មជ្ឈមណ្ឌល សំ វាសនា ទទួលបានមេដាយមាសខាងអភិរក្សសត្វព្រៃ នៅទីក្រុង ឡុងដ៍
ប៉ុន្មានថ្ងៃមុននេះ មជ្ឈមណ្ឌល សំ វាសនា ដែលជាមជ្ឈមណ្ឌលអភិរក្សសត្វស្លាប បានឈ្នះពានរង្វាន់ទេសចរណ៍ពិភពលោកដែលមានទំនួលខុសត្រូវប្រចាំ ឆ្នាំ២០១៦។ ជ័យលាភីនេះគឺជាពានរង្វាន់មេដាយមាសខាងអភិរក្សសត្វព្រៃ ដែលត្រូវបានគណៈកម្មាការវាយតម្លៃ និងប្រគល់រង្វាន់ នៅក្នុងទីក្រុងឡុងដ៍ ប្រទេសអង់គ្លេស។ ការទទួលបានជ័យលាភីនេះ គឺមានសារៈសំខាន់ណាស់ក្នុងការបើកផ្លូវកាន់តែធំទូលាយក្នុងវិស័យទេសចរណ៍ទស្សនាសត្វស្លាបនិង សត្វព្រៃនៅក្នុងប្រទេសកម្ពុជា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៣១
ក្នុងព្រឹត្តិការណ៍ទីផ្សារទេសចរណ៍ពិភពលោកនៅទីក្រុងឡុងដ៍ ដែលប្រព្រឹត្តទៅក្នុងខែវិច្ឆិកានេះគឺមានការប្រកាស“ពានរង្វាន់ទេសចរណ៍ពិភពលោកដែលមានទំនួលខុសត្រូវ” World Responsible Tourism Awardsឆ្នាំ២០១៦។ ពានរង្វាន់នេះបង្កើតឡើងតាំងពីឆ្នាំ២០០៤នៅក្នុងប្រទេសអង់គ្លេស ហើយប្រគល់ជូនជារៀងរាល់ឆ្នាំដល់ស្ថាប័ននិងអ្នកធ្វើការក្នុងវិស័យទេសចរណ៍ដែលមានលក្ខណៈក្នុងការទទួលខុសត្រូវសង្គមនិងគិតគូរដល់និរន្តរភាពបរិស្ថាន។
នៅឆ្នាំ២០១៦ ពានរង្វាន់លំដាប់ពិភពលោកមួយនេះ មាន៥ផ្នែក គឺផ្នែកផ្ទះស្នាក់ឬសណ្ឋាគារដែលគិតគូរដល់បរិស្ថាន, ផ្នែកអភិរក្សសត្វព្រៃ, ផ្នែករៀបចំភ្ញៀវទេសចរធម្មជាតិ, ផ្នែកទេសចរជួយកាត់បន្ថយភាពក្រីក្រ និងយុទ្ធនាការទេសចរណ៍ដែលមានការទទួលខុសត្រូវ។
ចំពោះមេដាយមាសខាងផ្នែកអភិរក្សសត្វព្រៃ គឺបានប្រគល់ជូនមជ្ឈមណ្ឌល សំ វាសនា ដែលជាបេក្ខភាពតែមួយគត់ពីប្រទេសកម្ពុជា នៅក្នុងចំណោមបេក្ខភាពមកពី៧៥ស្ថាប័នទូទាំងពិភពលោក។ ចំណែកមេដាយសំរិទ្ធ៣ទៀតក្នុងផ្នែកដដែល គឺបានទៅលើភ្នាក់ងារទេសចរណ៍ក្នុងប្រទេសឥណ្ឌូនេស៊ី អាហ្វ្រិកខាងកើត និងអារ៉ាបរួម។
សូមបញ្ជាក់ថាមជ្ឈមណ្ឌល សំ វាសនា មានមូលដ្ឋាននៅក្នុងខេត្តសៀមរាម និងបានបង្កើតនៅឆ្នាំ២០០៦ ដោយបានដាក់ឈ្មោះលោក សំ វាសនា ជាបុរសម្នាក់ដែលស្រឡាញ់ធម្មជាតិនិងសត្វព្រៃយ៉ាងងប់ងល់ ប៉ុន្តែលោកបានបាត់បង់ជីវិតដោយជំងឺគ្រុញចាញ់ក្នុងពេលចុះបេសកកម្មក្នុងព្រៃ។
សូមជម្រាបដែរថា នាកន្លងមក មជ្ឈមណ្ឌល សំ វាសនា សហការជាមួយក្រសួងបរិស្ថាន និងជាពិសេស គឺធ្វើការជាមួយអង្គការសមាគមអភិរក្សសត្វព្រៃWCS ដើម្បីការងារអភិរក្សសត្វព្រៃដោយទាក់ទាញប្រជាសហគមន៍ នៅតាមក្នុងតំបន់ការពារធម្មជាតិនៃប្រទេសកម្ពុជាឲ្យចូលរួមធ្វើការទាំងអស់គ្នា។
មជ្ឈមណ្ឌលនេះបានបណ្តុះបណ្តាលប្រជាសហគមន៍ពីទេសចរណ៍ធម្មជាតិ ហើយជំរុញពលរដ្ឋឲ្យឈប់បរបាញ់សត្វព្រៃព្រមទាំងបានបង្កើតកម្មវិធីអភិរក្សសត្វស្លាបមានមាឌធំ និងជាសត្វកម្រនៅលើពិភពលោក។ តាមរយៈគម្រោងទាំងនេះគឺបង្កើនថវិកាទៅក្នុងមូលនិធិអភិវឌ្ឍភូមិ និងបានជួយបង្កើនប្រាក់ចំណូលសម្រាប់សហគមន៍រស់នៅតំបន់ជនបទទៀតផង។
ចំពោះការទទួលបានពានរង្វាន់លំដាប់ពិភពលោករបស់មជ្ឈមណ្ឌល សំ វាសនា នៅពេលនេះគឺបានជួយឲ្យកម្ពុជាស្ថិតនៅលើផែនទីពិភពលោកផ្នែកទេសចរណ៍ធម្មជាតិមើលសត្វស្លាបនិងសត្វព្រៃផ្សេង។ នេះគឺមានសារៈសំខាន់ណាស់ក្នុងការបើកផ្លូវកាន់តែធំទូលាយក្នុងវិស័យទេសចរណ៍, ទាក់ទាញភ្ញៀវទេសចរធម្មជាតិនិងអ្នកស្រឡាញ់សត្វព្រៃកាន់តែច្រើនឡើងឲ្យមកទស្សនាស្រុកខ្មែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ