នាយករដ្ឋមន្រ្តីចិនទៅដល់ប៉ាគីស្តង់ក្រោយពីបញ្ចប់ទស្សនកិច្ចនៅឥណ្ឌា
លោកនាយករដ្ឋមន្រ្តីចិន វេន ជាប៉ាវ (Wen Jiabao) បានទៅដល់ប្រទេសប៉ាគីស្តង់ហើយ នៅថ្ងៃសុក្រនេះ នៅក្នុងដំណើរទស្សនកិច្ចផ្លូវការរយៈពេល ៣ថ្ងៃ។ លោកវេន ជាប៉ាវ ទើបនឹងបញ្ចប់ទស្សនកិច្ចរយៈពេល ៣ថ្ងៃដូចគ្នា នៅប្រទេសឥណ្ឌា ដែលជាគូសត្រូវរបស់ប៉ាគីស្តង់។ ក្រៅពីទំនាក់ទំនងពាណិជ្ជកម្ម កិច្ចសហប្រតិបត្តិការក្នុងវិស័យនុយក្លេអ៊ែរក៏អាចជាប្រធានបទមួយ សំខាន់ដែរ ក្នុងដំណើរទស្សនកិច្ចនេះ។
ចុះផ្សាយនៅថ្ងៃ៖
សេចក្តីរាយការណ៍របស់ សេង ឌីណា
៣ថ្ងៃ នៅឥណ្ឌា ៣ថ្ងៃដូចគ្នា នៅប៉ាគីស្តង់ មើលទៅទំនងមិនមែនជារឿងចៃដន្យទេ សម្រាប់ទស្សនកិច្ចរបស់នាយករដ្ឋមន្រ្តីចិន នៅក្នុងប្រទេសជាគូសត្រូវទាំងពីរនេះ។ អ្នកជំនួញចិនដ៏ច្រើនសន្ធឹកសន្ធាប់ ដែលអមដំណើរលោកវេន ជាប៉ាវ ទៅឥណ្ឌា ក៏នឹងត្រូវអមដំណើរទៅប្រទេសប៉ាគីស្តង់ដែរ។
កាលពីនៅឥណ្ឌា ចិនបានចុះកិច្ចព្រមព្រៀងពាណិជ្ជកម្មជាមួយឥណ្ឌា ក្នុងតម្លៃ១៦ពាន់លានដុល្លារ។ នៅប៉ាគីស្តង់ ចិនក៏គ្រោងចុះកិច្ចព្រមព្រៀងពាណិជ្ជកម្ម ក្នុងតម្លៃប្រហាក់ប្រហែលគ្នានេះដែរ ពោលគឺ ប្រមាណជា ១៤ពាន់លានដុល្លារ។
នេះបង្ហាញយ៉ាងច្បាស់អំពីនយោបាយរបស់ចិន ដែលកំពុងតែថ្លឹងថ្លែងរវាងផលប្រយោជន៍ផ្នែកភូមិសាស្រ្តនយោបាយ និងផលប្រយោជន៍ផ្នែកសេដ្ឋកិច្ច។ ប៉ាគីស្តង់គឺជាសម្ព័ន្ធមិត្តចាស់ឆ្នាំរបស់ចិន ក៏ប៉ុន្តែ ឥណ្ឌា ដែលជាគូសត្រូវប៉ាគីស្តង់ គឺជាដៃគូពាណិជ្ជកម្ម និងជាទីផ្សារប្រកបដោយសក្តានុពល ដែលចិនមិនអាចមិនរវីរវល់ បើទោះជាឥណ្ឌាជាប់មានជម្លោះច្រើនជាមួយនឹងចិនក៏ដោយ។
ការផ្តោះប្តូរពាណិជ្ជកម្មប្រចាំឆ្នាំ រវាងចិន ជាមួយឥណ្ឌា មានទំហំទឹកប្រាក់រហូតដល់ទៅ ៦០ពាន់លានដុល្លារ ធៀបនឹងប៉ាគីស្តង់ ដែលមានប្រមាណតែ ៧ពាន់លានដុល្លារប៉ុណ្ណោះ។ នាយករដ្ឋមន្រ្តីប៉ាគីស្តង់បានបង្ហាញនូវក្តីសង្ឃឹមថា ក្នុងដំណើរទស្សនកិច្ចរបស់លោកវេន ជាប៉ាវ អាចនឹងមានកិច្ចព្រមព្រៀង បង្កើនទំនាក់ទំនងពាណិជ្ជកម្មរហូតដល់ ១៥ ទៅ ១៨ពាន់លានដុល្លារ ក្នុងរយៈពេល ៥ឆ្នាំទៀត។ ក៏ប៉ុន្តែ ៥ឆ្នាំទៀត ការផ្តោះប្តូរពាណិជ្ជកម្មរវាងចិន និងឥណ្ឌា នឹងកើនឡើង រហូតដល់ ១០០ពាន់លានដុល្លារឯណោះ។ នេះបើតាមការព្រមព្រៀង ធ្វើឡើងក្នុងអំឡុងដំណើរទស្សនកិច្ចរបស់ លោកវេន ជាប៉ាវ នៅឥណ្ឌា។
នេះបង្ហាញថា ទំនាក់ទំនងខាងពាណិជ្ជកម្មជាមួយចិន ប៉ាគីស្តង់ដើរក្រោយឥណ្ឌាឆ្ងាយណាស់។ ក៏ប៉ុន្តែ ប៉ាគីស្តង់មានទំនាក់ទំនងពិសេសជាមួយចិន ដែលឥណ្ឌាមិនមាន នោះគឺទំនាក់ទំនងផ្នែកយោធា។ ចិន គឺជាប្រភពផ្តល់គ្រឿងសព្វាវុធដ៏ចម្បង សម្រាប់ប៉ាគីស្តង់។ ចិនធ្លាប់ទាំងបានសាងសង់មជ្ឈមណ្ឌលនុយក្លេអ៊ែរឲ្យប៉ាគីស្តង់ទៀតផង។ នៅក្នុងដំណើរទស្សនកិច្ចនៅពេលនេះ លោកវេន ជាប៉ាវ គ្រោងនឹងជជែកជាមួយប៉ាគីស្តង់ អំពីគម្រោងជួយសាងសង់មជ្ឈមណ្ឌលនុយក្លេអ៊ែរថ្មីមួយទៀតឲ្យប៉ាគីស្តង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ