កម្ពុជា-ច្បាប់

ក្រឡាបញ្ជីតុលាការកំពូលម្នាក់ត្រូវសាលាដំបូងចោទប្រកាន់ និងឃុំខ្លួនពីបទវីតិក្រម និងរំលោភអំណាច

ក្រឡាបញ្ជីតុលាការកំពូល លោកវ៉ាត វិសិដ្ឋ នៅរសៀលនេះ ត្រូវបានសាលាដំបូងរាជធានីភ្នំពេញចោទប្រកាន់ និងឃុំខ្លួនពីបទវីតិក្រម និងរំលោភអំណាច។ លោកវ៉ាត វិសិដ្ឋ ត្រូវបានបញ្ជូនមកសាលាដំបូង ក្រោយពីអង្គភាពប្រឆាំងអំពើពុករលួយឃាត់ខ្លួនកាលពីថ្ងៃទី៥ ខែសីហាកន្លងទៅ។

ចុះផ្សាយនៅថ្ងៃ៖ 07/08/2016 - 14:11កែប្រែថ្ងៃទី៖ 07/08/2016 - 14:14

តុលាការកំពូលនៅទីក្រុងភ្នំពេញ © លី ម៉េងហួរ

ដោយ៖ សឿង ភារៈ

ផ្សាយពាណិជ្ជកម្ម

ក្រោយពីសួរចម្លើយ និងពិភាក្សាដេញដោលចំពោះមុខរួច ចៅក្រមស៊ើបសួរលោក រស់ ពិសិដ្ឋ បានសម្រេចឃុំខ្លួនបណ្តោះអាសន្នជនត្រូវចោទឈ្មោះ វ៉ាត វិសិដ្ឋ។ នេះបើតាមសារ ដែលលោក លី សុផាន់ណាអ្នកនាំពាក្យសាលាដំបូងប្រាក់ក្រុមអ្នកសារព័ត៌មាន។ វ៉ាត វិសិដ្ឋត្រូវបានចោទពីបទវីតិក្រម និងបទរំលោភអំណាច តាមបញ្ញត្តិមាត្រា ៥៩២ មាត្រា ៥៩៣ នៃក្រមព្រហ្មទណ្ឌ មាត្រា៣២ និងមាត្រា ៣៥ នៃច្បាប់ប្រឆាំងអំពើពុករលួយ។

លោកវ៉ាត វិសិដ្ឋ ជាក្រឡាបញ្ជីនៃតុលាការកំពូលត្រូវបានអង្គភាពប្រឆាំងអំពើពុករលួយឃាត់ខ្លួនកាលពីថ្ងៃសុក្រ ទី៥ សីហា កន្លងទៅ។ នៅថ្ងៃទី០៧ ខែសីហា នេះវិទ្យុបារាំងអន្តរជាតិមិនអាចសុំការបំភ្លឺពីលោកឱម យ៉ិនទៀងបានទេ ជុំវិញមូលហេតុដែលឈានទៅដល់ការឃាត់ខ្លួនលោកវ៉ាត វិសិដ្ឋដោយអង្គភាពប្រឆាំងអំពើពុករលួយកាលពីថ្ងៃទី០៥ ខែសីហា។

បើតាមក្រមព្រហ្មទណ្ឌនៃព្រះរាជាណាចក្រកម្ពុជា មាត្រា៥៩២ វីតិក្រមគឺជាអំពើរបស់អ្នករាជការសាធារណៈ ឬពលរដ្ឋទទួលអាណត្តិសាធារណៈដោយការបោះឆ្នោត ដែលទាមទារ ឬទទួល ជាសិទ្ធិ ជាពន្ធ ជាអាករ នូវចំនួនប្រាក់ ដែលខ្លួនបានដឹងថាមិនត្រូវបង់ ឬដែលលើសពីចំនួនដែលគេត្រូវបង់។ ម្យ៉ាងទៀតវីតិក្រមគឺជាអំពើរបស់អ្នករាជការសាធារណៈ ដែលយល់ព្រមក្រោមរូបភាពណាមួយ និងដោយមូលហេតុណាមួយ ធ្វើការលើកលែង ឬការលោះលាចំពោះការបង់ពន្ធ ឬអាករដែលខ្លួនដឹងថាខុសច្បាប់ដែរ។ ក្នុងមាត្រា៥៩៣ នៃក្រមព្រហ្មទណ្ឌ បទវីតិក្រមត្រូវផ្តន្ទាទោសដាក់ពន្ធនាគារពី២ឆ្នាំ ទៅ៥ឆ្នាំ និងពិន័យជាប្រាក់ពី៤លានរៀល ទៅ១០លានរៀល។

សូមបញ្ជាក់ថា សំណុំរឿង វិតិក្រម គឺជាសំណុំរឿង ដែលអង្គភាពប្រឆាំងអំពើពុករលួយ បានទទួលពាក្យបណ្តឹងច្រើនជាងគេ។ លោកឱម យ៉ិនទៀងធ្លាប់បានបញ្ជាក់ប្រាប់វិទ្យុបារាំងកាលពីខែមេសាថា តាមរយៈសំណុំរឿងវិតិក្រម លោកសង្ឃឹមថា នឹងក្លាយទៅជាស្នូជួងមួយ ដើម្បីរំលឹកទៅដល់បុគ្គលិកនៅតាមបណ្តាក្រសួងស្ថាប័នរដ្ឋឯទៀត កុំឲ្យទាមទារប្រាក់កំរៃបន្ថែម លើសពីអ្វីដែលបានកំណត់ដោយច្បាប់៕