អ្នកកាសែតស្រ្តីកំពុងជួបបញ្ហាប្រឈម
នៅថ្ងៃទី២៩ ខែមេសា នេះ ក្រុមអង្គការដែលធ្វើការក្នុងវិស័យកសាងសន្តិភាព និងអភិវឌ្ឍន៍សង្គម បានឲ្យដឹងថាស្ត្រីជាអ្នកកាសែតកំពុងប្រឈមនឹងបញ្ហាជាច្រើនក្នុងសង្គម។ ចំណែកប្រធានក្លឹបអ្នកកាសែតកម្ពុជាវិញបានចាត់ទុកថាស្ត្រីជាអ្នកសារព័ត៌មានឱកាសច្រើនជាងបុរសជាអ្នកសារព័ត៌មាន។
ចុះផ្សាយនៅថ្ងៃ៖
ស្តាប់ - ០១:៥៥
ក្នុងវេទិកា និងរបាយការណ៍សង្ខេបស្តីពីស្ថានភាពសារព័ត៌មានរបស់ អង្គការក្រុមការងារដើម្បីដោះស្រាយទំនាស់ (ACT) អង្គការអប់រំយុវជន ដើម្បីអភិវឌ្ឍន៍ និងសន្តិភាព និងក្លឹបអ្នកកាសែតឯករាជ្យ បានឲ្យដឹងថាកាលពីឆ្នាំ២០១៥កន្លងទៅ អ្នកសារព័ត៌មាន ដែលជាស្ត្រីបានបង្ហាញក្តីព្រួយបារម្ភនៅក្នុងវិស័យសារព័ត៌មាន និងចង់ឲ្យមានច្បាប់ការពារអ្នកសារព័ត៌មានជាស្ត្រី និងចង់ឲ្យសង្គមគាំទ្រចំពោះពួកគេ។
ក្រុមអង្គការដែលធ្វើការក្នុងវិស័យកសាងសន្តិភាព និងអភិវឌ្ឍន៍សង្គមបានឲ្យដឹងទៀតថា ស្ត្រីជាអ្នកសារព័ត៌មានកំពុងប្រឈម នឹងបញ្ហាជាច្រើនដូចជា សង្គមមិនសូវផ្តល់តម្លៃ សុវត្ថិភាព ការរើសអើង និងកង្វះការគាំទ្រពីសង្គម។
លោកប៉ែន បូណា ប្រធានក្លឹបអ្នកកាសែតកម្ពុជាវិញ បានឲ្យដឹងកាលពីមុន គឺស្ត្រីជាអ្នកសារព័ត៌មានជួបនឹងបញ្ហាប្រឈមមួយចំនួនមែន ដោយសារស្ត្រីបានចាត់ទុកថាអាជីពនេះ គឺជាអាជីពរបស់បុរស។ ប្រធានក្លឹបអ្នកកាសែតរូបនេះបានលើកឡើងថា ប៉ុន្តែបច្ចុប្បន្ននេះ អាជីពជាអ្នកកាសែតត្រូវបានគេឲ្យតម្លៃ ដូច្នេះស្ត្រីលែងគិតថាអ្វីមួយជាអាជីពរបស់បុរស ឬអាជីពរបស់ស្ត្រីទៀតហើយ។
លោកបានបន្តឲ្យដឹងទៀតថា បច្ចុប្បន្ននេះ ចំនួនអ្នកកាសែតស្ត្រីមានការកើនឡើង ហើយស្ត្រីមានអាទិភាពជាងបុរស ដោយសារតែពួកគាត់ងាយទទួលបានព័ត៌មានជាងបុរស។ តែទោះបីជាយ៉ាងណាក្តីស្ត្រីក៏ បានជួបនឹងបញ្ហាប្រឈមមួយចំនួនដូចជា ដូចជាការធ្វើការពេលយប់ ឬធ្វើការច្រើនជាងការងារដទៃ ប៉ុន្តែពួកគាត់មិនទាន់ជួបនឹងបញ្ហាគ្រោះថ្នាក់ដល់ស្ត្រីជាអ្នកសារព័ត៌មាននៅឡើយ។
សូមបញ្ជាក់ថានៅព្រឹកនេះ អង្គការក្រុមការងារដើម្បីដោះស្រាយទំនាស់(ACT) អង្គការអប់រំយុវជនដើម្បីអភិវឌ្ឍន៍ និងសន្តិភាព និងក្លឹបអ្នកកាសែតឯករាជ្យ បានរៀបចំវេទិកា ដើម្បីអបអរទិវាសេរីភាពសារព័ត៌មានឆ្នាំ២០១៦ ដោយបានជជែកពិភាក្សាពីបញ្ហាប្រឈម និងដំណោះស្រាយរបស់អ្នកសារព័ត៌មានអាជីពផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ