ក្រសួងការពារជាតិប្រកាសថា កំណត់បានអត្តសញ្ញាណអ្នកអំពាវនាវឲ្យធ្វើរដ្ឋប្រហារហើយ
នៅទីបំផុតទៅ ក្រសួងការពារជាតិបានប្រកាសថា ខ្លួនកំណត់បានអត្តសញ្ញាណរបស់ជនសង្ស័យ ដែលអំពាវនាវឲ្យធ្វើរដ្ឋប្រហារទម្លាក់លោកនាយករដ្ឋមន្រ្តី ហ៊ុន សែន បានហើយនៅថ្ងៃទី២០កក្កដានេះ បន្ទាប់ពីមានការស៊ើបអង្កេតជាបន្តបន្ទាប់មក។ បើតាមអ្នកនាំពាក្យក្រសួងការពារជាតិ ក្រសួងកំពុងតែបន្តធ្វើការងារនេះជាសំងាត់ ដើម្បីឈានទៅឃាត់ខ្លួនជនសង្ស័យដែលគេដឹងថា ស្ថិតនៅក្នុងជួរកងទ័ពនេះ។វ៉ា សំណព្វ លំអិតព័ត៌មាននេះ៖
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៩
អត្តសញ្ញាណរបស់ជនសង្ស័យ ដែលអំពាវនាវឲ្យមានការធ្វើរដ្ឋប្រហារទម្លាក់លោកនាយករដ្ឋមន្រ្តី ហ៊ុន សែន ត្រូវបានកំណត់រួចហើយ ប៉ុន្តែត្រូវបានលាក់ជាការសំងាត់សិន។ នេះបើតាមការបញ្ជាក់ពីលោកនាយឧត្តមសេនីយ៍ ឈុំ សុជាតិ អ្នកនាំពាក្យក្រសួងការពារជាតិ នៅថ្ងៃទី២០ កក្កដា ឆ្នាំ២០១៦នេះ។
គួរជម្រាបជូនថា មុនការប្រកាសពីការកំណត់អត្តសញ្ញាណរបស់ជនសង្ស័យរូបនេះ អគ្គបញ្ជាការដ្ឋាននៃកងយោធពលខេមរភូមិន្ទ បានពិនិត្យបញ្ជីឈ្មោះកងទ័ពប្រមាណជា១០ម៉ឺននាក់នៅថ្ងៃទី២០កក្កដានេះ ក្រោយពីសង្ស័យថា ជនដែលប្រកាសធ្វើរដ្ឋប្រហារដើម្បីផ្តួលរំលំរាជរដ្ឋាភិបាលស្របច្បាប់របស់កម្ពុជានេះ ស្ថិតនៅក្នុងជួរកងទ័ព។ ប៉ុន្តែយ៉ាងណាក៏ដោយ លោកនាយឧត្តមសេនីយ៍ នៅមិនទាន់ប្រាប់ពីអត្តសញ្ញាណរបស់ជនសង្ស័យរូបនេះជាសាធារណៈនៅឡើយទេ រហូតមានការចាប់ខ្លួនជនសង្ស័យរូបនេះ។
សូមបញ្ជាក់ថា ចាប់តាំងពីថ្ងៃទី១៩កក្កដាមក ក្រសួងការពារជាតិកម្ពុជា បានប្រកាសបើកការស៊ើបអង្កេត និងតាមស្វែងរកចាប់ខ្លួនបុរសម្នាក់ ដែលហៅខ្លួនឯងថា វ៉េប៉េ៩ (VP9) មកពីអង្គភាពភូមិភាគនីរតី បន្ទាប់ពីបុរសរូបនេះ បានអំពាវនាវតាមរយៈខ្សែវីដេអូឃ្លីបមួយ ហើយត្រូវបានបង្ហោះនៅលើបណ្តាញសង្គមហ្វេសបុក (Facebook) ឲ្យកងកម្លាំងប្រដាប់អាវុធ និងស្ថាប័នរដ្ឋទាំងអស់ ត្រៀមខ្លួនចូលរួមធ្វើរដ្ឋប្រហារយោធានៅពេលខាងមុខ ដើម្បីទម្លាក់រដ្ឋាភិបាលរបស់លោកនាយករដ្ឋមន្រ្តី ហ៊ុន សែន និងគណបក្សប្រជាជនកម្ពុជា។
លោកនាយឧត្តមសេនីយ៍ ឈុំ សុជាតិ បានហៅសកម្មភាពនេះថា គឺជាភេរវកម្ម ដែលក្រសួងមិនអាចអត់ឱនបាននោះទេ។
គួរជម្រាបជូនដែរថា កាលពីថ្ងៃទី១៩កក្កដាម្សិលមិញ អគ្គស្នងការដ្ឋាននគរបាលជាតិ ក៏បានប្រកាសស្វែងរកចាប់ខ្លួនជនសង្ស័យ និងបក្ខពួក ដែលប៉ុនប៉ងធ្វើរដ្ឋប្រហារផ្តួលរំលំរដ្ឋាភិបាល តាមរយៈបណ្តាញសង្គម Facebook និង Youtube នេះដែរ។ លោកនាយឧត្តមសេនីយ៍ គៀត ច័ន្ទថារិទ្ធ អ្នកនាំពាក្យអគ្គស្នងការដ្ឋាននគរបាលជាតិបាននិយាយតាមរយៈគេហទំព័រអគ្គស្នងការដ្ឋាននគរបាលជាតិថា ការប្រកាសធ្វើបែបនេះ គឺមានលក្ខណៈញុះញ៉ុង និងមានចរិតជាលក្ខណៈកុប្បកម្ម បះបោរដោយហិង្សា ប្រឆាំងនឹងរដ្ឋាភិបាលស្របច្បាប់ ហើយលោកក៏បានអំពាវនាវដល់មហាជនទូទៅសូមកុំឲ្យជឿ និងចូលរួមការអំពាវនាវនេះ និងជៀសវាងការចែកចាយបន្ត នូវសេចក្តីប្រកាសនេះ ដែលលោកចាត់ទុកថា ស្មើនឹងការចូលរួមគាំទ្រសកម្មភាពនេះដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ