តើសាលាក្រុងទុកឲ្យមានក្លិនឆ្អេះឆ្អាប និងក្លិនស្អុយពីសំរាមនៅមាត់ទន្លេ និងមុខព្រះបរមរាជវាំងដល់ពេលណាទៀត?
ចុះផ្សាយនៅថ្ងៃ៖
ស្តាប់ - ០៣:១០
នេះមិនមែនជារឿងថ្មីនោះទេ ដែលបរិយាកាសនៅតាមសួនច្បារមាត់ទន្លេ និងព្រះបរមរាជវាំងពោរពេញទៅដោយក្លិនឆ្អេះឆ្អាប និងក្លិនស្អុយពីសំរាមនោះ។ មាត់ទន្លេគួរតែជាទីមួយ ដែលមានខ្យល់អាកាសល្អបរិសុទ្ធ ប៉ុន្តែមាត់ទន្លេនៅក្នុងទីក្នុងភ្នំពេញបែរជាពោរពេញទៅដោយខ្យល់អាកាសមួយដ៏អាប់អួរ ហើយថែមទាំងពិបាកទាំងដកដង្ហើមទៀត។ ពិតណាស់ថាជារៀងរាល់ព្រឹកមានមនុស្សម្នាជាច្រើន ដើរហាត់ប្រាណទៅវិញទៅមក ប៉ុន្តែពួកគេត្រូវដើរឆ្លងកាត់កន្លែងមានសំរាមរាយប៉ាយ និងចោលក្លិនស្អុយ ហើយនិងក្លិនឆ្អេះឆ្អាបពីការបន្ទោរបង់ពាសវាលពាសកាលនៅក្នុងតំបន់នោះ។ តើហេតុអ្វីបានជាកន្លែងដ៏ស្រស់ស្អាត និងជាមុខមាត់របស់រាជធានីភ្នំពេញមួយនេះ បែរទៅជាកន្លែងដែលមានក្លិនអសោធទៅវិញ។ តើសាលាក្រុងគួរតែបន្តឲ្យមានការបន្ទោបង់ពាសវាលពាសកាលបែបនេះ នៅទីដែលជាមុខមាត់របស់រាជធានីភ្នំពេញដល់ពេលណាទៀត?
ជារឿងរាល់ព្រឹកព្រលឹម អ្នកបោសសំអាត និងប្រមូលសំរាមតែងតែដើរបោស និងប្រមូលសំរាម ដែលចោលរបាត់រប៉ាយ មិនថានៅលើឥដ្ឋ និងលើបង់សម្រាប់អង្គុយនោះទេ។ សំរាមដែលគេឃើញមិនដែលលួសពេល នោះគឺកាកអំពៅ សំបកខ្ចៅ សណ្តែកដី ថង់ផ្លាស្ទីក និងដបស្រាជាដើម។ ក្រៅពីសំរាមហើយ នៅមានអ្នកដែលបន្ទោបង់ មិនថាចាស់ ឬក្មេងនោះទេ គឺសុទ្ធតែគ្មានការខ្មាសអៀន បើទោះបីជាទីនោះជាទីសាធារណៈ និងមានមនុស្សម្នាដើរឆ្លងកាត់ទៅវិញទៅមកច្រើនក៏ដោយ។
មានមនុស្សមិនតិចទេធ្វើការថែទាំនៅតាមសួនច្បារមាត់ទន្លេជារៀងរាល់ថ្ងៃ ដែលមានទាំងអ្នកដើរប្រមូលសំរាម ផ្លាស់ប្តូរថង់ផ្លាស្ទិកធំៗតាមធុងសំរាម ស្រោចទឹកផ្កា និងស្មៅ ហើយនិងអ្នកកាត់ស្មៅជាដើម។ ប៉ុន្តែភាពស្អាត ហាក់នៅមិនទាន់គ្រប់គ្រាន់សម្រាប់បរិវេណមាត់ទន្លេ ដែលធ្វើឲ្យមនុស្សជាច្រើនខ្លាចរអា និងមិនចូលចិត្តក្លិននៅទីនោះ។
សំណួរសួរថាហេតុអ្វីបានជាមាត់ទន្លេនៅក្នុងទីក្រុងភ្នំពេញមានក្លិនមិនល្អបែបនេះ។ តើមកពីអាជ្ញាធរនៅក្នុងតំបន់មិនអើពើ ចង់ទុកឲ្យមានក្លិនអញ្ចឹង ឬមកពីប្រជាជនមួយក្រុមតូច ដែលចេះតែនៅបន្តចោលសំរាម និងបន្ទោបង់ផ្តេសផ្តាស់បើទោះបីជាមានថង់សំរាម និងបង្គន់សាធារណៈនៅទីនោះហើយក៏ដោយ។ តើអ្នកណាខ្លះគួរតែចូលរួមដោះស្រាយបញ្ហានេះ។
ពិតណាស់ថា បញ្ហានេះមិនអាចមានតែខាងសាលារាជធានីភ្នំពេញតែម្ខាងនោះទេ គឺប្រជាពលរដ្ឋខ្មែរផ្ទាល់ក៏ត្រូវចូលរួមកែលម្អដើម្បីបរិស្ថានរស់នៅប្រចាំថ្ងៃ និងក៏ដើម្បីមុខមាត់រាជធានីភ្នំពេញ និងសាកសមជារាជធានីមួយដែលស្រស់ស្អាតនិងពោរពេញទៅដោយអនាម័យ របស់ព្រះរាជាណាចក្រអច្ឆរិយៈផងដែរ។
ការអប់រំតាមរយៈប្រព័ន្ធផ្សព្វផ្សាយក៏ជាមធ្យោបាយមួយ ដើម្បីបញ្ជៀបការយល់ដឹងអំពីអនាម័យ និងបរិស្ថានដល់ប្រជាពលរដ្ឋទូទៅផងដែរ។ និងជាពិសេសអ្នកដែលស្នាក់នៅលើទីតាំងនោះផ្ទាល់តែម្តង ព្រោះជារៀងរាល់ថ្ងៃ ឃើញមានមនុស្សជាច្រើនរស់នៅទីនោះ ដោយឃើញមានទាំងមុង ខ្នើយ កន្ទេល និងអង្រឹងជាដើម។
កន្លងមកការផាកពិន័យចំពោះការចោលសំរាមនៅទីសាធារណៈមានរួចហើយ ប៉ុន្តែការផាកពិន័យនេះ ហាក់ធ្វើឡើងមិនបានដិតដល់ ដោយសារតែគេសង្កេតឃើញនៅតែមានមនុស្សបំពាន ហើយបន្តឲ្យមានសំរាមនៅរាយប៉ាយនៅលើអដ្ឋជារៀងរាល់ថ្ងៃ។ ការផាកពិន័យក៏ត្រូវតែមានចំពោះការបន្ទោបង់ផងដែរ ព្រោះថាវាបានបណ្តាលឲ្យមានក្លិនឆ្អេះឆ្អាបយ៉ាងខ្លាំងនៅបរិវេណមាត់ទន្លេជាប្រចាំ និងមានរយៈពេលយូរឆ្នាំណាស់មកហើយ។
មួយវិញទៀតការត្រួតពិនិត្យ និងយាមកាមនៅពេលយប់ព្រលប់ក៏អាចជាការបង្ការមួយ ដើម្បីកុំឲ្យមានអ្នកប្រព្រឹត្តិខុសឆ្គង បន្តទៅទៀត ហើយការលាងសំអាតក៏អាចជាជម្រើសមួយ ដើម្បីកំចាត់រាល់ក្លិនមិនល្អចេញពីទីនោះផងដែរ។ ទន្ទឹមនឹងការស្ថាបនាផ្លូវសម្រាប់ប្រជាពលរដ្ឋដើរកំសាន្ត និងហាត់ប្រាណនៅតាមមាត់ទន្លេហើយនោះ សាលារាជធានី គួរតែមានវិធានការមួយឲ្យបានច្បាស់លាស់និងធ្វើឲ្យខានតែបាន ដើម្បីធ្វើយ៉ាងណា ឲ្យតំបន់មាត់ទន្លេប្រែក្លាយទៅជាមានខ្យល់អាកាសល្អបរិសុទ្ធ និងសាកសមជាកន្លែងដែលប្រជាពលរដ្ឋនៅក្នុងទីក្រុងភ្នំពេញទៅសម្រាកលម្ហែ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ