កូរ៉េខាងត្បូង-ចិន

ប្រធានាធិបតីចិននឹងទៅបំពេញទស្សនកិច្ច នៅកូរ៉េខាងត្បូង

យោងតាមអ្នកនាំពាក្យរដ្ឋាភិបាលចិន និងកូរ៉េខាងត្បូង លោកប្រធានាធិបតីចិន ស៊ី ជីនពីងនឹងអញ្ជើញទៅបំពេញទស្សនកិច្ចលើកដំបូងនៅប្រទេសកូរ៉េខាងត្បូង រយៈពេល២ថ្ងៃ គឺថ្ងៃទី៣ និងទី៤ កក្កដា ខាងមុខនេះ។ នេះជាដំណើរទស្សនកិច្ចលើកទីមួយរបស់លោកប្រធានាធិបតីចិននៅលើឧបទ្វីបកូរ៉េ។ ជាងនេះទៅទៀត ចិនបានផ្តល់អាទិភាពដល់កូរ៉េខាងត្បូង ដោយទៅធ្វើទស្សនកិច្ចនៅប្រទេសនេះមុន ហើយទុកកូរ៉េខាងជើងចោលមួយអន្លើ។

ចុះផ្សាយនៅថ្ងៃ៖ 27/06/2014 - 16:19កែប្រែថ្ងៃទី៖ 28/06/2014 - 09:38

ដោយ៖ ម៉ម ពិសី

ផ្សាយពាណិជ្ជកម្ម

នៅថ្ងៃទី៣កក្កដាខាងមុខ លោកប្រធានាធិបតីចិន ស៊ី ជីនពីង នឹងអញ្ជើញទៅដល់ទីក្រុងសេអ៊ូល ក្រោមការទទួលស្វាគមន៍ពីសំណាក់លោកស្រីប្រធានាធិបតីកូរ៉េខាងត្បូង ប៉ាក់ គុនហេ។ ដំណើរទស្សនកិច្ចនេះធ្វើឡើង ដើម្បីឆ្លើយតបទៅវិញ ក្រោយការអញ្ជើញទៅទស្សនកិច្ចនៅក្រុងប៉េកាំងរបស់លោកស្រីប្រធានាធិបតីកូរ៉េខាងត្បូង កាលពីខែមិថុនា ឆ្នាំទៅ។ បើតាមអ្នកនាំពាក្យរដ្ឋាភិបាលកូរ៉េខាងត្បូង ប្រមុខរដ្ឋទាំងពីរនឹងពិភាក្សាគ្នាអំពីកម្មវិធីនុយក្លេអ៊ែររបស់កូរ៉េខាងជើង។

តាំងពីដើមមក គេចាំមិនភ្លេចទេថា ចិន និងកូរ៉េខាងជើងជាបងប្អូនម៉ឺនឆ្នាំនឹងគ្នា ប្តូរស្លាប់ប្តូររស់។ កាលពីជំនាន់សង្គ្រាមកូរ៉េឆ្នាំ១៩៥០ កងទ័ពចិនរបស់សេនាប្រមុខ ម៉ៅ សេទុង បានស្ម័គ្រជួយច្បាំងកូរ៉េខាងជើង ដើម្បីការពារលទ្ធិកុម្មុយនីស្ត។ ប៉ុន្តែពេលនេះ ចិនបានងាកទៅប្រាស្រ័យជាមួយកូរ៉េខាងត្បូងវិញ ដោយលោកប្រធានាធិបតី ស៊ី ជីនពីង ដែលមិនទាន់បានទៅជួបផ្ទាល់ជាមួយមេដឹកនាំកូរ៉េខាងជើងថ្មីផង បែរជាឈានជើងទៅជាន់ទឹកដីកូរ៉េខាងត្បូងមុន។ តាមពិតទៅ ទំនាក់ទំនងរវាងចិន និងកូរ៉េខាងជើងបានជួបភាពល្អក់កករចាប់តាំងពីឆ្នាំ២០១២ ដែលកាលណោះ កូរ៉េខាងជើងបានធ្វើការសាកល្បងអាវុធនុយក្លេអ៊ែរ និងបាញ់កាំជ្រួចមីស៊ីល ដែលធ្វើឲ្យចិនមិនសប្បាយចិត្ត និងព្រួយបារម្ភពីសុវត្ថិភាពរបស់ខ្លួន។

តាមការវិភាគ ទស្សនកិច្ចនេះហាក់ដូចជាការផ្ញើសារទៅដល់កូរ៉េខាងជើង ដែលថាចិនលែងជាមិត្តចិត្តមួយថ្លើមមួយ ជាមួយរបបកុម្មុយនីស្តផ្តាច់ការកូរ៉េខាងជើង ដូចមុនទៀតហើយ។

យ៉ាងណាមិញ ទស្សនកិច្ចរបស់ប្រធានាធិបតីចិននៅកូរ៉េខាងត្បូង ក៏ធ្វើឡើងក្នុងហេតុផលសេដ្ឋកិច្ចដែរ។ កូរ៉េខាងត្បូងជាដៃគូសេដ្ឋកិច្ចដ៏សំខាន់របស់ចិន។ បើប្រៀបធៀបជាមួយកូរ៉េខាងជើង ទំនាក់ទំនងពាណិជ្ចកម្មរវាងចិន និងកូរ៉េខាងត្បូង មានលើស ដល់ទៅ៤០ដងឯណោះ។ ដូច្នេះជារឿងធម្មតាទេដែលពេលនេះចិនងាកទៅល្អូកល្អឺនជាមួយកូរ៉េខាងត្បូងវិញ៕