ក្រសួងការពារជាតិកំពុងត្រៀមបញ្ជូនរថយន្តជំនួយរបស់ចិនមកភ្នំពេញ
អ្នកជំនាញការយោធាចិនមួយក្រុម កំពុងបង្ហាត់បង្រៀនអ្នកបើកបរនិង អ្នកបច្ចេកទេសយោធាខ្មែរអំពី ការប្រើប្រាស់រថយន្តដែលជាជំនួយរបស់ប្រទេសចិន។ ការបង្ហាត់បង្រៀនអំពីការផ្ទេរបច្ចេក វិជ្ជាថ្មីនេះកំពុងតែប្រព្រឹត្តទៅនៅឯកំពង់ផែ ក្រុងព្រះសីហនុទីដែលរថយន្តយោធាដែលជាជំនួយរបស់ចិនបានមកដល់កាល ពីប៉ុន្មានថ្ងៃមុននេះ។រថយន្ត យោធាទាំង២៥៧គ្រឿងនឹងត្រូវគេបញ្ជូនបន្តមកភ្នំពេញនៅថ្ងៃចន្ទដើម សប្តាហ៍ក្រោយនេះដើម្បីប្រារព្ធពិធីប្រគល់និងទទួលជា ផ្លូវការ។
ចុះផ្សាយនៅថ្ងៃ៖ កែប្រែថ្ងៃទី៖
សេចក្តីរាយការណ៍របស់ ប៉ែន បូណា
ក្រសួងការពារជាតិកម្ពុជាបានបញ្ជូនអ្នកបើកបររថយន្តយោធារួមទាំងអ្នកបច្ចេកទេសផងសរុបចំនួនប្រហែល៣០០នាក់ទៅកាន់កំពង់ផែក្រុងព្រះសីហនុដើម្បីទទួលការហ្វឹកហាត់ផ្ទេរបច្ចេកវិជ្ជាពីអ្នកជំនាញការចិនអំពីវិធីប្រើប្រាស់និងថែទាំរថយន្តយោធាថ្មីស្រឡាងចំនួន២៥៧គ្រឿងដែលជាជំនួយរបស់ប្រទេសចិន។នេះបើយោងតាមលោកឧត្តមសេនីយ៍ឈុំសុជាតិអ្នកនាំពាក្យក្រសួងការពារជាតិដែលបានឲ្យដឹងនៅថ្ងៃសៅរ៍នេះ។
រថយន្តទាំងនោះត្រូវបានគេដឹកតាមកប៉ាល់ពីប្រទេសចិនមកដល់កំពង់ផែក្រុងព្រះសីហនុកាលពីថ្ងៃពុធនិងទើបតែត្រូវបានគេរើចេញពីកប៉ាល់កាលពីថ្ងៃម្សិលមិញ។អ្នកបច្ចេកទេសចិន៩រូបក៏បានមកដល់ជាមួយរថយន្តទាំងនោះដែរដើម្បីបង្ហាត់បង្រៀនយោធាខ្មែរអំពីបច្ចេកទេសប្រើប្រាស់និងថែទាំរថយន្ត។ការហ្វឹកហាត់ដែលមានរយៈពេលពីរថ្ងៃកំពុងតែប្រព្រឹត្តទៅនៅឯទីក្រុងមាត់សមុទ្រ។បន្ទាប់មកអ្នកបើកបរនឹងនាំយករថយន្តទាំងនោះមកកាន់ភ្នំពេញនៅថ្ងៃចន្ទដើមសប្តាហ៍ក្រោយ។
ជំនួយយោធារបស់ប្រទេសចិនដែលរួមមានរថយន្តយោធាចំនួន២៥៧គ្រឿងនិងសម្លៀកបំពាក់យោធាចំនួន៥ម៉ឺនសម្រាប់ផងត្រូវបានលោកប្រធានាធិបតីចិនហ៊ូជីនតាវប្រកាសផ្តល់ជូនកម្ពុជានៅក្នុងអំឡុងទស្សនកិច្ចរបស់លោកនាយករដ្ឋមន្ត្រីហ៊ុនសែននៅទីក្រុងសៀងហៃកាលពីពីរខែមុននេះ។ការប្រកាសផ្តល់ជំនួយយោធារបស់ចិនដល់កម្ពុជាបានធ្វើឡើងបន្ទាប់ពីសហរដ្ឋអាមេរិកបានប្រកាសផ្អាកជំនួយយោធាដូចគ្នានេះដល់កម្ពុជាដោយសារតែទីក្រុងវ៉ាស៊ីនតោនខឹងសម្បារនឹងរដ្ឋាភិបាលកម្ពុជាដែលបានចាប់បញ្ជូនជនជាតិភាគតិចអ៊ុយហ្គួរចំនួន២០នាក់ដែលស្វះស្វែងរកសិទ្ធិជ្រកកោននយោបាយទៅឲ្យចិនវិញកាលពីខែធ្នូឆ្នាំ២០០៩តាមសំណើររបស់ក្រុងប៉េកាំង។
មិនបង្អង់យូរជំនួយយោធារបស់ចិនបានមកដល់កម្ពុជាហើយ។លោកឧត្តមសេនីយ៍ឈុំសុជាតិបានឲ្យដឹងថាពិធីប្រគល់និងទទួលអំណោយយោធាទាំងនេះនឹងត្រូវប្រារព្ធធ្វើឡើងនៅថ្ងៃ២៣មិថុនាខាងមុខនេះនៅឯព្រលានយន្តហោះយោធាភ្នំពេញ។លោកអះអាងថាជំនួយយោធារបស់ចិនមានសារៈសំខាន់ណាស់សម្រាប់សម្រេចគោលដៅកំណែទម្រង់វិស័យយោធារបស់កម្ពុជា។
សូមបញ្ជាក់ថារថយន្តទាំងនោះមានច្រើនប្រភេទដូចជារថយន្តដឹកជញ្ជូនទ័ពចំនួន២០០គ្រឿងរថយន្តពេទ្យចំនួន២០គ្រឿងរថយន្តសម្រាប់អគ្គមេបញ្ជាការចំនួន៣០គ្រឿងរថយន្តសម្រាប់ជួសជុលចល័តចំនួន៥គ្រឿងនិងរថយន្តសម្រាប់ដឹកសម្ភារៈយោធាធុនធ្ងន់ចំនួន២គ្រឿងផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ