កម្ពុជាប្រារព្ធទិវាសេរីភាពសារព័ត៌មានពិភពលោក ចំពេលមានការចាត់ថ្នាក់ល្អជាងមុន
ប្រទេសកម្ពុជានៅថ្ងៃទី៣ឧសភានេះ បានប្រារព្ធទិវាសេរីភាពសារព័ត៌មានពិភពលោកក្រោមប្រធានបទ “សិទ្ធិទទួលព័ត៌មាន ជាសិទ្ធិរបស់អ្នក”។ ការប្រារព្ធទិវានេះឡើង គឺចំពេលដែលប្រទេសកម្ពុជាត្រៀមអនុម័តច្បាប់ដ៏សំខាន់មួយ ស្តីពី សិទ្ធិទទួលបានព័ត៌មានជាលើកដំបូង និងចំពេលដែលប្រទេសកម្ពុជា ត្រូវបានអង្គការការពារអ្នកកាសែតគ្មានព្រំដែន Reporters Without Borders បានចាត់ថ្នាក់ជាប្រទេសដែលមានភាពល្អប្រសើរខាងសេរីភាពសារព័ត៌មាន។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤២
ការប្រារព្ធទិវាសេរីភាពសារព័ត៌មានពិភពលោក៣ឧសភាឆ្នាំ២០១៦នេះ បានធ្វើឡើងនៅក្នុងបរិយាកាសល្អប្រសើរមួយ។ ល្អប្រសើរ គឺដោយសារតែនៅឆ្នាំ២០១៦នេះ សេរីភាពសារព័ត៌មានរបស់កម្ពុជា ត្រូវបានអង្គការការពារអ្នកកាសែតគ្មានព្រំដែន ”Reporters Without Borders” បានចាត់ចំណាត់ថ្នាក់លេខ១២៨ថាល្អប្រសើរ នៅក្នុងចំណោមប្រទេសចំនួន ១៨០។ ហើយបើប្រៀបធៀបជាមួយនឹងប្រទេសជាសមាជិកអាស៊ានទាំង១០ គឺកម្ពុជា មានសេរីភាពសារព័ត៌មានល្អជាងគេ និងប្រសើរជាងប្រទេសមួយចំនួនទៀត នៅតំបន់អាស៊ី។ សូមបញ្ជាក់ថា កាលពីឆ្នាំ២០១៥ សេរីភាពសារព័ត៌មានរបស់កម្ពុជា ត្រូវបានអង្គការដដែលនេះ ចាត់ចំណាត់ថ្នាក់លេខ ១៣៩ ក្នុងចំណោមប្រទេសចំនួន១៨០។
អ្វីដែលជាការប្រសើរទៅទៀតនោះ កម្ពុជាពេលនេះ កំពុងស្ថិតនៅក្នុងផ្លូវដ៏ត្រឹមត្រូវមួយ ក្នុងការរៀបចំពង្រាងច្បាប់ស្តីពីសិទ្ធិទទួលបានព័ត៌មាន។ នេះបើតាមការកត់សំគាល់របស់អ្នកជំនាញ និងលោករដ្ឋមន្រ្តីក្រសួងព័ត៌មាន ខៀវ កាញារិទ្ធិ នៅក្នុងពិធីជួបជុំអ្នកកាសែត ដែលបានប្រារព្ធធ្វើឡើងនៅថ្ងៃនេះ នៅឯសណ្ឋាគាកំាបូឌីយ៉ាណាក្នុងក្រុងភ្នំពេញ។
បើតាមលោក ខៀវ កាញារិទ្ធិ សេចក្តីព្រាងច្បាប់ស្តីពីសិទ្ធិទទួលបានព័ត៌មាន ដែលមានចំនួន៩ជំពូក និងជិត៤០មាត្រានោះ កំពុងដាក់ឲ្យក្រុមអ្នកជំនាញមកពីអង្គការសង្គមស៊ីវិល អ្នកកាសែត ជជែកគ្នា ដើម្បីសម្រេចបានសេចក្តីព្រាងច្បាប់មួយ ដែលអាចទទួលយកបានទាំងអស់គ្នា។
ចំណែកលោក ប៉ែន បូណា ប្រធានក្លឹបអ្នកកាសែតកម្ពុជា បានចាត់ទុកថា សេចក្តីព្រាងច្បាប់នេះ ជួយពង្រឹងសិទ្ធិអំណាចរបស់អ្នកកាសែតកម្ពុជាថែមទៀត។ ហើយអ្នកកាសែតក៏នឹងអាចមុជកាន់តែជ្រៅថែមទៀត ដើម្បីសរសេររឿងរបស់ខ្លួន ព្រោះនៅក្នុងចំណុចមួយនៃសេចក្តីព្រាងច្បាប់នេះ បានកំណត់ពីការដាក់ពិន័យ ឬឈានទៅប្តឹងដល់តុលាការផង ប្រសិនបើមន្រ្តីសារធារណរបស់រដ្ឋ ឬស្ថាប័នណាមួយ មិនផ្តល់ព័ត៌មាន នៅពេលមានការស្នើសុំ។ ការស្នើសុំផ្តល់ព័ត៌មាន មិនមែនមានតែអ្នកកាសែតនោះទេ សូម្បីតែប្រជាពលរដ្ឋ និងជនបរទេសក៏អាចស្នើសុំបានផងដែរ។
បើទោះជាយ៉ាងនេះក្តី បើផ្អែកតាមកំណត់ត្រារបស់ក្លឹបអ្នកកាសែតកម្ពុជាបានឲ្យដឹងថា នៅឆ្នាំ២០១៥-២០១៦នេះ មានអ្នកកាសែតកម្ពុជាចំនួន៤ករណី កំពុងជាប់បណ្តឹងនៅក្នុងតុលាការ, ១៩ករណីរងការគំរាមចាប់ខ្លួន និង២០ករណីរងការគំរាមកំហែងដកហូតសម្ភារៈ និងម៉ាស៊ីនថត ខណៈដែលអ្នកកាសែតចំនួន៨៥នាក់នៅលើពិភពលោកកំពុងប្រឈមនឹងគ្រោះថ្នាក់នៅក្នុងការបំពេញការងាររបស់ពួកគេ។
សូមបញ្ជាក់ដែរថា ការប្រារព្ធទិវាសេរីភាពសារព័ត៌មានពិភពលោកនៅកម្ពុជាឆ្នាំនេះ ធ្វើឡើងក្រោមប្រធានបទ “សិទ្ធិទទួលព័ត៌មាន ជាសិទ្ធិរបស់អ្នក”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ