កម្ពុជាចុះហត្ថលេខាទទួលជំនួយច្រើនរយលានដុល្លារបន្ថែមទៀតពីចិន
កម្ពុជាបានចុះហត្ថលេខាទទួលជំនួយសហប្រតិបត្តិការ និងឥណទានដែលមានតម្លៃជាច្រើនរយលានដុល្លារ ពីរដ្ឋាភិបាលចិនរួចហើយ កាលពីថ្ងៃចន្ទទី១៣ធ្នូ។ ក្នុងចំណោមឯកសារដែលត្រូវបានចុះហត្ថលេខានោះ ក៏មានពិធីសារស្តីពីការនាំចេញផលិតផលដំឡូងមីកម្ពុជា ទៅប្រទេសចិនផងដែរ។ លោកនាយក រដ្ឋមន្ត្រីខ្មែរហ៊ុន សែនបានថ្លែងប្រាប់ទីភ្នាក់ងារព័ត៌មានចិនXinhuaថា លោកមានគម្រោងនឹងចុះហត្ថលេខានាំចេញដំណាំពោតទៅប្រទេសនៅពេលអនាគតទៀត។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់លាង ដឺលុចពីទីក្រុងភ្នំពេញ
ភ្នំពេញ និងប៉េកាំងបានចុះហត្ថលេខាលើកិច្ចព្រមព្រៀងស្តីពីជំនួយ និងសហប្រតិបត្តិការសេដ្ឋកិច្ចលើឯកសារជាង១០រួចហើយកាលពីថ្ងៃចន្ទទី១៣ធ្នូ។ យោងតាមសេចក្តីរាយការណ៍របស់សារព័ត៌មានចិន ឯកសារដែលត្រូវបានចុះហត្ថលេខាទាំងនោះរួមមាន ការផ្លាស់ប្តូរសច្ចាប័នស្តីពីអនុសញ្ញាកុងស៊ុលចិនកម្ពុជា កិច្ចព្រមព្រៀងសហប្រតិបត្តិការសេដ្ឋកិច្ច និងបច្ចេកទេសតម្លៃ១០០លានយ័ន ការផ្តល់ឡជីវឧស្ម័នចំនួន៣០០ឡដែលមានតម្លៃ២លាន៥សែនយ័ន កិច្ចព្រមព្រៀងឥណទានលើគម្រោងសាងសង់ស្ពានជ្រោយចង្វាទី២តម្លៃ២៧លានដុល្លារ កិច្ចព្រមព្រៀងឥណទានលើគម្រោងសាងសង់ស្ពានតាខ្មៅតម្លៃ៣២លានដុល្លារ កិច្ចព្រមព្រៀងស្តីពីការអភិវឌ្ឍន៍ប្រព័ន្ធធារាសាស្ត្រតម្លៃជាង៥៣លានដុល្លារ។ ក្នុងចំណោមឯកសារកិច្ចព្រមព្រៀងទាំងអស់ ក៏មានពិធីសារស្តីពីការនាំផលិតផលដំឡូងមីកម្ពុជាចូលទៅប្រទេសចិនផងដែរ។
យោងតាមការផ្សាយរបស់ទីភ្នាក់ងារព័ត៌មានចិនXinhua លោកនាយករដ្ឋមន្ត្រីខ្មែរ ហ៊ុន សែនបានថ្លែងអោយដឹងថា លោកមានបំណងពង្រីកសហប្រតិបត្តិការពាណិជ្ជកម្មលើវិស័យកសិកម្មផ្សេងទៀត ជាមួយប្រទេសចិន ដោយសារតែចិន គឺជាទីផ្សារដ៏ធំរបស់កម្ពុជា។ សារព័ត៌មានXinhuaបានដកស្រង់សំដីលោកហ៊ុន សែនដែលបញ្ជាក់ថា កន្លងមក កម្ពុជាបានចុះកិច្ចព្រមព្រៀងនាំចេញអង្ករកម្ពុជា ជាមួយប្រទេសចិនរួចហើយ។ ពេលនេះ កម្ពុជាក៏កំពុងជំរុញអោយមានកិច្ចព្រមព្រៀងនាំចេញផលិតផលពោតកម្ពុជា ជាមួយប្រទេសចិនផងដែរ។
ទាក់ទងនឹងវិស័យពាណិជ្ជកម្មនេះ លោកនាយករដ្ឋមន្ត្រីចិន វេន ជាបាវបានថ្លែងប្រាប់សារព័ត៌មានរដ្ឋXinhuaថា ប្រទេសទាំង២គ្រោងនឹងបង្កើនតម្លៃនៃការផ្លាស់ប្តូរពាណិជ្ជកម្មរហូតដល់២៥០០លានដុល្លារនៅឆ្នាំ២០១៥។ លោកនាយករដ្ឋមន្ត្រីចិនក៏បានសន្យានឹងបន្តជំនួយដើម្បីជំរុញការអភិវឌ្ឍន៍សេដ្ឋកិច្ចរបស់កម្ពុជាបន្តទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ