មានអ្នកនាំពាក្យប្រចាំស្ថាប័នជួយលើកកម្ពស់ដល់ការផ្សព្វផ្សាយ និងផ្តល់ប្រយោជន៍ដល់ស្ថាប័នខ្លួនឯង
ចុះផ្សាយនៅថ្ងៃ៖
ស្តាប់ - ០៥:០៣
អ្នកនាំពាក្យ និងអ្នកសារព័ត៌មានគឺជាមនុស្ស ២នាក់ដែលត្រូវការពឹងពាក់គ្នាបានទៅវិញទៅមក នៅក្នុងទំនាក់ទំនងរវាងប្រព័ន្ធផ្សព្វផ្សាយ និងស្ថាប័នសាធារណៈឬសហគ្រាសឯកជន។ នៅក្នុងសង្គមប្រជាធិបតេយ្យ ប្រព័ន្ធផ្សព្វផ្សាយបានដើរតួនាទីសំខាន់ ក្នុងការនាំយកដំណឹងពិតគ្រប់ច្រកល្ហកប្រកបដោយវិជ្ជាជីវៈ ទៅប្រាប់ដល់សាធារណៈជន។ ដើម្បីទទួលបានព័ត៌មានច្បាស់លាស់ គ្រប់ជ្រុងជ្រោយ ចាំបាច់ត្រូវមានអ្នកនាំពាក្យដែលពាក់ព័ន្ធនឹងប្រធានបទនៃការផ្សព្វផ្សាយជួយបំពេញបន្ថែម។
ជាការពិតកាលពីពេលថ្មីៗនេះ ក្រសួងចំនួន២ ដែលបានតែងតាំងអ្នកនាំពាក្យរួចហើយនោះបានធ្វើការកែសម្រួលរចនាសម្ព័ន្ធអ្នកនាំពាក្យ ប្រយោជន៍ជួយសម្រួលដល់អ្នកសារព័ត៌មាន ក្នុងការស្វែងយល់និងទទួលព័ត៌មានជាក់លាក់ពីស្ថាប័នរបស់ផងគេ។ ក្រសួងទំាងពីរនោះមាន ក្រសួងរ៉ែ និងថាមពល និងក្រសួងបរិស្ថាន ដោយក្រសួងរ៉ែ និងថាមពល បានធ្វើការកែសម្រួល និងបន្ថែមចំនួនអ្នកនាំពាក្យពី ៤នាក់មក៥នាក់ នៅដើមឆ្នាំ២០១៧នេះ។ ជាមួយគ្នានេះ ក្រសួងបរិស្ថាន ក៏មានការកែទម្រង់ក្រុមអ្នកនាំពាក្យដ៏ចំបងដែរ គឺមានសមាសភាពរហូតដល់ទៅ ៩នាក់ ដែលពីមុនមានតែម្នាក់ប៉ុណ្ណោះ។
ជាការកត់សម្គាល់ក្រសួងបរិស្ថានមិនត្រឹមតែបន្ថែមបរិមាណអ្នកនាំពាក្យដ៏ក្រាស់ក្រែលទេ ថែមទាំងបញ្ជាក់ជូនដល់ប្រព័ន្ធផ្សព្វផ្សាយ និងសាធារណៈជន ពីមុខងារ និងតួនាទីរបស់អ្នកនាំពាក្យម្នាក់ៗ លើជំនាញរបស់ខ្លួន ប្រយោជន៍ធ្វើឲ្យមានការសួរនាំប្រធានរឿងផ្សេងៗចំៗ ជំនាញ ដែលធ្វើឲ្យព័ត៌មានមួយមានលក្ខណៈត្រឹមត្រូវ មានទម្ងន់ និងទទួលយកបានទាំងអស់គ្នា។
ក្រៅពីនេះក៏មានក្រសួង ស្ថាប័នរបស់រដ្ឋមួយចំនួនទៀត បានបង្ហាញពីការចាត់តាំងឲ្យមានអ្នកនាំពាក្យដែរ ដោយក្រសួងស្ថាប័នខ្លះ មានអ្នកនាំពាក្យម្នាក់ ឬ ២នាក់ និងអាចផ្តល់ព័ត៌មាន បានគ្រប់រឿង ដែលបានកើតឡើងនៅក្នុងអង្គភាពរបស់ខ្លួន។ រីឯស្ថាប័នមួយចំនួនទៀត មានអ្នកនំាពាក្យដូចគ្នាដែរ តែមិនមានភាពសកម្ម ឬក៏មានការរារែកក្នុងការផ្តល់ព័ត៌មានដល់អ្នកកាសែត ឬក៏មានការគេចវេសដោយប្រការផ្សេងៗ យោងទៅតាមប្រធានរឿងដែលបានកើតឡើង រសើបពេលស្រពិចស្រពិល មិនមានការអនុញ្ញាតពីថ្នាក់លើឲ្យហាស្តីទៅក្រៅក៏មាន។
ស្របពេលដែល រដ្ឋាភិបាលប្រកាសពីកំណែទម្រង់របស់ខ្លួនតាមក្រសួងស្ថាប័នសាធារណៈនានា លើវិស័យទំនាក់ទំនងព័ត៌មាននេះ ក៏បានធ្វើកំណែទម្រង់ភ្លាមៗដែរ ដូចជាក្រសួងបរិស្ថាន ក្រសួងអប់រំ ក្រសួងរ៉ែ និងថាមពល ទីស្តីការគណៈរដ្ឋមន្ត្រី ជាដើម។ ក៏ប៉ុន្តែក្រសួងនិងស្ថាប័នសាធារណៈមួយចំនួនទៀត បានស្ថិតនៅក្នុងស្ថានភាពកំពុងសម្រាកលង់លក់នៅឡើយ។ អ្នកនាំពាក្យត្រូវបានចែកជាច្រើនផ្នែក រួមមានអ្នកនាំពាក្យ ដែលមិនប្រកាន់ពេលវេលារដ្ឋបាល អ្នកនាំពាក្យ ដែលមិននិយាយនៅពេលឈប់សម្រាក អ្នកនាំពាក្យមានតែឈ្មោះតែគ្មានពាក្យនាំ និងអ្នកនាំពាក្យមានចរិកប្លែកៗគ្នាជាច្រើនទៀត។
ជាទូទៅសេរីភាពលើវិស័យសារព័ត៌មាននៅក្នុងប្រទេសកម្ពុជាត្រូវបានចាត់ទុកថាមានលក្ខណៈប្រសើរឡើងមួយកម្រិត បើប្រៀបធៀបទៅនឹងប្រទេសមួយចំនួននៅក្នុងតំបន់និងពិភពលោក។ វត្តមានរបស់អ្នកនាំពាក្យ ដែលបានបង្កើតឡើងនៅតាមស្ថាប័នរបស់រដ្ឋនានា ក៏ជាផ្នែកមួយ នៃការជួយជំរុញសេរីភាពប្រព័ន្ធផ្សព្វផ្សាយនៅកម្ពុជាឲ្យមានលក្ខណៈប្រសើរដែរ។
ដូច្នេះ ការដែលមានអ្នកនាំពាក្យច្បាស់លាស់នៅតាមក្រសួងស្ថាប័ននីមួយៗ មិនថារដ្ឋឬឯកជនទេ ពិតជាបានផ្តល់ផលប្រយោជន៍ដល់វិស័យសារព័ត៌មានយ៉ាងខ្លាំង។ នៅប្រទេសប្រជាធិបតេយ្យនានា អ្នកនាំពាក្យគឺជាការចាំបាច់។ ចាំបាច់ទី១ បញ្ជាក់ពីព័ត៌មានផ្លូវការទៅកាន់សាធារណៈជន។ ការថ្លែងឬសរសេររបស់អ្នកនាំពាក្យទៅកាន់ប្រព័ន្ធផ្សព្វផ្សាយ ធ្វើឲ្យព័ត៌មានមួយមានភាពរស់រវើក ប្រៀបបានសម្ល ដែលគេស្លបានគ្រប់គ្រឿង និងត្រូវមាត់។
ទី២ អ្នកនាំពាក្យជួយឲ្យព័ត៌មានមួយរបស់អ្នកកាសែត ប្រកបទៅដោយការថ្លឹងថ្លែង និងមានវិជ្ជាជីវៈ។ ការពោលចេញទៅក្រៅរបស់អ្នកនាំពាក្យមានផលប្រយោជន៍ធ្វើឲ្យអស់មន្ទិលសង្ស័យលើប្រធានបទណាមួយ និងមានសារៈសំខាន់ក្នុងការបង្ហាញដល់សង្គមពីកិច្ចខិតខំប្រឹងប្រែងរបស់ស្ថាប័ន អង្គភាព នៅក្នុងវឌ្ឍនាការការងាររបស់ខ្លួន ការពាររាល់ការរិះគន់ដែលមិនមានហេតុផលពីខាងក្រៅ។
ជាសរុបមក ការមានសណ្តាប់ធ្នាប់ឬគ្មាន នៅក្នុងរបៀបធ្វើការងាររបស់ក្រសួងឬស្ថាប័នសាធារណៈនីមួយៗអាស្រ័យទៅលើការដឹកនាំចាត់ចែងរបស់អ្នកដឹកនាំស្ថាប័ននោះ។ ជាលទ្ធផល ក្រសួង ស្ថាប័ន ដែលបានរៀបចំអ្នកនាំពាក្យត្រឹមត្រូវ ត្រូវបានគេកត់សម្គាល់ថា មានភាពរលូនផ្នែកទំនាក់ទំនង មានប្រសិទ្ធភាព និងតម្លាភាពខ្ពស់ក្នុងការងារ ដែលជាការលើកមុខមាត់ដល់ស្ថាប័ន ជាពិសេសការងារកំណែទម្រង់របស់ក្រសួង ស្ថាប័ន ស្របតាមការតាំងចិត្តនិងទិសដៅរបស់រដ្ឋាភិបាលអាណត្តិទី៥។
ដូច្នេះការតែងតាំងច្បាស់ៗនូវ អ្នកនាំពាក្យច្រើននាក់ និងត្រូវជំនាញក្នុងការឆ្លើយតប ដូចជាក្រសួងបរិស្ថាន ឬក្រសួងរ៉ែ និងថាមពលជាដើម គឺជាគំរូមួយ ដែលក្រសួងឬស្ថាប័នដទៃទៀត ដែលកំពុងមានភាពអសកម្ម ក្នុងទំនាក់ទំនង និងការចាត់ចែងមិនច្បាស់លាស់ គួររៀនសូត្រតាម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ