ការឃោសនាប្រជាភិថុតិលែងសូវមានឥទ្ធិពលលើម្ចាស់ឆ្នោតទៀតហើយ!
ចុះផ្សាយនៅថ្ងៃ៖
ស្តាប់ - ០៤:៣០
កាលពីម្សិលមិញ លោកនាយករដ្ឋមន្ដ្រី ហ៊ុន សែន បានព្រមានគណបក្សគូបដិបក្ខរបស់ខ្លួន កុំឲ្យធ្វើសកម្មភាពឃោសនាប្រជាភិថុតិ បោកប្រាស់ប្រជារាស្ត្រ។ ការព្រមានរបស់ប្រមុខរដ្ឋាភិបាលកម្ពុជានេះ ធ្វើឡើងស្របពេលដែលការបោះឆ្នោតកាន់តែខិតជិតចូលមកដល់ផងដែរ។ ជាការពិតហើយថា ការឃោសនាប្រជាភិថុតិ អាចនឹងត្រូវអ្នកនយោបាយប្រើប្រាស់ច្រើននៅក្នុងអំឡុងពេលបោះឆ្នោត ប៉ុន្តែរបៀបឃោសនាដូច្នេះ ទំនងជាលែងសូវមានឥទ្ធិពលទៅលើពលរដ្ឋខ្មែរម្ចាស់ឆ្នោតទៀតហើយ ខណៈដែលការយល់ដឹងរបស់ពួកគាត់កាន់តែរីកចម្រើនឡើង។
ការធ្វើនយោបាយឃោសនាប្រជាភិថុតិនៅមុនការបោះឆ្នោត មិនមែនជារឿងថ្មីទេសម្រាប់កម្ពុជា និងប្រទេសនានានៅលើពិភពលោក។ ការឃោសនាប្រជាភិថុតិកើនមានជាយូរមកហើយ គ្រាន់តែថា វាមានកម្រិតខុសៗគ្នា អាស្រ័យទៅលើការរីកចម្រើននិងការយល់ដឹងរបស់ពលរដ្ឋនៃបណ្ដាប្រទេសទាំងនោះតែប៉ុណ្ណោះ។
ចំណែកនៅប្រទេសកម្ពុជា គេសង្កេតឃើញថា ការឃោសនានយោបាយប្រជាភិថុតិ នៅតែមានប្រជាប្រិយភាពនៅឡើយ ក្នុងចំណោមអ្នកនយោបាយខ្មែរ។ ជាពាក្យពេចន៍លួងលោម អន្ទងចិត្ត និងការសន្យាផ្សេងៗរបស់អ្នកនយោបាយ ដើម្បីឲ្យពលរដ្ឋម្ចាស់ឆ្នោតជឿជាក់ និងបោះឆ្នោតឲ្យ។ ទន្ទឹមគ្នានោះ ក៏មានផងដែរ ការប្រើពាក្យពេចន៍វាយប្រហារ បន្តុះបង្អាប់គ្នាទៅវិញទៅមករវាងអ្នកនយោបាយ គម្រាម សំឡុត បំភិតបំភ័យ នៅពេលការបោះឆ្នោតខិតជិតចូលមកដល់។
ជាង៣០មកហើយដែលអ្នកនយោបាយខ្មែររក្សាទម្លាប់ធ្វើនយោបាយរបៀបនេះ។ នោះក៏ព្រោះតែអ្នកនយោបាយខ្មែរយល់ថា ពលរដ្ឋខ្មែរ ក្រីក្រខ្វះការអប់រំ ដែលឆ្លងកាត់ការរស់នៅញាំញីដោយសង្គ្រាមស៊ីវិលអស់ជាច្រើនទសវត្សរ៍មកនោះ នៅតែមានជំងឺខ្លបខ្លាចបាក់ស្បាត និងឆាប់ជឿការបញ្ចុះបញ្ចូលលួងលោម ក៏ដូចជាការសន្យាផ្សេងៗ។ ដូច្នេះហើយទើបអ្នកនយោបាយនៅតែប្រើរបៀបធ្វើនយោបាយប្រជាភិថុតិ ដើម្បីអូសទាញពលរដ្ឋម្ចាស់ឆ្នោត ឲ្យធ្លាក់ចូលទៅក្នុងអន្ទាក់នយោបាយដឹកនាំរបស់ពួកគេ។
ខណៈដែលការបោះឆ្នោតកាន់តែខិតជិតចូលមកដល់ គេរំពឹងថា នឹងបានឮការឃោសនានយោបាយប្រជាភិថុតិកាន់តែច្រើនឡើង។ ប៉ុន្តែរបៀបឃោសនាដូច្នេះ ទំនងជាលែងសូវមានឥទ្ធិពលទៅលើពលរដ្ឋខ្មែរម្ចាស់ឆ្នោតទៀតហើយ។ លែងសូវមានឥទ្ធិពល ព្រោះខុសពីការស្មានរបស់អ្នកនយោបាយ ប្រជាពលរដ្ឋម្ចាស់ឆ្នោតមានការយល់ដឹងកាន់តែច្រើនឡើង និងចេះបែងចែកបានយ៉ាងច្បាស់រវាងសារនយោបាយឃោសនាបែបប្រជាភិថុត និងសារនយោបាយពិតប្រាកដ។
នោះក៏ព្រោះតែពលរដ្ឋខ្មែរ បានងាកមកចាប់អារម្មណ៍ និងតាមដានស្ថានការណ៍នយោបាយកាន់តែច្រើនឡើង តាមរយៈប្រព័ន្ធផ្សព្វផ្សាយព័ត៌មានដែលមានលក្ខណៈកាន់តែចម្រុះឡើងក្ដី ឬតាមរយៈបណ្ដាញសង្គមដ៏លឿនរហ័សនិងសម្បូរបែបក្ដី។ និន្នាការនេះ កើតឡើងតាំងពីពេលបោះឆ្នោតជាតិឆ្នាំ២០១៣មកម្ល៉េះ ហើយទំនងជាបន្តទៅមុខទៀតនាពេលខាងមុខ។
ដូច្នេះចង់ឬមិនចង់ អ្នកនយោបាយខ្មែរ គួរតែពិចារណាឡើងវិញ អំពីសារនយោបាយបែបប្រជាភិថុតិរបស់ខ្លួន ទាំងការឃោសនាបំផ្លើសបំភ្លៃដើម្បីការគាំទ្រពីពលរដ្ឋក៏ដោយ និងទាំងការឃោសនាគម្រាមបំភ័យលើគូបដិបក្ខក៏ដោយ។ ការឃោសនាបែបប្រជាភិថុតិ នៅក្នុងសង្គមមួយដែលការយល់ដឹងរបស់ពលរដ្ឋរីកចម្រើនរួចទៅហើយ មិនត្រឹមតែមិនអាចទាក់ទាញការគាំទ្រពីម្ចាស់ឆ្នោតបានទេ វាថែមទាំងធ្វើឲ្យអ្នកនយោបាយខ្លួនឯងបាត់បង់តម្លៃទៀតផង។ អាក្រក់ជាងនេះ ពលរដ្ឋអាចនឹងអស់ជំនឿ ព្រមទាំងស្អប់ខ្ពើមអ្នកនយោបាយតែម្ដង នៅពេលដែលអ្នកនយោបាយនោះមិនអាចបំពេញតាមការឃោសនាប្រជាភិថុតិរបស់ខ្លួនបាន។
ទន្ទឹមគ្នានេះ ការប្រើពាក្យពេចន៍វាយប្រហារ បន្តុះបង្អាប់ ជេរប្រមាថគ្នាដោយភ្លេចគិតពីក្រមសីលធម៌របស់អ្នកនយោបាយ ក៏ជាបញ្ហាគួរឲ្យយកចិត្តទុកដាក់កាត់បន្ថយផងដែរ។ អ្នកនយោបាយខ្មែរ គួរតែបង្ហាញឥរិយាបថនិងបទពិសោធចាស់ទុំក្នុងការធ្វើនយោបាយ តាមរយៈការប្រកួតប្រជែងដោយស្មើភាព យុត្តិធម៌ និងមានសីលធម៌។ អ្នកនយោបាយខ្មែរ គួរតែប្រកួតប្រជែងគ្នាដោយយកគោលនយោបាយជាមូលដ្ឋាន ដើម្បីទាក់ទាងការគាំទ្រពីម្ចាស់ឆ្នោត ជាជាងសមត្ថភាពធ្វើប្រជាភិថុតិ ពិសេសក្នុងបរិបទមួយដែលពលរដ្ឋបានយល់ដឹងពីល្បិចកលទាំងនោះរួចអស់ទៅហើយ។
ដោយឡែក សម្រាប់ពលរដ្ឋម្ចាស់ឆ្នោតវិញ។ ការយល់ដឹងរបស់ពលរដ្ឋ ចេះបែងចែកច្បាស់លាស់រវាងការឃោសនាបែបប្រជាភិថុតិនិងសារនយោបាយប្រកបដោយអត្ថន័យពិតប្រាកដគឺជាសញ្ញាវិជ្ជមានមួយ សម្រាប់របបនយោបាយប្រជាធិបតេយ្យសេរីពហុបក្សដ៏ក្មេងខ្ចីនៅកម្ពុជា។ នៅក្នុងរបបប្រជាធិបតេយ្យ ការយល់ដឹងរបស់ពលរដ្ឋនៅក្នុងវិស័យនយោបាយ មានសារៈសំខាន់ណាស់ក្នុងការជ្រើសរើសមេដឹកនាំដ៏ត្រឹមត្រូវ ដើម្បីកាច់ចង្កូតប្រទេស។ ប៉ុន្តែការយល់ដឹងតែម្យ៉ាងមិនទាន់គ្រប់គ្រាន់ទេ។ ពលរដ្ឋម្ចាស់ឆ្នោត ត្រូវចូលរួមបោះឆ្នោត សង្កេតតាមដាន និងវាយតម្លៃការអនុវត្តរបស់អ្នកនយោបាយផងដែរ ដើម្បីធានាថា ពួកគេពិតជាគោរព បម្រើ និងធ្វើតាមអ្វីដែលបានសន្យាជាមួយម្ចាស់ឆ្នោត ដើម្បីផលប្រយោជន៍ជាតិពិតប្រាកដ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ