ស្តង់ដាយុត្តិធម៌អាចនាំឲ្យមានការបែងចែកសង្គម
ចុះផ្សាយនៅថ្ងៃ៖
ស្តាប់ - ០៤:២៨
ថ្មីៗនេះក្រុមអជ្ញាធររដ្ឋាភិបាលបានចាត់វិធានការយ៉ាងតឹងរ៉ឹងចំពោះការគំរាម និងការព្រមានធ្វើបដិវត្តន៍ពណ៌ដែលអាចប៉ះពាល់ដល់សន្តិសុខបុគ្គលនិងសន្តិសុខសាធារណៈ។ ចំណាត់ការនេះបានធ្វើឲ្យមានការប្រៀបធៀបថាបានបង្កឲ្យមានភាពលំអៀងផ្នែកយុត្តិធម៌ចំពោះអ្នកនយោបាយគណបក្សប្រឆាំងនិងអាចធ្វើឲ្យមានការបែងចែកសង្គមទៀតផង។
រាជរដ្ឋាភិបាលដែលដឹកនាំដោយគណបក្សប្រជាជនកម្ពុជាបានបង្ហាញឲ្យឃើញពីឆន្ទៈរបស់ខ្លួនក្នុងកិច្ចខិតខំប្រឹងប្រែងមួយដើម្បីកែទម្រង់ច្បាប់និងប្រពន្ធ័តុលាការ។ ប្រពន្ធ័ច្បាប់និងតុលាការដែលនៅស្ថិតក្រោមការរិះគន់នៅឡើយ។
ការកែទម្រង់តាមរយៈការបង្កើតច្បាប់ថ្មីៗដើម្បីពង្រឹងប្រពន្ធ័គ្រប់គ្រង ការពង្រឹងមន្ត្រីអនុវត្តន៍ច្បាប់ ជាពិសេសមន្ត្រីតុលាការ ការសាកល្បងសម្អាតមន្ត្រីតុលាការដែលពាក់ពន្ធ័នឹងអំពើពុករលួយជាដើម។
ប៉ុន្តែករណីលោក សុខ ទូច រងការគំរាមបាញ់សម្លាប់តាមរយៈបណ្ដាញសង្គមទាក់ទងនឹងសំណុំរឿងព្រំដែន និងករណីយុវជនម្នាក់ដែលបង្ហាញពីបំណងចង់ធ្វើបដិវត្តន៍ពណ៌នៅកម្ពុជាត្រូវអជ្ញាធរចាត់ការភ្លាមៗផ្ទុយពីករណីគំរាមសម្លាប់លោក កឹម សុខា អនុប្រធានគណបក្សសង្គ្រោះជាតិ។ លោកកឹម សុខា ដែលទទួលរងការគំរាមសម្លាប់ កាលពីចុងឆ្នាំ២០១៣ក្រោយពីការបោះឆ្នោតនៅមិនទាន់មានចំណាត់ការនៅឡើយ។ មានការលើកឡើងថាករណីទាំងពីរបានបង្ហាញពីការបង្កើតឲ្យមានស្តង់ដាយុត្តិធម៌ពីរដែលដើរបញ្ច្រាសគ្នា។
ជាការពិតយុត្តិធម៌ដែលមានស្តង់ដាពីរបានកើតឡើងចាប់តាំងពីសតវត្សទី១៩មកម្ល៉េះជាពិសេសរវាងស្ត្រីនិងបុរសនិងពណ៌សំបុរ។ ហើយវាទំនងជានៅមានការបែងចែកបែបនេះនៅឡើយនៅក្នុងប្រទេសមួយចំនួនទៀតរាប់ទាំងករណីខ្លះនៅសហរដ្ឋអាមេរិកផងដែរ។ នេះបើផ្អែកតាមការចុះផ្សាយរបស់សារព័ត៌មានបរទេស។
និយាយឲ្យចំយុត្តិធម៌ដែលមានស្តង់ដាពីរគឺជារបៀបយុត្តិធម៌មួយប្រភេទដែលទទួលយកបានដោយមនុស្សមួយក្រុម ប៉ុន្តែមិនអាចទទួលយកបានដោយមនុស្សមួយក្រុមទៀត។
ក្រឡេកមើលករណីគំរាមសម្លាប់លោកសុខ ទូច និងការចាប់ខ្លូនយុវជនម្នាក់ទាក់ទងនឹងការប៉ុនប៉ងធ្វើបដិវត្តពណ៌នៅកម្ពុជាវាពិតជាបង្ហាញពីប្រសិទ្ធិភាពនៃសមត្ថកិច្ចអនុវត្តន៍ច្បាប់ក្នុងការតាមស្វែងរកមនុស្សគោលដៅ ប៉ុន្តែបញ្ច្រាសមកវិញការខកខានក្នុងការថ្លឹងថ្លែងពីករណីគំរាមសម្លាប់លោកកឹម សុខា អនុប្រធានគណបក្សសង្គ្រោះជាតិក៏អាចនិយាយបានថាជាការខ្វះចន្លោះផ្នែកប្រសិទ្ធិភាពដែលត្រូវបំពេញឲ្យស្មើផងដែរ។
ច្បាស់ណាស់ថាបើសិនជាមានយុត្តិធម៌ដែលមានស្តង់ដាពីរវានឹងរំលោភជាស្វ័យប្រវត្តិលើគោលការណ៍នៃភាពមិនលំអៀងដែលចែងក្នុងប្រពន្ធ័យុត្តិធម៌ជាសកល។ នោះគឺថាស្តង់ដាយុត្តិធម៌តែមួយឬដូចគ្នានឹងត្រូវអនុវត្តន៍សម្រាប់មនុស្សទូទៅ ឬមនុស្សទាំងអស់មានភាពស្មើគ្នាចំពោះមុខច្បាប់ជាដើម។
មួយវិញទៀតការអនុវត្តឬការដែលទុកឲ្យមានស្តង់ដាពីរក្នុងប្រពន្ធ័យុត្តិធម៌ជាស្វ័យប្រវត្តិអាចនឹងនាំឲ្យមានការបែងចែកវណ្ណៈក្នុងសង្គម ឲ្យមានការបែងចែកឋានន្តរសក្តិ ជាតិសាសន៍ បែងចែកភេទខុសគ្នា បែងចែកសាសនាឬជាតិពន្ធុជាដើម។
ដំណាលគ្នានោះការអនុវត្តនូវស្តង់ដាយុត្តិធម៌ពីរនឹងធ្វើឲ្យប៉ះពាល់ជាដាច់ខាតដល់ប្រសិទ្ធិភាពនៃគោលការណ៍កំណែទម្រង់ច្បាប់និងតុលាការនៅកម្ពុជា។ ហើយវាក៏អាចជាមូលហេតុនៃការបន្សល់ទុកនូវនិទណ្ឌភាពផងដែរ។
ដូច្នេះដើម្បីដោះស្រាយបញ្ហាខាងលើនេះវាមានភាពចាំបាច់ក្នុង្ការបន្ស៊ីស្តង់ដាទាំងពីរឲ្យទៅជាស្តង់ដាយុត្តិធម៌តែមួយ។ វាមានភាពចាំបាច់ដែលក្រុមសមត្ថកិច្ចយុត្តិធម៌ពង្រឹងសមត្ថភាពបន្ថែមទៀតដើម្បីធានាដល់ភាពស្មើគ្នារបស់ជនរងគ្រោះនិងដើម្បីហុចយុត្តិធម៌ដល់ដៃប្រជាពលរដ្ឋទូទៅដោយគ្មានការបែងចែក។
ជាងនេះទៅទៀតប្រជាពលរដ្ឋកម្ពុជាភាគច្រើនក្នុងពេលនេះត្រូវការទាំងយុត្តិធម៌ទាំងក្នុងការរស់នៅនិងទាំងយុត្តិធម៌តាមប្រពន្ធ័តុលាការ។ ហើយគេមិនគួរមើលរំលងថាឥទ្ធិពលនៃយុត្តិធម៌សង្គមឬប្រពន្ធ័យុត្តិធម៌បានជះឲ្យមានបម្រែបម្រួលមួយផ្នែកលើលទ្ធផលបោះឆ្នោតនាពេលកន្លងទៅ។
ហេតុនេះហើយការផ្តល់នូវយុត្តិធម៌ពេញលេញនិងពិតប្រាកដដល់ដៃប្រជាពលរដ្ឋ យុត្តិធម៌នោះនឹងវិលចូលហិបឆ្នោតវិញជាក់ជាមិនខាន៕
បទវិភាគរបស់ គង់ សុឋានរិទ្ធ
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ