ស្ត្រីខ្មែរវ័យក្មេងរាប់សិបនាក់ត្រូវបានឪពុកម្តាយ ឬអ្នករត់ការនាំមកឈរតម្រៀបគ្នាឲ្យបុរសចំណាស់ជនជាតិកូរ៉េជ្រើសរើសធ្វើជាភរិយា។ រឿងរ៉ាវបានបែកការនៅពេលដែលប៉ូលិសឆ្មក់ចូលក្នុងទីតាំងដែលគេបានណាត់ជួបគ្នាកាលពីថ្ងៃទី៣០កក្កដានៅទីក្រុងភ្នំពេញ។ នេះមិនមែនជារឿងថ្មីទេតែជារឿងដែលមិនអាចបញ្ចប់បាន។ មានស្ត្រីខ្មែរជាច្រើនណាស់មកហើយដែលបានក្លាយចាប្រពន្ធជនបរទេសតាមរយៈការជ្រើសរើសដែលមិនគួរគប្បីបែបនេះ។ តើហេតុអ្វីបានជាស្ត្រីខ្មែរទាំងនោះក្លាយជាមុខទំនិញសម្រាប់ជនបរទេសជ្រើសរើសយ៉ាងដូច្នេះ?
ស្ត្រីវ័យក្មេងៗដែលមានអាយុចាប់ពី១៨ឆ្នាំដល់ជាង២០ឆ្នាំប្រមាណជា៥០នាក់មកពីទីជនបទកម្ពុជាត្រូវបានគេនាំមកតម្រៀបជួរតាំងឲ្យបុរសកូរ៉េដែលមានវ័យស្ទើរតែស្មើនឹងឪពុកជ្រើសរើសយកធ្វើជាប្រពន្ធ។ ស្ត្រីទាំងនោះសុទ្ធតែស្មគ្រ័ចិត្តក្រោមការជួយជំរុញពីឪពុកម្តាយ ឬអាណាព្យាបាលដែលចង់បានស្វាមីឬកូនប្រសារជាជនបរទេស។
កាលពីប៉ុន្មានឆ្នាំមុននេះ ការប្រមូលស្ត្រីខ្មែរមកដាក់តាំងឲ្យបុរសកូរ៉េ ឬចិនតៃវ៉ាន់ជ្រើសរើសធ្វើជាប្រពន្ធ គឺជារឿងពេញនិយមនិងបើកចំហ។ ប៉ុន្តែ ក្រោយពីអាជ្ញាធរបានចាត់វិធានការមួយចំនួនបន្ទាប់ពីមានស្ត្រីខ្មែរជាច្រើនធ្លាក់ក្នុងបណ្តាញជួញដូរមនុស្សមកនោះ រឿងនេះក៏ស្ថិតក្នុងសភាពលាក់បាំងបន្តិច។ ភ្នាក់ងារជ្រើសរើសគូស្រករត្រូវបានគេបង្កើតឡើងដើម្បីធ្វើឲ្យបញ្ហានេះក្លាយជារឿងស្របច្បាប់។ ជាក់ស្តែង បើទោះបីជាសមត្ថកិច្ចបានរកឃើញថាស្ត្រីវ័យក្មេងៗទាំងនោះត្រូវបានគេនាំមកឲ្យបុរសចំណាស់កូរ៉េជ្រើសរើសដូចទំនិញក៏ដោយ ក៏គ្មានជនណាម្នាក់ត្រូវបានចោទប្រកាន់ដែរ ។
ជាការពិត ការជ្រើសរើសគូស្រករគឺជាសេរីភាពរបស់មនុស្សគ្រប់គ្នា ហើយក៏គ្មានការហាមប្រាមមិនឲ្យជាតិសាសន៍មួយស្រឡាញ់ជាតិសាសន៍មួយទៀតនោះដែរ។ ប៉ុន្តែ ជាតិសាសន៍នីមួយៗសុទ្ធតែមានប្រពៃណី និងកិត្តិយសដែលមិនអាចបំពានបានជាពិសេសគឺស្ត្រីតែម្តង។ សង្គមខ្មែរ និងស្ត្រីខ្មែរក៏មានតម្លៃជាប្រពៃណី និងកិត្តិយសរបស់ខ្លួនដែរ។ ទោះបីជា បុរសខ្មែរត្រូវចូលស្តីដណ្តឹង និងជូនបណ្ណាការទៅឲ្យភាគីខាងស្រី ប៉ុន្តែ ទង្វើនេះត្រូវបានគេផ្តល់អត្ថន័យជាកិត្តិយស គឺមិនមែនជាការទិញដូរឡើយ។ ម្យ៉ាងទៀត បច្ចុប្បន្ន ក៏គ្មានបុរសខ្មែរណាមានសិទ្ធិឲ្យគេប្រមូលផ្តុំស្ត្រីមកឲ្យខ្លួនរើសធ្វើប្រពន្ធនោះដែរ។
ដូច្នេះ វាពិតជារឿងគួរឲ្យហួសចិត្តខ្លាំងណាស់ដែលសម័យនេះទៅហើយនៅតែមានបុរសបរទេសអាចមកប្រមូលស្ត្រីខ្មែរដើម្បីរើសធ្វើប្រពន្ធដូចជារើសមុខទំនិញបែបនេះ ហើយទង្វើដែលប៉ះពាល់យ៉ាងខ្លាំងដល់កិត្តិយសស្ត្រីខ្មែរ និងកិត្តិយសជាតិទាំងមូលនេះ បែរជាត្រូវបានអនុញ្ញាតក្រោមហេតុផលថាជាសិទ្ធិជ្រើសរើសកូស្រករទៅវិញ។
ក្រុមអ្នកវិភាគសង្គមកម្ពុជាបានមើលឃើញមូលហេតុច្រើនយ៉ាងដែលធ្វើឲ្យស្ត្រីខ្មែរមួយចំនួនធ្លាក់ក្នុងសភាពបែបនេះ។ មូលហេតុទី១ គឺផ្នត់គំនិតរបស់ពលរដ្ឋខ្មែរដែលតែងផ្តល់តម្លៃហួសហេតុដល់អ្វីដែលជាបរទេស មិនថាជាមនុស្សឬវត្ថុនោះឡើយ។ នេះមកពីសង្គមខ្មែរបានឆ្លងកាត់សង្គ្រាមវិនាសកម្មច្រើនពេកដែលធ្វើឲ្យពលរដ្ឋខ្មែរជាច្រើនបាត់បង់មោទនភាពជាតិរបស់ខ្លួន ហើយបែរទៅផ្តល់តម្លៃខ្លាំងដល់បរទេស។ បច្ចុប្បន្ន ទោះបីជាប្រទេសជាតិបានស្គាល់សន្តិភាព និងការអភិវឌ្ឍន៍ហើយក៏ដោយ ប៉ុន្តែ ភាពក្រីក្រ និងបញ្ហាសង្គមជាច្រើននៅតែជាកត្តាជំរុញឲ្យប្រជាពលរដ្ឋមួយចំនួនជាពិសេសស្ត្រីតែម្តងធ្លាក់ក្នុងសភាពងាយរងគ្រោះដដែល។ ពួកគេប្រាថ្នាចង់រៀបការជាមួយជនបរទេសពីព្រោះតែហេតុផលម្យ៉ាងគត់គឺ«ប្រាក់»។ ប្រាក់បានធ្វើឲ្យពួកគេភ្លេចគិតពីកិត្តិយស និងគ្រោះថ្នាក់។
មូលហេតុទី២គឺ ភាពខ្វះចន្លោះរបស់អាជ្ញាធរមានសមត្ថកិច្ចក្នុងការការពារកិត្តិយសស្ត្រី និងតម្លៃសង្គមរបស់ខ្លួន។ ភាពខ្វះចន្លោះនេះហើយដែលជាបុព្វហេតុនាំឲ្យស្ត្រីខ្មែរជាច្រើនធ្លាក់ខ្លួនជាទាសករផ្លូវភេទ ឬជាអ្នកបម្រើដាច់ថ្លៃដែលរងការបំពានយ៉ាងធ្ងន់ធ្ងរនៅឯបរទេស។ បន្ថែមពីលើនេះ តម្លៃទឹកប្រាក់និងសម្ភារៈនិយមដែលកំពុងតែយកឈ្នះកាន់តែខ្លាំងឡើងៗទៅលើតម្លៃខាងសីលធម៌ក៏ជាចំណែកយ៉ាងសំខាន់ក្នុងការរុញច្រានសង្គមកម្ពុជាឲ្យធ្លាក់ក្នុងស្ថានភាពគ្រោះថ្នាក់ដែរ។
ដូច្នេះ ខ្មែរគ្រប់គ្នា ជាពិសេសអ្នកនយោបាយតែម្តង ត្រូវរួមគ្នាដើម្បីកសាងមោទនភាពជាតិឲ្យពលរដ្ឋរបស់ខ្លួន។ សន្តិភាពមានហើយ ការអភិវឌ្ឍន៍ក៏មានហើយដែរ ប៉ុន្តែ អ្វីដែលនៅសេសសល់គឺការប្រែក្លាយសន្តិភាព និងការអភិវឌ្ឍន៍នោះឲ្យទៅជាប្រយោជន៍របស់ពលរដ្ឋគ្រប់គ្នាដោយគ្មានលើកលែង។ នៅពេលដែលពលរដ្ឋខ្មែរគ្រប់រូបមានជីវភាពធូរធា និងមានសន្តិភាពទាំងផ្លូវការ និងផ្លូវចិត្ត មោទនភាពជាតិនឹងកើតមានជាស្វ័យប្រវត្តិ។ ស្ត្រីខ្មែរ ក៏នឹងមិនចាំបាច់មកតម្រៀបជួរឲ្យបរទេសរើសធ្វើប្រពន្ធទៀតដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ