ACUចាប់ខ្លួន ស៊ុត ឌីណា នាំទៅតុលាការ
ឯកអគ្គរាជទូតកម្ពុជាប្រចាំប្រទេសកូរ៉េខាងត្បូង លោក ស៊ុត ឌីណា ត្រូវបានអង្គភាពប្រឆាំងអំពើពុករលួយ (ACU) ចាប់ខ្លួន ហើយគ្រោងនាំទៅកាន់តុលាការក្រោយពីធ្វើសំណុំបែបបទរយៈពេល៤៨ម៉ោងរួច។ នេះបើតាមការបញ្ជាក់របស់លោកប្រធានអង្គភាពប្រឆាំងអំពើពុករលួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
លោក ស៊ុត ឌីណា ត្រូវបានអង្គភាពប្រឆាំងអំពើពុករលួយ(ACU) ឃាត់ខ្លួន និងឲ្យរូបលោកប្រកាសទ្រព្យសម្បត្តិជាថ្មីម្តងទៀត កាលពីថ្ងៃទី០៤ ខែមេសា ក្រោយពីមានការសង្ស័យថាឯកអគ្គរាជទូតកម្ពុជាប្រចាំប្រទេសកូរ៉េខាងត្បូងរូបនេះ មានជាប់ពាក់ព័ន្ធនឹងអំពើពុករលួយ។
កាលពីថ្ងៃទី០៤ ខែមេសា ម្សិលមិញនេះ អង្គភាពប្រឆាំងអំពើពុករលួយ ដែលមានលោកទេសរដ្ឋមន្ត្រី ឱម យិនទៀង ជាប្រធានបានសាកសួរលោកស៊ុត ឌីណា ក្រោយពេលលោកបានមកដល់ប្រទេសកម្ពុជា កាលពីពាក់កណ្តាលអាធ្រាតយប់ថ្ងៃអាទិត្យ។ បើតាមលោក ឱម យិនទៀង បានឲ្យវិទ្យុបារាំងដឹងនៅព្រឹកថ្ងៃទី០៥ ខែមេសា នេះ ថាអង្គភាពប្រឆាំងអំពើពុករលួយបានរកឃើញរឿងរ៉ាវជាច្រើនរបស់លោក ស៊ុត ឌីណា។ លោកបន្តថា ACU នឹងជ្រើសរើសយកតែរឿងពុករលួយរបស់លោកមួយចំនួនតែប៉ុណ្ណោះ ដើម្បីនាំខ្លួនឯកអគ្គរាជទូតកម្ពុជាប្រចាំប្រទេសកូរ៉េខាងត្បូងរូបនេះទៅតុលាការ ហើយរឿងរ៉ាវមួយចំនួនទៀតនឹងធ្វើជាបន្តបន្ទាប់នៅពេលក្រោយ។
លោក ស៊ុត ឌីណា ជាអតីតប្រធានរណសិរ្ស ប្រជាធិបតេយ្យ និស្សិតបញ្ញវន្តខ្មែរ បានទៅចូលរួមសកម្មភាពនយោបាយជាមួយសម្តេចក្រុមព្រះនរោត្តម រណឬទ្ធិ នៅឆ្នាំ២០០៦។ បន្ទាប់មកបានបន្តទៅចូលរួមជាមួយគណបក្សប្រជាជនកម្ពុជា និងត្រូវបានរាជរដ្ឋាភិបាលតែងតាំងជាអនុរដ្ឋលេខាធិការក្រសួងការបរទេស និងជាទីប្រឹក្សាផ្ទាល់របស់លោកនាយករដ្ឋមន្ត្រីហ៊ុន សែន ហើយបច្ចុប្បន្នមានតួនាទីជាឯកអគ្គរាជទូតខ្មែរ ប្រចាំនៅប្រទេសកូរ៉េខាងត្បូង។ មុននឹងចុះចូលជាមួយនឹងគណបក្សប្រជាជនកម្ពុជា លោក ស៊ុត ឌីណា គឺជាអ្នកដែលធ្លាប់ប្រឆាំងនឹងលោក ហ៊ុន សែន ដ៏ខ្លាំងក្លា។
ចំណែកក្រសួងការបរទេសកម្ពុជាមិនធ្វើអត្ថាធិប្បាយយ៉ាងណាទេចំពោះករណី អង្គភាពប្រឆាំងអំពើពុករលួយគ្រោងនាំខ្លួនលោក ស៊ុត ឌីណា ទៅតុលាការ។ នេះបើតាមលោក ជុំ សុន្ទរី អ្នកនាំពាក្យក្រសួងការបរទេសកម្ពុជា។ លោកជុំ សុន្ទរី បញ្ជាក់ថា នេះគឺជាសមត្ថកិច្ចរបស់អង្គភាពប្រឆាំងអំពើពុករលួយ ព្រោះអង្គភាពនេះជាអ្នកស៊ើបអង្កេតលើករណីខាងលើ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ