្វាយរៀង និងនៅកន្លែងផ្សេងៗទៀត។ កម្មករ តវ៉ាបិទផ្លូវ នៅថ្ងៃនេះ ដើម្បីប្រឆាំងនឹងសេចក្តីសម្រេចតម្លើងប្រាក់ខែត្រឹមតែ ៩៥ ដុល្លារ នៅឆ្នាំ២០១៤។ ក្រុមសហជីព និងកម្មករ អ្នកតវ៉ា ទាមទារឲ្យមានការចរចាឡើងវិញ និងទារតម្លើងប្រាក់ខែ ពី ៨០ ដុល្លារ ទៅ ១៦០ដុល្លារ នៅឆ្នាំ២០១៤ តែម្តង។
ចុះផ្សាយនៅថ្ងៃ៖
មេដឹកនាំសហជីពកម្មករ លោក អាត់ ធន់ បានឲ្យដឹងថា គិតត្រឹមព្រឹកថ្ងៃទី២៥ ខែធ្នូ ឆ្នាំ២០១៣ មានកម្មកររោងចក្ររាប់ម៉ឺននាក់ បានបន្តធ្វើកូដកម្ម នៅច្រើនកន្លែងផ្សេងៗគ្នា ប្រឆាំងនឹងការតម្លើងប្រាក់ខែកម្មកររោងចក្រ ដែលគេចាត់ទុកថា មានចំនួនតិចតួច។
តាមលោកអាត់ធន់ កូដកម្មទាំងនោះ បានផ្ទុះឡើងនៅភ្នំពេញ តាមបណ្តារោងចក្រ នៅទួលសង្កែ ចាក់អង្រែ តំបន់ទ្រុងមាន់ អូរបែកក្អម នៅចោមចៅ និងនៅកាណាឌីយ៉ា ជាដើម។ កូដកម្មរបស់កម្មកររាប់ពាន់នាក់ផ្សេងទៀត នៅថ្ងៃនេះ ក៏កើតមានផងដែរ នៅខេត្តកំពង់ស្ពឺ កំពង់ចាម និងនៅខេត្តស្វាយរៀង។
លោក អាត់ ធន់ បានបញ្ជាក់ថា សហជីពធំៗ ដែលបានថ្លែងការណ៍ជំទាស់នឹងការតម្លើងប្រាក់ខែកម្មកររោងចក្រ កាលពីថ្ងៃទី២៤ធ្នូ គឺរហូតដល់ព្រឹកថ្ងៃទី២៥ធ្នូនេះ មិនទាន់បានកំនត់ថ្ងៃ ដើម្បីដឹកនាំបាតុកម្មតវ៉ានៅឡើយទេ។ ប៉ុន្តែការតវ៉ារបស់កម្មករនៅពេលនេះ ចេញពីទឹកចិត្តរបស់កម្មករនិមួយៗ ដើម្បីទាមទារឲ្យមានការជជែកចរចាឡើងវិញ ឲ្យឡើងដល់ ១៦០ ដុល្លារ នៅឆ្នាំ២០១៤។
មន្ត្រីរដ្ឋាភិបាល លោក វង្ស សុវណ្ណ ដែលទទួលបន្ទុកខាងដោះស្រាយជម្លោះបាតុកម្មកូដកម្ម របស់ក្រសួងការងារ មិនទាន់ដឹងថា ក្រសួង និងថៅកែរោងចក្រ យល់ព្រមប្រជុំចរចាជាថ្មី លើការកំណត់តម្លើងប្រាក់ខែកម្មកររោងចក្រ ដូចការទាមទារ ឬយ៉ាងណាទេ។ ប៉ុន្តែលោកថា ការសម្រេចតម្លើងប្រាក់ខែដល់កម្មករ កាលពីថ្ងៃទី២៤ធ្នូ ជារូបមន្តល្អ ហើយបើទាមទារឡើងដល់ ១៦០ ដុល្លារ ឬឡើង ១០០% នោះ ជាការទាមទារខ្ពស់ពេក ដែលថៅកែ មិនអាចទៅរួចទេ។
ចំពោះមុខការមិនពេញចិត្ត និងកូដកម្មតវ៉ាដូច្នេះ ក្រសួងការងារ កាលពីរសៀលថ្ងៃទី២៤ធ្នូម្សិលមិញ បានចេញសេចក្តីអំពាវនាវ ដល់កម្មករ និងសហជីព សូមមេត្តារក្សាភាពស្ងប់ស្ងាត់ និងបន្តការងារជាធម្មតា ជៀសវាងការធ្វើសកម្មភាពណាមួយ ដែលអាចធ្លាក់ក្នុងអន្ទាក់នយោបាយ ធ្វើឲ្យខាតបង់ប្រយោជន៍របស់កម្មករ ក៏ដូចជា ប្រទេសជាតិទាំងមូល។
តាមក្រសួងការងារ លទ្ធផលនៃការចរចាតម្លើងប្រាក់ខែកម្មករ កាលពីថ្ងៃទី២៤ធ្នូ ជាកិច្ចខិតខំប្រឹងប្រែងរបស់រដ្ឋាភិបាល និងភាគីពាក់ព័ន្ធទាំងអស់ ដើម្បីការពារផលប្រយោជន៍របស់បងប្អូនកម្មករ និងរក្សាដំណើរការរោងចក្រ ព្រមទាំងជំរុញការអភិវឌ្ឍប្រទេសជាតិយើងផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ