បន្ទាប់ពីអាមេរិក ចិនទើបបានសាកល្បងឧបករណ៍ហោះហើរមួយដែលមានល្បឿនលឿនជាងសម្លេង
ចិនទើបបានធ្វើការសាកល្បងជាលើកទីមួយកាលពីសប្តាហ៍កន្លងទៅ នូវសព្វាវុធហោះហើរមួយដែលអាចហោះក្នុងល្បឿនលឿនជាងសម្លេង។ គឺជាបច្ចេកវិជ្ជាថ្មីចុងក្រោយមួយដែលចិនទើបបានអភិវឌ្ឍន៍ឡើងសម្រាប់ធ្វើការវាយប្រហារឆាប់រហ័ស និងចំគោលដៅដែលមានចម្ងាយឆ្ងាយនៅក្នុងលោក នេះជាព័ត៌មានមួយដែលក្រសួងការពារជាតិអាមេរិកទើបបានបង្ហើបឲ្យដឹងនៅថ្ងៃពុធ ទី១៥ មករាម្សិលមិញ។
ចុះផ្សាយនៅថ្ងៃ៖
ស្តាប់ - ០២:២៤
ទោះបីជាព័ត៌មាននេះនៅមិនទាន់បានបញ្ជាក់ជាផ្លូវការដោយរដ្ឋាភិបាលក្រុងប៉េកំាងក៏ដោយ ក៏គេអាចចាត់ទុកថា ចិនបានក្លាយជាប្រទេសទី២ ក្នុងលោក បន្ទាប់ពីអាមេរិកដែលបានធ្វើការសាកល្បងសព្វាវុធហោះហើរមួយដែលមានល្បឿនលឿនជាងល្បឿនសម្លេងទៅទៀត។ មួយវិញទៀត និងក្រៅពីមានល្បឿនលឿនជាងសម្លេង ឧបករណ៍មួយនោះក៏អាចហោះបានកម្ពស់ខ្ពស់សែនខ្ពស់នៅក្នុងបរិយាកាស ព្រមទំាងអាចវាយប្រហារលើគោលដៅមួយច្បាស់លាស់នៅកន្លែងណាមួយក៏បានលើភពផែនដីយើងនេះ។ អ្នកនំាពាក្យក្រសួងការពារជាតិអាមេរិកបានបញ្ជាក់ពីវត្តមានសព្វាវុធហោះហើររបស់ចិននោះ តែបានព្យាយាមមិនធ្វើអត្ថាធិប្បាយអ្វីទេ។
យោងតាមព័ត៌មានចុះផ្សាយលើទំព័រអ៊ីនធឺណែតដោយ Washinton Free Beacon ឲ្យដឹងថា សព្វាវុធហោះហើររបស់ចិននោះមានឈ្មោះថា WU-១៤ និងដែលចិនបានធ្វើការសាកល្បងកាលពីថ្ងៃទី៩ មករាកន្លងទៅ។ ម្យ៉ាងទៀត WU-១៤ មានល្បឿនលឿនជាងសម្លេងរហូតដល់ទៅ ១០ដង។ តែក្រសួងការពារជាតិអាមេរិកមិនបានបញ្ជាក់ព័ត៌មាននេះទេ។ នៅខាងចិនឯណោះវិញ អ្នកនំាពាក្យក្រសួងការពារជាតិគ្រាន់តែបានអះអាងថា ការស្រាវជ្រាវផ្នែកវិទ្យាសាស្រ្ត និងការសាកល្បងនានាបានធ្វើជាបន្តបន្ទាប់ និងជាធម្មតា ដោយគ្មានគោលដៅវាយប្រហារប្រទេសណា ឬមួយក៏គោលដៅណាមួយទេ។ ទាក់ទងនឹងព័ត៌មានជុំវិញការសាកល្បងសព្វាវុធហោះហើររបស់ចិនឈ្មោះថា WU-១៤ ដែលលើកឡើងដោយក្រសួងការពារជាតិអាមេរិកនោះ រូបលោកអ្នកនំាពាក្យក្រសួងការពារចិនមិនបញ្ជាក់ ហើយក៏មិនឆ្លើយបដិសេធដែរ។
អ្វីជាការកត់សម្គាល់ ព័ត៌មាននេះបានលេចចេញមក ចំពេលដែលចិនបានតម្លើងថវិកាយោធារបស់ខ្លួនជារៀងរាល់ឆ្នំានារយៈពេលប៉ុន្មានឆ្នំាចុងក្រោយនេះ។ ការចំណាយសម្រាប់វិស័យស្រាវជ្រាវ ក៏ដូចជាការបំពាក់នូវគ្រឿងសព្វាវុធថ្មីៗ ដូចយ៉ាងនាវាផ្ទុកយន្តហោះចម្បំាង គ្រាប់មីស៊ីលអន្តរទ្វីបប្រឆំាងនាវាជាដើម។ គួរជម្រាបជូនថា នៅក្នុងបច្ចេកវិទ្យាល្បឿនលឿនជាងសម្លេងនេះ អាមេរិកជាប់លេខ១ ដោយបានចំណាយថវិកាស្រាវជ្រាវចំនួន ២០០លានដុល្លារក្នុងឆ្នំា ២០១៣ ព្រមទំាងបានធ្វើការសាកល្បងហោះហើរជាច្រើននារយៈពេលចុងក្រោយនេះ។ នៅក្នុងក្របខ័ណ្ឌនៃកម្មវត្ថុ « វាយប្រហារពិភពលោកឆាប់រហ័ស » ក្រសួងការពារជាតិអាមេរិកកំពុងសាកល្បងសព្វាវុធដែលអាចហោះបានក្នុងល្បឿន ២៧ ០០០គីឡូម៉ែតក្នុងមួយម៉ោង និងសព្វាវុធជាច្រើនប្រភេទទៀតដែលអាចហោះក្នុងល្បឿន ៦ ៧០០គីឡូម៉ែត្រក្នុងមួយម៉ោង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ