ដំណោះស្រាយត្រជាក់គឺជាផ្លូវសម្រាប់លោកសម រង្ស៊ី
ចុះផ្សាយនៅថ្ងៃ៖
ស្តាប់ - ០៥:០៦
បន្ថែមលើដីកានាំខ្លួនលោកសម រង្ស៊ី សាលាដំបូងរាជធានីភ្នំពេញកាលពីសប្តាហ៍មុនបានចោទប្រកាន់ប្រធានគណបក្សសង្គ្រោះជាតិពីបទក្លែងឯកសារផែនទីនិងបទបង្កចលាចល។បទចោទនេះអាចនឹងធ្វើឲ្យផ្លូវវិលត្រឡប់មកកាន់ប្រទេសកម្ពុជាវិញរបស់លោកសម រង្ស៊ី កាន់តែចង្អៀត។ លោកសម រង្ស៊ី បច្ចុប្បន្នកំពុងស្ថិតនៅក្រៅប្រទេស។ ប៉ុន្តែវិធីសម្រុះសម្រួលនយោបាយនិងជំនួយពីសហគមអន្តរជាតិអាចជាកូនសោរដោះស្រាយបញ្ហានេះបាន។បទវិភាគដោយ៖គង់ សុឋានរិទ្ធ
ជាងមួយសប្តាហ៍មកហើយនៅមិនមានភាពជាក់លាក់ឡើយថាលោកសម រង្ស៊ី នឹងវិលត្រឡប់មកបំពេញទោសដោយអំណាចសាលក្រមតុលាការដែលសម្រេចផ្តន្ទាទោសរូបលោកឲ្យជាប់ពន្ធនាគារចំនួនពីរឆ្នាំនោះទេ។ ប៉ុន្តែវាច្បាស់ណាស់ថាប្រធានគណបក្សសង្គ្រោះជាតិនឹងមិនទទួលយកទោសបែបនេះ ដើម្បីជាថ្នូរទៅនឹងការណ៍ដែលអាចវិលត្រឡប់ចូលប្រទេសកម្ពុជាវិញនោះទេ។ ដូច្នេះតើមានលទ្ធភាពអ្វីខ្លះដែលនឹងអាចនាំលោកសម រង្ស៊ី ឲ្យចូលមាតុភូមិវិញបាន?
ពិតប្រាកដណាស់មានកត្តាចំនួនពីរដែលនឹងនាំឲ្យមានដំណោះស្រាយសម្រាប់បើកផ្លូវឲ្យលោកសម រង្ស៊ី ឈានជើងចូលក្នុងប្រទេសកម្ពុជាវិញបាន។
កត្តាទី១ គឺកត្តានយោបាយផ្ទៃក្នុងរបស់កម្ពុជា។
និងកត្តាទី២ គឺជាកត្តាអន្តរាគមន៍ពីសហគមអន្តរជាតិ។ កត្តានយោបាយផ្ទៃក្នុងគឺមានន័យថាលោកសម រង្ស៊ី អាចនឹងនិវត្តន៍មកកម្ពុជាវិញបានដោយមិនចាំបាច់ឆ្លងកាត់ការទទួលទោសល្គឹកណាមានការសម្រុះសម្រួលនយោបាយរវាងគណបក្សប្រជាជនកម្ពុជាជាមួយគណបក្សសង្គ្រោះជាតិ។
បើគេក្រឡេកមើលក្រោយបន្តិចគេនឹងឃើញថាចាប់តាំងពីឆ្នាំ២០០៤មក មេដឹកនាំគណបក្សប្រឆាំងត្រូវតុលាការខ្មែរផ្តន្ទាទោសជាច្រើនដង និងដោយបានដាក់ទោសធ្ងន់ធ្ងរទៀតផង។ការផ្តន្ទាទោសមួយចំនួនត្រូវគេអធិប្បាយថាដោយមូលហេតុនយោបាយ។ ហើយលោកសម រង្ស៊ី បាននិរទេសខ្លួនទៅក្រៅប្រទេសដើម្បីគេចផុតពីការទទួលទោស។ ប៉ុន្តែក្រោយមកការចរចានយោបាយបានក្លាយជាមធ្យោបាយយ៉ាងមានប្រសិទ្ធិភាពសម្រាប់ឲ្យលោកសម រង្ស៊ី វិលចូលប្រទេសកម្ពុជាវិញដើម្បីចូលរួមការបោះឆ្នោត។ ជាពិសេសការបោះឆ្នោតនៅឆ្នាំ២០០៨និងការបោះឆ្នោតឆ្នាំ២០១៣។ ប៉ុន្តែវីធីសម្រុះសម្រួលនយោបាយនេះត្រូវការការបន្ទន់ឥរិយាបថពីគណបក្សប្រឆាំង ហើយក៏ត្រូវការការបន្ធូរដៃពីគណបក្សកាន់អំណាចផងដែរ។
ដោយឡែកកត្តាទី២ ដែលជាកត្តាអន្តរាគមន៍ពីសហគមអន្តរជាតិនៅតែជាកត្តាមិនអាចខ្វះបាន។ ដ្បិតរាល់ភាពតានតឹងពីមុនមកមិនបានកាត់ផ្តាច់ពីការជួយចូកជួយចែវពីសហគមអន្តរជាតិនោះឡើយ។ តួយ៉ាងដូចជាប្រទេសបារាំង សហរដ្ឋអាមេរិក ជប៉ុន រួមទាំងគណកម្មការអឺរ៉ុបជាដើម។ តំណាងប្រទេសទាំងនេះបានដើរតួជាស្ពានផ្សះផ្សារវាងបក្សទាំងពីរដំណាលគ្នា និងការប្រឹងប្រែងផ្ទៃក្នុងផងដែរ។ ហើយការសម្រេចនយោបាយមួយចំនួនក៏បានកើតឡើងតាមលំអាននៃការប្រឹក្សានៃបណ្តាប្រទេសទាំងនោះដែរ។ ជាពិសេសទៅទៀតប្រទេសទាំងនេះនៅតែជាប្រទេសគន្លឹះសម្រាប់ភាពសុខដុមផ្នែកនយោបាយនៅកម្ពុជា។ ហើយប្រទេសទាំងនេះក៏ជាប្រទេសម្ចាស់ជំនួយសំខាន់ៗរបស់កម្ពុជាទៀតផង។ប្រទេសទាំងនេះមានទឹកមាត់ប្រៃសម្រាប់កម្ពុជា ដែលកម្ពុជាមិនអាចព្រងើយកន្តើយបាន។
ជាពិសេសក្រោយពីតុលាការសាលាដំបូងរាជធានីភ្នំពេញចេញដីកាបង្គាប់ឲ្យនាំខ្លួនលោកសម រង្ស៊ី មកទទួលទោស តុលាការជាន់ទាបដដែលបានចោទប្រកាន់ប្រធានគណបក្សប្រឆាំងបន្ថែមទៀតអំពីបទក្លែងឯកសារផែនទី។ ថ្វីបើបទចោទដូចគ្នានេះធ្លាប់ចោទលើលោកសម រង្ស៊ី កាលពីប៉ុន្មានឆ្នាំមុនពាក់ព័ន្ធនឹងការដកបង្គោលព្រំដែនរួមកម្ពុជាវៀតណាម តែការចោទប្រកាន់លើប្រមុខបក្សប្រឆាំងនៅពេលនេះចង់ឬមិនចង់នឹងជួយបន្ថែមទម្ងន់កៀបសង្កត់មិនអោយលោកចូលមកកាន់ប្រទេសងាយៗបាននោះទេ។ ដូចនេះហើយ ការលូកដៃនៃសហគមអន្តរជាតិអាចនឹងជួយសម្រួលដល់យន្តការផ្ទៃក្នុងបាន។
យ៉ាងណាក៏ដោយកត្តាសម្រួលនយោបាយផ្ទៃក្នុងរវាងបក្សនយោបាយ និងបក្សនយោបាយគឺជាមធ្យោបាយល្អប្រសើរ។ ប៉ុន្តែបើលទ្ធផលនៃដំណោះស្រាយនយោបាយយឺតយ៉ាវ មេដឹកនាំបក្សប្រឆាំងអាចនឹងត្រូវកៀសចេញពីក្នុងប្រទេសយូរបន្តទៀតឬអាចខកខានការចូលរួមការបោះឆ្នោតជ្រើសរើសក្រុមប្រឹក្សាដូចពេលកន្លងទៅ។ ឬមួយអាចនឹងយឺតពេលចូលរួមបោះឆ្នោតជ្រើសតាំងតំណាងរាស្ដ្រឆ្នាំ២០១៨។ ដូចជាបទពិសោធន៍សម្រាប់លោកសម រង្ស៊ី កាលពីការបោះឆ្នោតឆ្នាំ២០១៣។ នៅពេលនោះលោកសម រង្ស៊ី មិនមានសិទ្ធិឈរជាបេក្ខជនតំណាងរាស្រ្តនោះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ