ក្រុងព្យុងយ៉ាងត្រៀមខ្លួនឈប់ផ្គើនក្រុងសេអ៊ូល មុនទស្សនកិច្ចប្រធានាធិបតីចិននៅកូរ៉េខាងត្បូង
ក្រោយបានបាញ់មីស៊ីលបាល់លិសស្ទិករយៈចំងាយខ្លី នៅភាគខាងកើតប្រទេសម្សិលមិញ នៅថ្ងៃចន្ទនេះ រដ្ឋាភិបាលកូរ៉េខាងជើងបានស្នើទៅកូរ៉េខាងត្បូង អោយបញ្ឈប់ការជេរប្រមាថផ្គើនគ្នា បញ្ឈប់ការបាញ់គ្រាប់ពិត នៅតាមព្រំដែនរវាងកូរ៉េទាំង២។ កូរ៉េខាងជើងបានប្រកាសថា ខ្លួនត្រៀមព្យួរសកម្មភាពផ្គើន ចាប់ពីថ្ងៃសុក្រខាងមុខនេះហើយ។ មេដឹកនាំគឹម ជុងអ៊ុនប្រហែលចង់បង្ហាញប្រធានាធិបតីចិន ដែលត្រូវបំពេញទស្សនកិច្ចនៅក្រុងសេអ៊ូល ថ្ងៃ៣កក្កដានេះ ថាកូរ៉េខាងជើងចង់បានសន្តិភាពជាមួយកូរ៉េខាងត្បូង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤២
កូរ៉េខាងជើងទើបបានប្រើធម៌ក្តៅ បាញ់មីស៊ីលរយៈចំងាយខ្លី២ដើម កាលពីថ្ងៃអាទិត្យម្សិលមិញ កំញ៉ើញប្រធានាធិបតីចិនស៊ី ជីនពីង ដែលបានជ្រើសយកក្រុងសេអ៊ូលបំពេញទស្សនកិច្ច មុនក្រុងព្យុងយ៉ាង។ តែថ្ងៃចន្ទនេះ មេដឹកនាំគឹម ជុងអ៊ុន បានបន្ទន់ឥរិយាបថខ្លួនមកវិញ ដោយបានអំពាវនាវស្នើកូរ៉េខាងត្បូងអោយឈប់ជេរប្រមាថ បញ្ឈប់រាល់សកម្មភាពផ្គើន សកម្មភាពយោធានានា មានដូចជាការបាញ់គ្រាប់ពិតតាមព្រំដែនទឹករវាងកូរ៉េទាំង២ នៅ សមុទ្រលឿងផងដែរ។
គណៈកម្មការការពារជាតិកូរ៉េខាងជើង ជាផ្នែកយោធាជាន់ខ្ពស់បំផុតរបស់រដ្ឋាភិបាលក្រុងព្យុងយ៉ាង បានប្រកាសបំណងល្អ ចង់បានសន្តិភាពនេះ ដោយបានសន្យាថា កូរ៉េខាងជើងត្រៀមព្យួររាល់សកម្មភាពផ្គើន លើកូរ៉េខាងត្បូង ចាប់ពីថ្ងៃសុក្រនេះហើយ។ កូរ៉េខាងជើងក៏ជំរុញកូរ៉េខាងត្បូងអោយបញ្ឈប់សមយុទ្ធយោធា ជាមួយអាមេរិក ដែលត្រូវរៀបចំធ្វើនៅខែសីហាខាងមុខនេះដែរ ដើម្បីបង្កបរិយាកាសល្អប្រសើរដល់ការប្រកួតកីឡាអាស៊ាន ដែលត្រូវធ្វើនៅកូរ៉េខាងត្បូង ក្នុងខែកញ្ញាឆ្នាំ២០១៤នេះ។ ក្រុងព្យុងយ៉ាងសន្យាបញ្ជូនកីឡាករខ្លួនទៅចូលរួមប្រកួតនៅកូរ៉េខាងត្បូងដែរ។
ការប្តូរជំហរពីបាញ់មីស៊ីល មកគាំទ្រសន្តិភាព បញ្ជាក់ច្បាស់ថា មេដឹកនាំកូរ៉េខាងជើងចង់ទាក់ទាញចំណាប់អារម្មណ៍របស់ប្រធានាធិបតីចិន ស៊ី ជីនពីង ដែលត្រូវទស្សនកិច្ចក្រុងសេអ៊ូលនៅថ្ងៃព្រហស្បតិ៍ និងថ្ងៃសុក្រ ក្នុងសប្តាហ៍នេះ។ ទោះជាលោកស៊ី ជីនពីង មិនដែលបានជួបមុខមេដឹកនាំគឹម ជុងអ៊ុន ក៏លោកបានសម្រេចទស្សនកិច្ចក្រុងសេអ៊ូល មុនក្រុងព្យុងយ៉ាងដែរ ប្រហែលដោយសារតែលោកមិនពេញចិត្តនឹងសកម្មភាពនិងឥរិយាបថឥតព្រាងទុករបស់រដ្ឋាភិបាលក្រុងព្យុងយ៉ាង។ ជាក់ស្តែង កន្លងមក កូរ៉េខាងជើងតែងប្រតិកម្មបាញ់មីស៊ីល ករណីកូរ៉េខាងត្បូងប្រើពាក្យសំដីផ្គើនណាមួយ រឺក៏ពេលកូរ៉េខាងត្បូងធ្វើសមយុទ្ធយោធារួមគ្នាជាមួយអាមេរិក។ ក្រៅពីការបាញ់មីស៊ីលអន្តរទ្វីប២ដើម នៅថ្ងៃអាទិត្យម្សិលមិញ ក្នុងសប្តាហ៍កន្លងទៅនេះ ក្រុងព្យុងយ៉ាងក៏បានបាញ់មីស៊ីលច្រើនដើមផ្សេងទៀត តំរង់ទៅសមុទ្រដែរ៕
នៅថ្ងៃចន្ទនេះដែរ កូរ៉េខាងជើងបានប្រកាសថា អ្នកទេសចរពលរដ្ឋអាមេរិក២រូប ដែលអាជ្ញាធរក្រុងព្យុងយ៉ាងចាប់ខ្លួន កាលពីខែមេសា នឹងត្រូវឡើងសវនាការកាត់ទោស។ ពួកគេជាប់ចោទពីបទបង្កសកម្មភាពប្រឆាំងរដ្ឋាភិបាលកូរ៉េខាងជើង។ បច្ចុប្បន្ននេះ កូរ៉េខាងជើងមានអ្នកទោសអាមេរិកក្នុងដៃ៣រូប។ អ្នកវិភាគនានាគិតថា កូរ៉េខាងជើងយកសំណុំរឿងអ្នកទោសទាំងនេះ ដាក់សម្ពាធលើអាមេរិក ដើម្បីជំរុញអោយមានការចរចាក្រុម៦ប្រទេសឡើងវិញ។ ការចរចានេះមានទិសដៅអោយក្រុងព្យុងយ៉ាងបញ្ឈប់សកម្មភាពនុយក្លេអ៊ែរ ជាការដោះដូរជាមួយជំនួយសេដ្ឋកិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ