ACU៖ស៊ុត ឌីណា មានលុយក្រៅធនាគារជាង៧លានដុល្លារ
អង្គភាពប្រឆាំងអំពើពុករលួយ (ACU) ក្នុងសន្និសីទកាសែត ថ្ងៃទី ៧មេសានេះ បានបញ្ជាក់ថា លោកស៊ុត ឌីណា អតីតឯកអគ្គរាជទូតកម្ពុជាប្រចាំកូរ៉េខាងត្បូង មានប្រាក់នៅក្រៅធនាគារចំនួន ៧លាន ២សែនដុល្លារអាមេរិក និងមានមាស ១២.៧៤គីឡូក្រាមស្មើនឹង ៣៣៩តម្លឹង។ ACU បានកសាងសំណុំរឿងប្រមូលផ្តុំលើ ២បទល្មើសសិន ក្នុងរយៈពេល ៤៨ម៉ោង បញ្ជូនទៅតុលាការ ហើយគ្រោងនឹងបន្ថែមបទល្មើស ៣ផ្សេងទៀតនៅពេលក្រោយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៦
បទល្មើសចំនួន ២ ដែលអង្គភាពប្រឆាំងអំពើពុករលួយ ហៅកាត់ថា ACU ប្រមូលផ្តុំបញ្ជូនទៅតុលាការក្រុងភ្នំពេញ លើករណីលោកស៊ុត ឌីណា នោះរួមមាន បទល្មើសកេងយកផលប្រយោជន៍ដោយខុសច្បាប់តាមមាត្រា៥៩៧ និង ៥៩៨នៃក្រមព្រហ្មទណ្ឌ និងបទល្មើសរំលោភអំណាច តាមមាត្រា ៣៥នៃ ច្បាប់ស្ដីពីការប្រឆាំងអំពើពុករលួយ។ ចំពោះបទល្មើសទី១ អាចត្រូវពិន័យជាប្រាក់ពី ៤លាន ទៅ១០លានរៀល។ ចំណែកបទល្មើសទី២ ប្រសិនបើជាទោសមជ្ឈឹមអាចជាប់ទោសពី ២ទៅ ៥ឆ្នាំ និងប្រសិនជាទោសឧក្រិដ្ឋ អាចជាប់ពន្ធនាគារពី ៥ទៅ ១០ឆ្នាំ។
លោកឱម យិនទៀង ប្រធាន ACU បានបញ្ជាក់ថា ACU នឹងប្រមូលផ្តុំបទល្មើសចំនួន ៣ទៀត បញ្ជូនទៅតុលាការ ប៉ុន្តែលោកមិនបានលម្អិតពីបទល្មើសទាំងនោះនៅឡើយទេ។ ACU ហ៊ានអះអាងថា លោកស៊ុត ឌីណា បានកេងលុយលក់ស្ទីកឃឺ និង Visa ដល់ទៅជិត ១២ម៉ឺនដុល្លារ ហើយថែមទាំងថា យកលុយទាំងនោះទៅធ្វើការបម្រើប្រយោជន៍គណបក្សប្រជាជនកម្ពុជា ដល់ទៅ ១០ម៉ឺនដុល្លារទៀត។ តាមលោកឱម យិន ទៀង លោកស៊ុត ឌីណា បានយកលុយនោះ ទៅចិញ្ចឹមបុគ្គលិកផ្សេងទៀតដែលធ្វើការឲ្យខ្លួន ជាពិសេសគឺមនុស្សជំនិត ២នាក់ ដែលម្នាក់ជាស្ត្រីជនជាតិខ្មែរ និងម្នាក់ទៀតជាបុរសជនជាតិកូរ៉េ។
ACU និយាយដោយសំអាង មានភស្តុងតាងគ្រប់គ្រាន់ថា លោកស៊ុត ឌីណា ថែមទាំងលួចបើកគណនីស្ថានទូតដាក់លុយវុនមួយទៀត ដើម្បីទុកលុយ ដែលក្រុមហ៊ុនធានារ៉ាប់រ៉ង់ ត្រូវបញ្ជូនទៅកាន់ក្រុមគ្រួសាររបស់ពលករ ដែលស្លាប់ដោយគ្រោះថ្នាក់ នៅប្រទេសកូរ៉េខាងត្បូង។
លោកឱម យិនទៀង បញ្ជាក់ថា ACU នឹងស្នើទៅក្រសួងយុត្តិធម៌ ដើម្បីបង្កកទ្រព្យសម្បត្តិរបស់លោកស៊ុត ឌីណា ប្រសិនបើតុលាការចេញដីកា ថាលោកមានប្រព្រឹត្តិអំពើពុករលួយមែន។ ហើយចំពោះកំណើនលុយ ៣លានដុល្លារ ប្រសិនបើលោកស៊ុត ឌីណា បកស្រាយមិនច្បាស់លាស់ នោះ ACU នឹងធ្វើការរឹបអូសយក។
សូមបញ្ជាក់ជូនថា លោកស៊ុត ឌីណា បានមកដល់ប្រទេសកម្ពុជា កាលពីថ្ងៃទី ៣មេសា ហើយត្រូវបាន ACU ចាប់ខ្លួននៅថ្ងៃ ៤មេសា។ ACU បានសាកសួរចម្លើយលោកស៊ុត ឌីណា ៤៨ម៉ោង បន្ទាប់មកបានបញ្ជូនខ្លួន ទៅតុលាការក្រុងភ្នំពេញ នៅព្រឹកថ្ងៃទី ៧មេសា។ ក្រោយពី សាកសួរពេញមួយថ្ងៃរួចហើយ តុលាការក្រុងភ្នំពេញ បានសម្រេចចោទប្រកាន់លោកស៊ុត ឌីណា ចំនួន ២ករណី ដូចបទល្មើសដែល ACU បានបញ្ជូនទៅតុលាការ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ