រដ្ឋសភាអាណត្តិទី៥ បើកកិច្ចប្រជុំពេញអង្គលើកដំបូងដោយគ្មានបក្សប្រឆាំង
ដូចការគ្រោងទុក រដ្ឋសភាអាណត្តិទី៥បានបើកកិច្ចប្រជុំលើកដំបូងនៅថ្ងៃទី ១២ វិច្ឆិកានេះ។ សម័យប្រជុំពេញអង្គលើកដំបូងនៃរដ្ឋសភាឯកបក្សនេះបានពិភាក្សា និងអនុម័តសេចក្តីព្រាងច្បាប់ស្តីពីការបង្កើតក្រសួងមុខងារសាធារណៈ និងច្បាប់ស្តីពីការបំបែកក្រសួងឧស្សាហកម្មរ៉ែ និងថាមពលជាពីរ។ ចំណែកច្បាប់ស្តីពីថវិកាឆ្នាំ ២០១៤ ត្រូវបានលើកយកទៅពិភាក្សាក្រោយគេ។ កិច្ចប្រជុំសភាថ្ងៃនេះក៏មានវត្តមានលោកនាយករដ្ឋមន្ត្រី ហ៊ុន សែន ផងដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
តំណាងរាស្ត្រ ៦៦ នាក់មកពីគណបក្សប្រជាជនកម្ពុជាបានចូលរួមពិភាក្សាអនុម័តសេចក្តីព្រាងច្បាប់មួយចំនួននៅព្រឹកថ្ងៃអង្គារនេះ។ សេចក្តីព្រាងច្បាប់ដែលរដ្ឋសភាលើកមកពិភាក្សា និងអនុម័តនៅថ្ងៃនេះរួមមានសេចក្តីព្រាងច្បាប់ស្តីពីការបង្កើតក្រសួងថ្មីចំនួន៣ និងសេចក្តីព្រាងច្បាប់ស្តីពីថវិការជាតិឆ្នាំ ២០១៤ ។
ក្រសួងថ្មីទាំងបីដែលរដ្ឋាភិបាលអាណត្តិទី៥សម្រេចបង្កើតនោះរួមមានក្រសួងមុខងារសាធារណៈ និងក្រសួងពីរទៀតកើតចេញពីបំបែកក្រសួងឧស្សាហកម្ម រ៉ែ និងថាមពលឲ្យទៅជាក្រសួងឧស្សាហកម្ម និងសិប្បកម្ម និងក្រសួងរ៉ែ និងថាមពល។ ចំណែកឯសេចក្តីព្រាងច្បាប់ស្តីពីថវិកាជាតិឆ្នាំ ២០១៤ ត្រូវបានលើកមកពិភាក្សាក្រោយគេបន្ទាប់ពីសេចក្តីព្រាងច្បាប់ស្តីពីការបង្កើតក្រសួងត្រូវបានអនុម័តរួចរាល់។
កួរបញ្ជាក់ថា កិច្ចប្រជុំសភាពេញអង្គព្រឹកនេះដឹកនាំដោយ លោក ហេង សំរិន ប្រធានរដ្ឋសភា និងដោយមានវត្តមានចូលរួមរបស់លោកនាយករដ្ឋមន្ត្រី ហ៊ុន សែន ផងដែរ។
ប៉ុន្តែ តំណាងរាស្ត្រគណបក្សសង្គ្រោះជាតិ ៥៥ នាក់នៅតែបន្តធ្វើពហិការមិនចូលប្រជុំសភាដដែល។ កិច្ចប្រជុំសភាឯកបក្សបានប្រព្រឹត្តទៅដោយគ្មានទំនាស់ផ្លូវច្បាប់ទេពីព្រោះសេចក្តីព្រាងច្បាប់ទាំងឡាយនេះអាចអនុម័តដោយត្រូវការសំឡេងភាគច្រើនដាច់ខាតឬស្មើនឹង ៥០ ភាគរយបូកមួយតែប៉ុណ្ណោះ។
យ៉ាងណាក៏ដោយ ពហិការមិនចូលរដ្ឋសភារបស់បក្សប្រឆាំងបានបង្ហាញពីការបែកបាក់នយោបាយ និងបានធ្វើឲ្យរដ្ឋសភាដំណើរការមិនបានពេញលេញទេ។ គណបក្ស ជាប់ឆ្នោតទាំងពីរដែលព្យាយាមរកដំណោះស្រាយនយោបាយជាមួយគ្នានោះបានជួបនឹងបរាជ័យនៅក្នុងជំនួបចរចាថ្នាក់បច្ចេកទេសជាន់ខ្ពស់កាលពីថ្ងៃ៥វិច្ឆិកា។
រីឯការសន្យាថានឹងជួបគ្នាជាថ្មីកាលពីចុងសប្តាហ៍កន្លងទៅក៏នៅមិនទាន់កើតមានដែររហូតមកទល់ថ្ងៃនេះ។ ទោះជាយ៉ាងនេះក្តី រដ្ឋសភា និងរដ្ឋាភិបាលដែលមានតែគណបក្សប្រជាជនកម្ពុជាម្នាក់ឯងនៅតែដំណើរការទៅមុខដោយមិនរង់ចាំដំណោះស្រាយនយោបាយទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ