ការពន្យារកំណើតឥតបង់ប្រាក់៖ តុលាការហ្វីលីពីនទាត់ចោលបណ្តឹងរបស់វិហារកាតូលិក
នៅហ្វីលីពីនថ្ងៃអង្គារនេះ តុលាការកំពូលបានទាត់ចោលបណ្តឹងរបស់វិហារកាតូលិក ដែលបានសុំអោយតុលាការកាត់ផ្តាច់សុពលភាពនៃច្បាប់ដែលអនុញ្ញាតអោយប្រជាជនក្រីក្របានទទួលការពន្យារកំណើតដោយឥតបង់ប្រាក់កាស។ អង្គការសហប្រជាជាតិបានស្វាគមន៍ការសម្រេចរបស់តុលាការកំពូលហ្វីលីពីន និងបានគាំទ្រក្រុងម៉ានីលក្នុងការអនុវត្តន៍ច្បាប់នេះអោយបានពេញលេញទៀតផង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៣៤
នៅថ្ងៃអង្គារនេះ តុលាការកំពូលហ្វីលីពីនបានសម្រេចទាត់ចោលបណ្តឹងរបស់វិហារកាតូលិក ដែលបានសុំអោយតុលាការបដិសេធផ្តល់សុពលភាពដល់ច្បាប់អនុញ្ញាតអោយប្រជាជនក្រីក្រទទួលបានការពន្យារកំណើតដោយឥតគិតថ្លៃនោះ។ លោក ថេអូដរ តេ ជាអ្នកនាំពាក្យរបស់តុលាការ បានលើកឡើងថា ច្បាប់នេះគ្មានលក្ខណៈប្រឆាំងរដ្ឋធម្មនុញ្ញហ្វីលីពីននោះ ទេ។ មេធាវីនានារបស់វិហារកាតូលិកហ្វីលីពីននឹងធ្វើការពិនិត្យពីផ្លូវដោះស្រាយផ្សេងទៀតសម្រាប់បណ្តឹងរបស់វិហារកាតូលិក។
គួររំលឹកថា ច្បាប់គ្រប់គ្រងអត្រាកំណើត ត្រូវបានប្រធានាធិបតីបេនីញ៉ូ អាគីណូ ប្រកាសអោយប្រើកាលពី ខែធ្នូឆ្នាំ២០១២។ ច្បាប់នេះមានទិសដៅជួយសម្រួលប្រជាជនក្រីក្រទាំងឡាយអោយទទួលបានការពន្យារកំណើតដោយឥតបង់ប្រាក់កាសអ្វីទាំងអស់។ ច្បាប់នេះតំរូវអោយមណ្ឌលសុខភាពក្នុងស្រុកនានា ផ្តល់ស្រោមអនាម័យ និងថ្នាំពន្យារកំណើតដោយឥតគិតថ្លៃដល់ប្រជាជន។ ច្បាប់នេះហាមឃាត់ការពន្លូតកូន ប៉ុន្តែខ្លឹមសារច្បាប់ជួយសំរួលអោយមានការថែទាំដល់ស្ត្រីក្រោយពេលពន្លូតកូនរួច។
ច្បាប់គ្រប់គ្រងអត្រាកំណើតហ្វីលីពីន ត្រូវបានព្យួរចោលកាលពីដើមឆ្នាំ២០១៣កន្លងទៅ ដោយសារតែវិហារកាតូលិកបានដាក់ពាក្យប្តឹងអោយតុលាការកាត់ផ្តាច់សុពលភាពច្បាប់នេះ។ គួររំលឹកថា ប្រជាជនហ្វីលីពីនកាន់សាសនាកាតូលិក។ ប៉ុន្តែ យោងតាមការស្ទាបស្ទង់មតិមួយនៅពេលថ្មីៗនេះ ប្រជាជនហ្វីលីពីន៧២ភាគរយ ពេញចិត្តច្បាប់គ្រប់គ្រងអត្រាកំណើតរបស់រដ្ឋាភិបាល។ ពួកគេយល់ថា ច្បាប់នេះមានសារៈសំខាន់ក្នុងការប្រយុទ្ធនឹងភាពក្រីក្រ និងអាចបន្ថយអត្រាកំណើតក្នុងស្រុកបាន។
ជាទូទៅ ស្ត្រីហ្វីលីពីនម្នាក់ អាចមានកូនប្រមាណជាង៣នាក់។ យោងតាមតួលេខអង្គការមនុស្សធម៌ មែរលីន Merlin របស់អង់គ្លេស នៅហ្វីលីពីន រៀងរាល់ថ្ងៃ ស្ត្រីជាម្តាយ១៥នាក់ បានបាត់បង់ជីវិត ក្រោយពេលសម្រាលកូនរួច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ