សន្និសីទអន្តរជាតិក្នុងប្រទេសជប៉ុនដើម្បីនិយាយពីសុវត្ថិភាពនុយក្លេអ៊ែរ
នៅថ្ងៃសៅរ៍ ទី១៥ ធ្នូនេះ សន្និសីទអន្តរជាតិដើម្បីនិយាយពីសុវត្ថិភាពនុយក្លេអ៊ែរបានរៀបចំនៅក្នុងទីក្រុង Fukushima ប្រទេសជប៉ុន។ បណ្តារដ្ឋមន្រ្តី ក្រុមអ្នកតំណាងរដ្ឋាភិបាល និងក្រុមអ្នកឯកទេសមកពី ៥០ប្រទេស ព្រមទំាងអង្គការក្រៅរដ្ឋាភិបាលបានសហការណ៍គ្នាដើម្បីទាញយកមេរៀនពីគ្រោះមហន្តរាយនុយក្លេអ៊ែរនៅមជ្ឈមណ្ឌលនុយក្លេអ៊ែរ Fukushima កាលពីថ្ងៃទី ១១ មីនាឆ្នំា ២០១១។
ចុះផ្សាយនៅថ្ងៃ៖
ស្តាប់ - ០២:១៣
មហន្តរាយនុយក្លេអ៊ែរនៅមជ្ឈមណ្ឌល Fukushima កាលពីជាង ១ឆ្នំាមុន ពិតជាមេរៀនដ៏ល្វីញជូរចត់មួយដែលគ្មាននរណាចង់ឲ្យកើតមានជាថ្មីទៀតឡើយ។ អ៊ីចឹងហើយបានជាគោលដៅនៃសន្និសីទអន្តជាតិនៅថ្ងៃនេះ គឺដើម្បីពង្រឹងសុវត្ថិភាពនៃការសាងសង់នុយក្លេអ៊ែរ តាមរយៈការបែងចែកបទពិសោធន៍ និងចំណេះដឹងឲ្យគ្នាទៅវិញ ទៅមក។ ថ្លែងនៅក្នុងការបើកសន្និសីទ លោករដ្ឋមន្រ្តីក្រសួងកាបរទេសជប៉ុន Koichiro Gemba បានបញ្ជាក់ពីភាពចំាបាច់ក្នុងការទាញយកមេរៀនពីគ្រោះមហន្តរាយនុយក្លេអ៊ែរនៅមជ្ឈមណ្ឌល Fukushima កាលពីថ្ងៃទី ១១ មីនាឆ្នំា ២០១១ និងពីសារៈសំខាន់នៃកិច្ចសហប្រតិបត្តិការជាលក្ខណៈអន្តរជាតិដើម្បីធ្វើយ៉ាងណាកុំឲ្យព្រឹត្តការណ៍ថ្ងៃ ១១ មីនាកើតមានជាថ្មីម្តងទៀត។
ទន្ទឹមគ្នានេះ លោកប្រមុខការទូតជប៉ុនក៏បានរម្លឹកឡើងវិញថា ទោះបីជាគ្រោះមហន្តរាយបានកើតមានជិត ២ឆ្នំាក៏ដោយ ក៏ស្នាមរបួស និងក្តីឈឺចាប់កំពុងមាននៅក្នុងអារម្មណ៍របស់មនុស្សជាច្រើន។ យោងតាមលោក Gemba រដ្ឋាភិបាលជប៉ុនមានកតាព្វកិច្ចក្នុងការជួសជុលឡើងវិញនូវមជ្ឈមណ្ឌលនុយក្លេអ៊ែរ Fukushima ព្រមទំាងបំបាត់ឲ្យអស់នូវជាតិវិទ្យុសកម្មដែលនំាឲ្យប៉ះពាល់ដល់សុខភាពប្រជាជន ក៏ប៉ុន្តែ កិច្ចសហប្រតិបត្តិការជាលក្ខណៈអន្តរជាតិជារឿងមួយចំាបាច់ដោយខានមិនបាន។
លោក Yukiya Amano នាយកទីភ្នាក់ងារថាមពលអន្តរជាតិបានគូសបញ្ជាក់ថា ដំណើរការជួសជុលមជ្ឈមណ្ឌលនុយក្លេអ៊ែរ Fukushima កំពុងបន្តមាន តែការខូតខាតមានទំហំធំក្រៃលែង។ ចំណែកលោកស្រី Delphine Batho រដ្ឋមន្រ្តីក្រសួងបរិស្ថានបារំាងបានថ្លែងថា ការពង្រឹងសុវត្ថិភាពកម្រិតខ្ពស់ និងតម្លាភាពគឺជារឿងមួយចំាបាច់ដើម្បីអាចទទួលបានសេចក្តីទុកចិត្តពីប្រជាជនទាក់ទងនឹងបញ្ហាថាមពលនុយក្លេអ៊ែរ។ ក្នុងប្រទេសបារំាង ភ្លើងអគ្គិសនីប្រមាណជា ៨០% បានមកពីថាមពលនុយកក្លេអ៊ែរ។
គួរជម្រាបជូនថា តំាងពីក្រោយគ្រោះថ្នាក់នុយក្លេអ៊ែរនៅ Fukushima មក មានកិច្ចប្រជុំថ្នាក់ក្រសួងជាច្រើនត្រូវបានរៀបចំឡើងជាបន្តបន្ទាប់ និងបានអនុម័តចេញនូវផែនការមួយចំនួនក្នុងការពង្រឹងសុវត្ថិភាពនៅតាមមជ្ឈមណ្ឌលនុយក្លេអ៊ែរ និងបង្កើនការគ្រប់គ្រងវិបត្តិ។ ដោយឡែក ក្នុងថ្ងៃនេះដែរ ក៏មានការរៀបចំក្បួនបាតុកម្មរបស់ក្រុមអ្នកប្រឆំាងនុយក្លេអ៊ែរ ដើម្បីប្រឆំាងនឹងសន្និសីទក្នុងថ្ងៃនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ