អង្គការសហប្រជាជាតិ អាមេរិក អ៊ីរ៉ង់ថ្កោលទោសការកាត់ទោសប្រហារជីវិតនៅអេហ្ស៊ីប
នៅថ្ងៃអង្គារនេះ ផ្នែកការទូតអ៊ីរ៉ង់បានព្រមានអេហ្ស៊ីបថា ការដែលអេហ្ស៊ីបបានសម្រេចដាក់ទោសប្រហារជីវិតដល់សកម្មជនបក្សភាតរអ៊ីស្លាមជិត៧០០នាក់ កាលពីថ្ងៃចន្ទនោះ អាចនឹងធ្វើអោយសត្រូវទាំងឡាយរបស់អេហ្ស៊ីបបង្កសកម្មភាពជំរុញអោយអេហ្ស៊ីបកាន់តែជួបស្ថានភាពដុនដាបថែមទៀត។ កាលពីថ្ងៃចន្ទ តុលាការអេហ្ស៊ីបបានសម្រេចកាត់ទោសអោយសកម្មជនភាតរអ៊ីស្លាមរបស់អតីតប្រធានាធិបតីមរស៊ី ទទួលទោសប្រហារជីវិត។ សហគមន៍អន្តរជាតិបានប្រតិកម្មថ្កោលទោសចំពោះការកាត់ទោសនេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៩
កាលពីថ្ងៃចន្ទ តុលាការអេហ្ស៊ីបបានសម្រេចកាត់ទោសសកម្មជនគាំទ្រអតីតប្រធានាធិបតីមរស៊ី ៦៨៣នាក់ អោយទទួលទោសប្រហារជីវិត ពីបទបានសម្លាប់ប៉ូលិសមួយរូប និងពីបទចូលទៅប៉ុស្តិ៍ប៉ូលិសមួយកន្លែង ដោយខុសច្បាប់ នៅភាគកណ្តាលប្រទេស កាលពីថ្ងៃ១៤សីហា ឆ្នាំ២០១៣។ ក្នុងចំណោមសកម្មជនទាំង៦៨៣នាក់ មានលោក ម៉ូហាមេដ បាឌី អគ្គមគ្គុទេសក៍ជាន់ខ្ពស់នៃបក្សភាតរអ៊ីស្លាម។ កាលពីខែមិនា តុលាការអេហ្ស៊ីបក៏ធ្លាប់បានកាត់ទោសអោយសកម្មជន៥២៩នាក់ ផ្សេងទៀត ទទួលទោសប្រហារជីវិត ពីបទចោទប្រកាន់នេះដូចគ្នាដែរ។
ការដាក់ទោសប្រហារជីវិតកាលពីថ្ងៃចន្ទ ត្រូវបានសហគមន៍អន្តរជាតិថ្កោលទោសយ៉ាងខ្លាំងក្លា។ នៅថ្ងៃអង្គារនេះ អ៊ីរ៉ង់ជាប្រទេសដែលគាំទ្រអតីតប្រធានាធិបតីអេហ្ស៊ីបមរស៊ី នោះ បានលើកឡើងថា ការសម្រេចទោសបែបនេះអាចបង្កផលវិបាកដល់នយោបាយនិងសង្គម ហើយអាចជំរុញអោយសត្រូវនានារបស់អេហ្ស៊ីបធ្វើសកម្មភាពរុញអោយស្ថានភាព អេហ្ស៊ីបកាន់តែដុនដាប។
អគ្គលេខាធិការអង្គការសហប្រជាជាតិ លោក បាន គីមូន ក៏បានបរិហារការកាត់ទោសនេះដែរថា មិនមែនជាការកាត់ទោសប្រកបដោយសមធម៌ទេ។ លោក ណាវី ពីឡាយ ជាបេសកជនជាន់ខ្ពស់ទទួលបន្ទុកសិទ្ធិមនុស្សនៃអង្គការសហប្រជាជាតិ បានថ្កោលទោសចំពោះការកាត់ទោសប្រហារជិវិតនេះ ដោយលើកឡើងថា វាជារឿងអាស្រូវ ដែលតុលាការខេត្តមីនយ៉ា អេហ្ស៊ីប ដាក់ទោសប្រហារជីវិតដល់ទៅ២លើក លើមនុស្សសន្ធឹកសន្ធាប់ តែក្នុងរយៈពេល២ខែប៉ុណ្ណោះ។
អាមេរិកក៏បានប្រតិកម្មទៅនឹងការកាត់ទោសនេះដែរ។ ក្រុងវ៉ាស៊ីនតោនបានទាមទារអោយអេហ្ស៊ីបលុបចោលទោសប្រឆាំងនឹងសកម្មជនភាតរអ៊ីស្លាមសរុប១២០០នាក់ ដែលតុលាការបានកាត់ទោសប្រហារជីវិតកន្លងមកនេះ។ អាមេរិកលើកឡើងថា ការកាត់ទោសប្រហារជីវិតជនជាប់ចោទ៦៨៣នាក់ កាលពីថ្ងៃចន្ទ វាមិនដើរស្របនឹងកាតព្វកិច្ចអេហ្ស៊ីបក្នុងការទទួលខុសត្រូវផ្នែកសិទ្ធិមនុស្សទេ។ អាមេរិកជំរុញអោយអេហ្ស៊ីបទទួលស្គាល់ថា ការបង្ក្រាបបាតុកម្មតវ៉ាដោយសន្តិភាពក្នុងស្រុក គឺជាទង្វើដែលរឹតតែជំរុញអោយអេហ្ស៊ីបរងអស្ថិរភាពសន្តិសុខបន្ថែមទៀត។
នៅល្ងាចថ្ងៃចន្ទ ស្ថានទូតអេហ្ស៊ីបប្រចាំនៅក្រុងវ៉ាស៊ីនតោន បានឆ្លើយតបទៅអាមេរិកវិញថា តុលាការអេហ្ស៊ីបជាតុលាការឯករាជ្យ ហើយការកាត់ទោសនេះក៏ប្រហែលជាអាចត្រូវប្តឹងទាស់ទៅសាលាឧទ្ធរណ៍បានទៀត។ ក្រោយមានប្រតិកម្មយល់ឃើញទាំងនេះ តុលាការអេហ្ស៊ីបបានសម្រេចយកថ្ងៃ២១មិថុនា ដើម្បីប្រកាសការវិនិច្ឆ័យទោសចុងក្រោយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ