អ្នកជំនាញរំឭកយុវជនឲ្យប្រយ័ត្ននៅពេលចូលរួមនៅក្នុងវិស័យនយោបាយ
ចុះផ្សាយនៅថ្ងៃ៖
ស្តាប់ - ០៤:០៩
នៅសល់តែមួយខែទៀតប៉ុណ្ណោះ ការបោះឆ្នោតក្រុមប្រឹក្សាឃុំសង្កាត់នឹងឈានចូលមកដល់។ក្នុងឱកាសនេះ អ្នកជំនាញបានរំឭកយុវជនឲ្យប្រុងប្រយ័ត្ន នៅពេលចូលរួមនៅក្នុងវិស័យនយោបាយ។ សម្រាប់អ្នកជំនាញ ការចូលរួមរបស់យុវជននៅក្នុងវិស័យនយោបាយ គឺជាសកម្មភាពដ៏សំខាន់និងចាំបាច់ ដើម្បីរួមចំណែកអភិវឌ្ឍប្រទេសជាតិ ប៉ុន្តែយុវជនត្រូវពិចារណាឲ្យច្បាស់លាស់ដែរមុននឹងសម្រេចចិត្តចូលរួម ដើម្បីចៀសវាងធ្លាក់ខ្លួនទៅជាឈ្នាន់របស់អ្នកនយោបាយទុច្ចរិត។
ក្នុងចំណោមប្រជាជនសរុបនៅកម្ពុជាប្រមាណ១៥លាននាក់ មានជិត៧០ភាគរយដែលមានអាយុក្រោម៣០ឆ្នាំ។ ដោយឡែក នៅក្នុងការបោះឆ្នោតក្រុមប្រឹក្សាឃុំសង្កាត់ខាងមុខ យុវជនដែលមានអាយុពី១៨ឆ្នាំដល់៣០ឆ្នាំ មានចំនួន២លាន៦សែននាក់ ឬស្មើនឹងប្រមាណ៣៣ភាគរយនៃចំនួនអ្នកចុះឈ្មោះបោះឆ្នោតទាំងអស់ប្រមាណ៧លាន៨សែននាក់។
ជាការកត់សម្គាល់ បច្ចុប្បន្ននេះ ការចូលរួមរបស់យុវជនខ្មែរនៅក្នុងឆាកនយោបាយមានលក្ខណៈសកម្មជាងពេលណាៗទាំងអស់។ យុវជនចាប់ផ្ដើមស្គាល់តម្លៃនៃសន្លឹកឆ្នោតរបស់ខ្លួន។ ពួកគេចូលរួមបោះឆ្នោត ចុះផ្លូវធ្វើបាតុកម្មតវ៉ា តាមដាននិងនាំគ្នាជជែកពីបញ្ហានយោបាយតាមប្រព័ន្ធផ្សព្វផ្សាយនានា។ និន្នាការនៃការចូលរួមរបស់យុវជននៅក្នុងវិស័យនយោបាយ ទំនងជាបន្តកើនឡើងទៀត ដោយសារតែការយល់ដឹងពីសិទ្ធិ ក៏ដូចជាស្ថានភាពអំណោយផលនៃបណ្ដាញផ្សព្វផ្សាយសង្គម Facebook។
ដោយសារតែយុវជនជាបុគ្គលមានសក្តានុពលខ្លាំងទាំងផ្នែកចំណេះដឹង ការចូលរួមក្នុងសកម្មភាពសង្គមនិងនយោបាយ ពួកគេបានក្លាយខ្លួនទៅជាផ្ទាំងស៊ីប ជាគោលដៅរបស់អ្នកនយោបាយ ក្នុងការស្វែងរកសំឡេងគាំទ្រ។ នៅក្នុងបរិបទបែបនេះ អ្នកជំនាញមួយចំនួនបានផ្ដល់យោបល់ឲ្យយុវជនសម្រេចចិត្តដោយប្រុងប្រយ័ត្ន ធ្វើយ៉ាងណាកុំបណ្ដោយឲ្យខ្លួនឯង ក្លាយទៅជាឧបករណ៍បម្រើនយោបាយឲ្យសោះ។
សម្រាប់អ្នកជំនាញ យុវជនគួរតែចូលប្រឡូកក្នុងវិស័យនយោបាយដោយ ឃ្លាំមើលការអនុវត្តនយោបាយក្រោយការបោះឆ្នោត ថាការសន្យារបស់គណបក្សនយោបាយទាំងនោះ ត្រូវបានបំពេញក្នុងកម្រិតណា? ហើយប្រសិនបើគណបក្សនយោបាយមិនបានបំពេញតាមអ្វីដែលបានសន្យាទេ នោះយុវជនអាចពិចារណាឡើងវិញនៅពេលបោះឆ្នោតលើកក្រោយទៀត។ យុវជនគួរតែជជែកដេញដោលគ្នាអំពីគោលនយោបាយរបស់គណបក្សនយោបាយ ដែលពាក់ព័ន្ធនឹងបញ្ហាជាតិសំខាន់ៗ ដើម្បីអាចសម្រេចចិត្តបានថា តើត្រូវជ្រើសរើសគណបក្សមួយណាឲ្យឡើងកាន់អំណាច។
ការសម្រេចចិត្តរបស់យុវជន ដើម្បីគាំទ្រ ចូលរួម ឬបម្រើគណបក្សនយោបាយណាមួយ គឺជារឿងសំខាន់បំផុត។ យុវជន គួរពិចារណាទៅលើគោលនយោបាយនិងការអនុវត្តរបស់គណបក្ស ជាជាងជឿជាក់យ៉ាងផ្កាប់មុខទៅលើគណបក្សណាមួយ។ ការជឿជាក់ផ្កាប់មុខដោយឥតពិចារណាចំពោះគណបក្សណាមួយ អាចធ្វើឲ្យយុវជនធ្លាក់ខ្លួនទៅជាឧបករណ៍នយោបាយ ដែលងាយស្រួលអនុញ្ញាតឲ្យគណបក្សនោះ បង្វិល ពង្វក់ និងបញ្ជាតាមអំពើចិត្ត។
វាជារឿងល្អ ប្រសិនបើគណបក្សដែលយុវជនជឿជាក់នោះ គិតគូរពីផលប្រយោជន៍ប្រទេសជាតិ ហើយពង្វក់ឲ្យយុវជនងប់ងល់ក្នុងការងារបម្រើប្រទេសជាតិ។ ផ្ទុយទៅវិញ ប្រសិនបើយុវជនធ្លាក់ខ្លួនជឿលើប្រជាភិថុតិរបស់អ្នកនយោបាយទុច្ចរិត នោះវិបត្តិសង្គមអាចនឹងកើតមានឡើងក៏ថាបាន។ ព្រោះសូមកុំភ្លេចថា យុវជន ជាជំពូកមនុស្សដែលមានសក្តានុពលខ្លាំង នៅក្នុងគ្រប់ការងារទាំងអស់ដែលពួកគេសម្រេចចិត្តចូលប្រឡូក។ កម្លាំងនិងថាមពលរបស់យុវជន ដែលបម្រើបក្សនយោបាយទុច្ចរិត មិនត្រឹមតែមិនបានរួមចំណែកអភិវឌ្ឍប្រទេសជាតិទេ វាថែមទាំងរុញឲ្យប្រទេសធ្លាក់ចូលទៅក្នុងភាពវឹកវរទៀតផង។
សរុបមកវិញ យុវជនត្រូវពិនិត្យពិចារណាឲ្យបានម៉ត់ចត់ មុនពេលសម្រេចចិត្តគាំទ្រ ចូលរួម ឬបម្រើគណបក្សនយោបាយណាមួយ។ ការសម្រេចចិត្តគួរធ្វើឡើងដោយផ្អែកទៅលើគោលនយោបាយនិងការអនុវត្តរបស់គណបក្សនោះផ្ទាល់ ចៀសវាងសម្រេចចិត្តផ្អែកតាមអារម្មណ៍ ឬការជឿជាក់ទៅលើការឃោសនាប្រជាភិថុតិ។ យុវជនគឺជាសសរទ្រូងនៃប្រទេសជាតិ ជាទំពាំងស្នងឫស្សី និងជាកម្លាំងចលករដ៏សំខាន់ក្នុងការចូលរួមសម្រេចជោគវាសនារបស់ប្រទេសជាតិ។ ការសម្រេចចិត្តត្រឹមត្រូវ នឹងនាំឲ្យជាតិរុងរឿង។ ខណៈការសម្រេចចិត្តខុសរបស់យុវជន អាចធ្វើឲ្យប្រទេសជាតិធ្លាក់ទៅក្នុងគ្រោះមហន្តរាយ។ ទន្ទឹមនឹងការចូលរួមក្នុងវិស័យនយោបាយ យុវជនខ្លួនឯងត្រូវព្យាយាមពង្រឹងនិងពង្រីកសមត្ថភាពរបស់ខ្លួនបន្ថែមទៀត ដើម្បីរួមចំណែកកសាងជាតិឲ្យមានលូតលាស់ទៅមុខប្រកបដោយវឌ្ឍនភាព៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ