ល្បឿនជាហេតុផល គួរយកចិត្តទុកដាក់មុនគេ ដើម្បីកាត់បន្ថយការស្លាប់និងរបួស
ចុះផ្សាយនៅថ្ងៃ៖
ស្តាប់ - ០៤:៥៦
ការរឹតបន្តឹងការអនុវត្តច្បាប់ចរាចរណ៍គឺជាការចាំបាច់ ហើយគួរតែចាប់ផ្តើមជាយូរមកហើយ ដើម្បីជួយកាត់បន្ថយការស្លាប់ និងរបួសដោយសារគ្រោះថ្នាក់ចរាចរណ៍ ដែលគួរឲ្យព្រួយបារម្ភ។ គេអាចនិយាយបានថា ជាការយឺតពេលបន្តិចក្នុងការរឹតបន្តឹងច្បាប់ចរាចរណ៍នៅកម្ពុជា បើប្រៀបធៀបទៅសន្តិភាពដែលប្រទេសនេះទទួលបាន។ ក៏ប៉ុន្តែមិនថ្វីទេ សម្រាប់ពេលនេះគេគួរតែរឹតបន្តឹងចំណុចជាអត្ថិភាពមុនគេ ដែលនាំឲ្យមានមនុស្សស្លាប់និងរបួសមិនថមថយនោះ ដូចជាការរឹតបន្តឹងការត្រួតពិនិត្យល្បឿន និងបើកបរមានជាតិអាល់កុលជាដើម។
ជាការពិត គេមិនអាចធ្វើការសន្និដ្ឋានដោយប្រញ៉ាប់ប្រញ៉ាល់ពេកទេ ចំពោះការរឹតបន្តឹងការអនុវត្តច្បាប់ចរាចរណ៍ផ្លូវគោក ដែលមកទល់ពេលនេះ មិនទាន់បាន១ខែផងនោះ។ ក៏ប៉ុន្តែគេអាចកត់សម្គាល់បានខ្លះៗពីការអនុវត្តរឹតបន្តឹងច្បាប់នេះ ដោយសារចំណុចសំខាន់ៗ ដែលជាដើមចមនៃកំណើនគ្រោះថ្នាក់ចរាចរណ៍ ហាក់ដូចជាមិនត្រូវបានពង្រឹងជាអត្ថិភាព។ ចំណុចទាំងនោះគឺការបើកបរហួសល្បឿនកំណត់ និងបើកបរក្រោមឥទ្ធិពលនៃជាតិស្រវឹង។
តាមការកត់សម្គាល់ប្រមាណជា១សប្តាហ៍ចុងក្រោយនេះ ឃើញថាមូលហេតុនៃគ្រោះថ្នាក់ចរាចរណ៍ ដែលបានកើតឡើងភាគច្រើនគឺការប្រើប្រាស់ល្បឿន។ គ្រោះថ្នាក់ដោយជាប់ទាក់ទងទៅនឹងគ្រឿងស្រវឹង និងការវ៉ា ជែងប្រកបគ្រោះថ្នាក់ក៏បានកើតឡើងច្រើនដែរក្នុងចំណោមគ្រោះថ្នាក់ចរាចរណ៍ក្នុងមួយថ្ងៃៗ។ អ្វីដែលជាការកត់សម្គាល់គ្រោះថ្នាក់ចរាចរណ៍ស្ទើរតែ៧០ទៅ៨០ភាគរយ បានកើតឡើងនៅពេលយប់ ក្នុងនោះមានមនុស្សក្នុងរង្វង់ពី៤ទៅ៥នាក់ជាមធ្យមបានស្លាប់ក្នុងមួយថ្ងៃ ដោយគ្រោះថ្នាក់ចរាចរណ៍នេះ នេះបើមើលទៅលើរបាយការណ៍របស់ប៉ូលិសចរាចរណ៍ចាប់ពីថ្ងៃទី១២ ដល់ថ្ងៃទី១៨ មករា កន្លងទៅនេះ។
ងាកទៅមើលការរឹតបន្តឹងការអនុវត្តច្បាប់ចរាចរណ៍ផ្លូវគោកវិញ ដែលប្រទេសកម្ពុជាបានចាប់ផ្តើមកាលពីថ្ងៃទី១មករា ឆ្នាំ២០១៦មក មន្ត្រីប៉ូលិសចរាចរណ៍មិនបានផ្តោតទៅលើចំណុចសំខាន់ទាំងអស់នោះទេ គឺអនុវត្តជាទូទៅដូចអ្វីដែលបានចែងនៅក្នុងច្បាប់ លើកលែងតែករណីខ្លះប៉ុណ្ណោះ ដែលមានការតវ៉ា ហើយត្រូវពន្យាពេល។
ជាការពិតការអនុវត្តច្បាប់ មន្ត្រីអនុវត្តតែងប្រតិបត្តិគ្រប់ចំណុចស្មើៗគ្នា ដោយមិនឃើញមានការរឹតបន្តឹងឲ្យចំគោលដៅចំបង ដែលបណ្តាលឲ្យតួលេខអ្នកស្លាប់ដោយគ្រោះថ្នាក់ចរាចរណ៍ហើមប៉ោងនោះ។ ក៏ប៉ុន្តែធ្វើដូច្នេះ គេអាចមើលឃើញថាការអនុវត្តច្បាប់ចរាចរណ៍នឹងមិនបានជោគជ័យទេលើចំណុចអ្នកស្លាប់នេះ ដោយសារកន្លងមកគោលដៅកាត់បន្ថយគ្រោះថ្នាក់ចរាចរណ៍ឲ្យបាន៥ភាគរយក្នុងមួយឆ្នាំបានបរាជ័យរួចហើយ សម្រាប់គោលដៅរួមរយៈពេល១០ឆ្នាំ។
ដូច្នេះការត្រួតពិនិត្យល្បឿននៅតាមដងផ្លូវ អាចនិយាយបានថាជាការងារចាំបាច់ជាងគេនៅក្នុងយុទ្ធនាការរឹតបន្តឹងការអនុវត្តច្បាប់ចរាចរណ៍។ ការបើកបរក្រោមឥទ្ធិពលនៃគ្រឿងស្រវឹង ក៏ត្រូវពិនិត្យមើលដោយយកចិត្តទុកដាក់ដែរ។
ក៏ប៉ុន្តែដើម្បីអនុវត្តការត្រួតពិនិត្យការប្រើប្រាស់ល្បឿននេះ ឲ្យបានពេញលេញ គប្បីមានឧបករណ៍ត្រួតពិនិត្យល្បឿនឲ្យបានគ្រប់គ្រាន់ ជាពិសេសតាមផ្លូវជាតិនិងផ្លូវខេត្ត។ ផ្ទុយទៅវិញ បច្ចុប្បន្ន ឧបករណ៍ត្រួតពិនិត្យល្បឿននៅមិនទាន់គ្រប់គ្រាន់នៅឡើយ ពោលគឺខេត្តខ្លះមានមួយគ្រឿង ហើយខេត្តខ្លះមិនទាន់មាននៅឡើយ ខណៈដែលប្រទេសកម្ពុជាបានចាប់ផ្តើម អនុវត្តរឹតបន្តឹងការគោរពច្បាប់ជិតមួយខែទៅហើយ។
រីឯឥរិយាបទអ្នកបើកបរក៏ត្រូវបានកត់សម្គាល់ថានៅតែជាបញ្ហានៅឡើយ។ នៅពេលដែល អ្នកបើកបរមួយចំនួនមិនព្រមបោះបង់ឥរិយាបទដែលជាទំលាប់អាក្រក់ចោលនោះ វាអាចជះឥទ្ធិពលដល់ការអនុវត្តច្បាប់ចរាចរណ៍ផងដែរ។ ជះឥទ្ធិពលដោយសារទម្លាប់អាក្រក់របស់ពួកគេដែរ មហាជនសម្គាល់ឃើញថា ជាក្រុមអ្នកអាងបុណ្យសក្តិ និងអាងធនធានមួយក្តាប់នោះ នឹងបង្កគ្រោះថ្នាក់ចរាចរណ៍ដដែល។
ហើយទម្លាប់ដែលពួកគេធ្វើដោយមិនខ្វល់នឹងច្បាប់ និងបំពានទៅលើអ្នកប្រើប្រាស់ផ្លូវដទៃទៀតនោះ គឺការវ៉ាខាងស្តាំ ការជែងក្នុងស្ថានភាពចរាចរណ៍ចង្អៀត ការឡើងជាច្រើនជួរឈ្មុលទៅមុខ ដោយមិនមានការយោគយល់ ធ្វើឲ្យការកកស្ទះចរាចរណ៍តិចតួចក្លាយទៅជារើខ្លួនមិនរួច ការបើកភ្លើងហ្វាររបស់រថយន្តទំនើបរំខានការធ្វើដំណើរបញ្ច្រាស់ទិសគ្នានៅពេលយប់ឬស៊ីផ្លេសន្ធាប់ទៅលើអ្នកធ្វើដំណើរឯទៀត ដែលជាពលរដ្ឋធម្មតាធ្វើដំណើរស្របទិសគ្នាជាដើម។
ទន្ទឹមគ្នានេះដែរ អាជ្ញាធរពាក់ព័ន្ធក្នុងនោះមានក្រសួងសាធារណៈការ ក៏ត្រូវពន្លឿនខ្លួនឯងដែរពីការបំពេញកង្វះខាត ក្នុងនោះការបំពាក់ផ្លាកសញ្ញាចរាចរណ៍ ការដាក់ចំណាំងផ្លាតឲ្យបាន គ្រប់គ្រាន់ កែលម្អហេដ្ឋារចនាសម្ព័ន្ធផ្លូវថ្នល់ ដែលបានខូចខាត ដោយសាររថយន្តដឹកទំនិញធ្ងន់ៗនារដូវវស្សាកន្លងមក។ល។
ទាំងអស់នេះជាការរួមចំណែកមួយក្នុងការជួយឲ្យកំណើនគ្រោះថ្នាក់ចរាចរណ៍ និងកំណើនមនុស្សស្លាប់ ដោយសារចរាចរណ៍មានការថយចុះដែរ។ សូមបញ្ជាក់ថាជាច្រើនឆ្នាំកន្លងមកគ្រោះថ្នាក់ចរាចរណ៍នៅកម្ពុជាបានសម្លាប់មនុស្សជាមធ្យមក្នុងរង្វង់៦នាក់ក្នុងមួយថ្ងៃ។ គឺច្រើនជាងគ្រោះថ្នាក់ដោយសារជំងឺអេដស៍និងដោយសារគ្រាប់ម៉ីនទៅទៀត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ