ខ្មែរកំពុងពួតដៃគ្នាដើម្បីរើខ្លួនចេញពីវៀតណាម?
ចុះផ្សាយនៅថ្ងៃ៖
ស្តាប់ - ០៤:៣៩
តាមរយៈការគាស់កកាយរបស់តំណាងរាស្ត្រគណបក្សប្រឆាំង បញ្ហាព្រំដែនរវាងកម្ពុជានិងវៀតណាម បានពុះកញ្ជ្រោលឡើងសាជាថ្មី។ នៅពេលបក្សប្រឆាំងកកូរកកាយរឿងព្រំដែន រដ្ឋាភិបាលគណបក្សកាន់អំណាចឯណេះវិញ ក៏បានបណ្ដេញជនអន្តោប្រវេសន៍ខុសច្បាប់វៀតណាមចេញពីកម្ពុជាជាបន្តបន្ទាប់ដែរ។ ផ្អែកតាមកិច្ចខិតខំប្រឹងប្រែងរបស់បក្សទាំងពីរនេះ តើវាអាចទៅរួចដែរឬទេថា ខ្មែរកំពុងតែពួតដៃគ្នា ដើម្បីរើខ្លួនចេញពីប្រទេសវៀតណាម?
ការតវ៉ាលើបញ្ហាព្រំដែនកម្ពុជាវៀតណាម របស់តំណាងរាស្ត្រគណបក្សសង្គ្រោះជាតិ បានទទួលជោគជ័យនឹកស្មានមិនដល់។ តាំងពីខេត្តត្បូងឃ្មុំ ខេត្តរតនគិរី ខេត្តកណ្ដាល រហូតដល់ខេត្តស្វាយរៀង តំណាងរាស្ត្របក្សប្រឆាំងបានចុះទៅពិនិត្យដល់តំបន់ព្រំដែន បើទោះបីជាត្រូវប្រឈមនឹងការហាមឃាត់របស់អាជ្ញាធរ ឆ្កែរបស់សមត្ថកិច្ចវៀតណាម និងដំបងរបស់ពលរដ្ឋវៀតណាមក៏ដោយចុះ។ ក្រៅពីដំណើរទៅកាន់ព្រំដែន តំណាងរាស្ត្របក្សប្រឆាំងក៏បានទាមទារដោយផ្ទាល់មាត់ និងជាលាយលក្ខណ៍អក្សរទៅកាន់រដ្ឋាភិបាលកម្ពុជា ឲ្យពន្យល់បំភ្លឺ និងដោះស្រាយបញ្ហាព្រំដែនជាមួយវៀតណាមផងដែរ។
កិច្ចខិតខំប្រឹងប្រែងរបស់គណបក្សប្រឆាំងលើបញ្ហាព្រំដែននេះ នៅទីបំផុត បានទទួលផលផ្លែផ្កាគួរឲ្យកត់សម្គាល់។ ថ្វីត្បិតតែមិនទាន់ឈានទៅដល់ការដោះស្រាយតាមផ្លូវតុលាការអន្ដរជាតិ ស្របតាមការទាមទាររបស់បក្សប្រឆាំងក៏ដោយ ក៏យ៉ាងហោចណាស់ គណៈកម្មការចម្រុះកិច្ចការព្រំដែនកម្ពុជាវៀតណាម បានកំណត់ពេលជួបជជែកគ្នា។ ជាជំនួបដើម្បីដោះស្រាយបញ្ហាដែលផ្ទុះឡើងនាពេលថ្មីៗនេះ ព្រមទាំងការមិនចុះសម្រុងគ្នានៅព្រំដែនដែលនៅសេសសល់។
ប្រសិនបើមើលមួយភ្លែត គេអាចវាយតម្លៃបានថា លទ្ធផលចុងក្រោយនេះ គឺបានមកពីការតវ៉ាប្រឆាំងជាបន្តបន្ទាប់របស់គណបក្សប្រឆាំង។ ប៉ុន្តែបើមើលឲ្យជ្រៅទៅទៀត គេអាចនឹងឃើញសេណារីយោផ្សេង។ សេណារីយោផ្សេង ដែលថា លទ្ធផលនេះ បានមកពីការពួតដៃគ្នារវាងគណបក្សប្រជាជនកម្ពុជា និងគណបក្សសង្គ្រោះជាតិ។
ជាប្រវត្តិសាស្ត្រប្រកែកមិនបាន បក្សប្រជាជនបានរីកធំធាត់ឡើងដោយមានការផ្ចុងផ្ដើមពីបក្សកុំម្មុយនីស្តវៀតណាម។ ហេតុនេះ ក្នុងការប្រឈមមុខនឹងវៀតណាមនៅចំពោះមុខបញ្ហាព្រំដែនដ៏រសើប វាជារឿងដ៏សែនពិបាកសម្រាប់រដ្ឋាភិបាលកម្ពុជា ដឹកនាំដោយគណបក្សប្រជាជន។ បើទោះបីជាពិបាកយ៉ាងណាក៏ដោយ បក្សកាន់អំណាចចាំបាច់ត្រូវរើបំរះខ្លួនពីវៀតណាមឲ្យខាងតែបាន ព្រោះបើពុំដូច្នោះទេ ប្រជាប្រិយភាពរបស់បក្សនេះ អាចនឹងថមថយទៀត នៅក្នុងការបោះឆ្នោតខាងមុខ។
នៅក្នុងបរិបទបែបនេះ និងបន្ទាប់ពីបក្សជាប់ឆ្នោតទាំងពីរនៅកម្ពុជាបង្កើតវប្បធម៌សន្ទនា វាគឺជាពេលវេលាដ៏ប្រសើរដែលកម្ពុជា ត្រូវរួមដៃគ្នា ការពារឲ្យបាននូវផលប្រយោជន៍ផ្សេងៗរបស់ប្រទេសជាតិ។
នៅក្រោមសម្ពាធតវ៉ាប្រឆាំងយ៉ាងដាច់ណាត់របស់បក្សប្រឆាំងលើបញ្ហាព្រំដែន គណបក្សកាន់អំណាចមានលេសក្នុងការជជែករឿងព្រំដែនជាមួយវៀតណាម ដើម្បីឈានទៅរកការដោះស្រាយប្រកបដោយការទទួលខុសត្រូវ និងអាចទទួលយកបានពីគ្រប់ភាគីទាំងអស់។ គួរឲ្យកត់សម្គាល់ថា មុននឹងមានជំនួបរវាងគណៈកម្មការចម្រុះព្រំដែននៃប្រទេសទាំងពីរ រដ្ឋាភិបាលដឹកនាំដោយបក្សប្រជាជនកម្ពុជា បានធ្វើការតវ៉ាផ្ទាល់មាត់ និងជាលាយលក្ខណ៍អក្សរទៅកាន់ប្រទេសវៀតណាម ដែលបានរំលោភចូលដែនអធិបតេយ្យកម្ពុជា។
ដោយឡែក នៅពេលបញ្ហាព្រំដែនត្រូវបានបក្សប្រឆាំងកកូរកកាយ រដ្ឋាភិបាលគណបក្សកាន់អំណាចឯណេះវិញ ក៏បានបណ្ដេញជនអន្តោប្រវេសន៍ខុសច្បាប់វៀតណាមចេញពីកម្ពុជាជាបន្តបន្ទាប់ដែរ។ ជនជាតិវៀតណាមរាប់ពាន់នាក់ ដែលចូលមកធ្វើការខុសច្បាប់នៅកម្ពុជា ត្រូវបានប៉ូលីសអន្តោប្រវេសន៍ខ្មែរឃាត់ខ្លួន និងបញ្ជូនចេញជាហូរហែ។ ក្រៅពីប៉ូលីសអន្តោប្រវេសន៍ អាជ្ញាធរបានសម្រេចបណ្ដេញជនជាតិវៀតណាមដែលរស់នៅខុសច្បាប់នៅតំបន់កំពង់ចម្លងអរិយក្សត្រ ឲ្យចាកចេញដោយគ្មានលក្ខខណ្ឌផងដែរ។
ផ្អែកតាមកិច្ចខិតខំប្រឹងប្រែងរបស់បក្សទាំងពីរនេះ តើវាអាចទៅរួចដែរឬទេថា ខ្មែរកំពុងតែពួតដៃគ្នា ដើម្បីរើខ្លួនចេញពីប្រទេសវៀតណាម? គ្មាននរណាម្នាក់អាចឆ្លើយសំណួរនេះបានទេ ក្រៅតែពីតួអង្គអ្នកនយោបាយខ្លួនឯង។ ប៉ុន្តែប្រសិនបើវាជាការពិត នោះវាមិនត្រឹមតែធ្វើឲ្យកម្ពុជាចំណេញប៉ុណ្ណោះទេ ប៉ុន្តែវាក៏ធ្វើឲ្យបក្សជាប់ឆ្នោតទាំងពីរចំណេញផងដែរ។ បញ្ហាជនអន្តោប្រវេសន៍វៀតណាម និងបញ្ហាព្រំដែនជាមួយវៀតណាម គឺជាបញ្ហារ៉ាំរ៉ៃដែលកើតឡើងជាយូរមកហើយសម្រាប់កម្ពុជា។ ដូច្នេះ វាគួរតែដល់ពេលហើយ ដែលខ្មែរត្រូវរួបរួមគ្នារើខ្លួនចេញពីការគាបសង្កត់របស់វៀតណាម។ ត្រូវរើខ្លួនចេញពីវៀតណាម មុននឹងលែងមានឱកាសល្អរបៀបនេះនាពេលអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ