បាល់ទាត់កម្ពុជា៖ សន្ទុះកើនឡើងនៃអ្នកគាំទ្រ និងបញ្ហាប្រឈមដែលត្រូវដោះស្រាយ!
ចុះផ្សាយនៅថ្ងៃ៖
ស្តាប់ - ០៣:៤១
រៀងរាល់ការប្រកួតបាល់ទាត់ជាលក្ខណៈអន្ដរជាតិ ពហុកីឡដ្ឋានជាតិអូឡាំពិកក្លាយទៅជាសមុទ្រមនុស្ស ខណៈសហព័ន្ធបាល់ទាត់កម្ពុជាប្រកាសថា សំបុត្រចំនួន៥ម៉ឺនសន្លឹក ត្រូវបានលក់អស់នៅក្នុងមួយប្រកួត។ នេះគឺជាភស្តុតាងបង្ហាញឲ្យឃើញយ៉ាងច្បាស់ អំពីសន្ទុះអ្នកគាំទ្រកីឡាបាល់ទាត់ខ្មែរ ដែលបានកើនឡើងយ៉ាងគំហុកនាប៉ុន្មានឆ្នាំចុងក្រោយនេះ។ សន្ទុះកើនឡើងនៃអ្នកគាំទ្រដូច្នេះ គឺជារឿងល្អ។ ប៉ុន្តែវាក៏នាំមកនូវបញ្ហានិងក្ដីបារម្ភមួយចំនួន ដែលទាមទារឲ្យចាត់វិធានការដោះស្រាយផងដែរ។
សន្ទុះអ្នកគាំទ្រកីឡាបាល់ទាត់ខ្មែរ បានកើនឡើងយ៉ាងខ្លាំង នាមួយរយៈចុងក្រោយនេះ។ អ្នកគាំទ្ររាប់ម៉ឺននាក់ បានសម្រុកទៅកាន់កីឡដ្ឋានជាតិអូឡាំពិក ខណៈសហព័ន្ធបាល់ទាត់កម្ពុជា ឲ្យដឹងថា សំបុត្រជាង៥ម៉ឺន ត្រូវបានលក់អស់នៅក្នុងមួយប្រកួត។ សន្ទុះគាំទ្របាល់ទាត់ខ្មែរដែលកើនឡើងនេះ មិនមែនជារឿងចៃដន្យទេ។ មានកត្តាសំខាន់ៗចំនួន៣ ដែលធ្វើឲ្យអ្នកគាំទ្របាល់ទាត់ខ្មែរកើនឡើង។ ទី១ គឺការផ្សព្វផ្សាយទូលំទូលាយរបស់ប្រព័ន្ធផ្សព្វផ្សាយនិងបណ្ដាញសង្គម។ ទី២ គឺបច្ចេកទេសលេងបាល់របស់ក្រុមជម្រើសជាតិដែលរីកចម្រើនជាងមុន។ និងទី៣ ការកែលម្អហេដ្ឋារចនាសម្ព័ន្ធបាល់ទាត់។
ប៉ុន្តែ ទន្ទឹមនឹងសន្ទុះកើនឡើងនៃអ្នកគាំទ្រនេះ គេសង្កេតឃើញថា សហព័ន្ធកីឡាបាល់ទាត់កម្ពុជា ហាក់ដូចជាមិនទាន់បានរៀបចំការគ្រប់គ្រងឲ្យបានល្អប្រសើរនៅឡើយ នៅពេលមានការប្រកួតម្ដងៗ។ ជារឿយៗ សហព័ន្ធកីឡាបាល់ទាត់កម្ពុជា ទទួលរងនូវការរិះគន់យ៉ាងខ្លាំង នៅពេលដែលអ្នកគាំទ្របានទិញសំបុត្រទស្សនាការប្រកួត ប៉ុន្តែបែរជាមិនអាចចូលទៅទស្សនាបានទៅវិញ ព្រោះណែនគ្មានកន្លែងអង្គុយ។ អ្នកខ្លះទៀតដែលទិញសំបុត្រមិនបាន ក៏សម្រេចចិត្តផ្លោះរបាំងចូលទស្សនា។ ចំណែក ការលក់សំបុត្រ ការរៀបចំសន្តិសុខ សណ្ដាប់ធ្នាប់ ព្រមទាំងចរាចរណ៍ ក៏ហាក់ដូចជាមិនទាន់គ្រប់គ្រាន់ និងមិនទាន់មានរបៀបរៀបរយល្អនៅឡើយដែរ។
ជាការពិតហើយថា កន្លងមក សហព័ន្ធបានរៀបចំឲ្យមានមន្ដ្រីប៉ូលីស និងកងរាជអាវុធហត្ថជាច្រើនរយនាក់ ដើម្បីសម្រួលបញ្ហាសន្តិសុខ សណ្ដាប់ធ្នាប់ និងចរាចរណ៍។ នៅតាមផ្លូវសំខាន់ៗឆ្ពោះទៅកាន់ពហុកីឡដ្ឋានជាតិអូឡាំពិក ប៉ូលីសជាច្រើនត្រូវបានដាក់ពង្រាយដើម្បីសម្រួលចរាចរណ៍ តាំងពីមុនការប្រកួត រហូតដល់ចប់ការប្រកួត។ ចំណែក កម្លាំងកងរាជអាវុធហត្ថក្នុងឯកសណ្ឋាន និងក្រៅឯកសណ្ឋាន ក៏បានយាមកាមយ៉ាងតឹងរ៉ឹង ទាំងនៅខាងក្រៅ និងខាងក្នុងពហុកីឡដ្ឋាន ដើម្បីអន្ដរាគមន៍ពេលមានឧប្បទ្ទវហេតុកើតឡើង។
យ៉ាងណាក៏ដោយ សហព័ន្ធហាក់ដូចជាមិនទាន់បានប្រមើលមើលឲ្យបានគ្រប់ជ្រុងជ្រោយនៅឡើយ អំពីហេតុការណ៍ស្មានមិនដល់នានា ដែលអាចកើតមានឡើង ក្នុងពេលដែលមនុស្សរាប់ម៉ឺននាក់ សម្រុកទៅកាន់ពហុកីឡដ្ឋានជាតិអូឡាំពិក ក្នុងពេលតែមួយ។ តើពហុកីឡដ្ឋានជាតិអូឡាំពិកដែលមានអាយុជាង៥០ឆ្នាំនោះ អាចទ្រាំទ្រចំណុះពេញប្រៀបរបៀបនេះ បានប៉ុន្មានដងទៀត?
ដើម្បីបញ្ចៀសរឿងអកុសលនៅពេលមានមនុស្សប្រមូលផ្ដុំច្រើន ដូចជាគ្រោះថ្នាក់ជាន់គ្នាស្លាប់ ឬអគាបាក់រលំជាដើម សហព័ន្ធបាល់ទាត់ និងស្ថាប័នពាក់ព័ន្ធ ត្រូវតែកំណត់ចំនួនមនុស្សចូលទស្សនាឲ្យបានច្បាស់លាស់។ ធ្វើយ៉ាងណាឲ្យសមាមាត្រទៅនឹងលទ្ធភាពផ្ទុករបស់ពហុកីឡដ្ឋាន។ ការផ្សាយបន្តផ្ទាល់លើផ្ទាំងសំពត់ស នៅក្នុងបរិវេណពហុកីឡដ្ឋាន អាចជាជម្រើសមួយ គួរឲ្យពិចារណាដែរ។
ការចេញចូលនៅពហុកីឡដ្ឋាន ដែលមានទាំងឡាន មានទាំងម៉ូតូ និងមនុស្សថ្មើរជើងផងនោះ ក៏ត្រូវកំណត់បែងចែកឲ្យបានច្បាស់លាស់ និងដាច់ស្រេចផងដែរ ចៀសវាងបណ្ដោយឲ្យចេញចូលតាមច្រកតែមួយ។ ការចេញចូលតាមច្រកតែមួយ ដែលជាមូលហេតុឲ្យស្ទះចរាចរណ៍។
ជាការពិតហើយថា សន្ទុះអ្នកគាំទ្របាល់ទាត់ គឺជាកម្លាំងចិត្តដ៏សំខាន់ ដែលនឹងរុញច្រានឲ្យវិស័យបាល់ទាត់កម្ពុជារមៀលលឿនទៅមុខ។ ប៉ុន្តែ ប្រសិនបើសហព័ន្ធបាល់ទាត់កម្ពុជា មិនយកចិត្តទុកដាក់ ហើយបណ្ដែតបណ្ដោយឲ្យកើតមានកំហុសដដែលៗជាបន្តបន្ទាប់ នោះការគាំទ្រនេះ អាចនឹងថមថយទៅវិញនៅថ្ងៃណាមួយជាក់ជាពុំខាន៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ