គណបក្សប្រឆាំង៖ «ចន្លោះនៃសម្ពាធនយោបាយ និងការប្រជែងជាមួយគណបក្សបង្កើតថ្មី»
ចុះផ្សាយនៅថ្ងៃ៖
ស្តាប់ - ០៤:៣៤
អនុប្រធានត្រូវបានទំលាក់ចេញពីតំណែងជាន់ខ្ពស់នៅក្នុងស្ថាប័នរដ្ឋសភា ប្រធានត្រូវរស់នៅដោយនិរទេសខ្លួននៅក្រៅប្រទេស ចំណែកឯតំណាងរាស្រ្តរបស់ខ្លួនពីររូប ក៏ត្រូវរងការវាយដុំឲ្យរបួសធ្ងន់ធ្ងរទៅទៀត។ ទាំងនេះ គឺជាសម្ពាធនយោបាយដ៏ធ្ងន់មួយសម្រាប់គណបក្សប្រឆាំងនៅពេលនេះ ទន្ទឹមនឹងវត្តមានរបស់គណបក្សតូចៗជាច្រើន ដែលបានបង្កើតឡើង និងត្រៀមបង្កើតឡើងជាបន្តបន្ទាប់មកនេះ។ តើវាសនារបស់គណបក្សប្រឆាំងដែលប្រាថ្នាចង់ឈ្នះការបោះឆ្នោតនៅឆ្នាំ២០១៨ខាងមុខ អាចទៅរួចដែររឺទេ បើសម្ពាធមានគ្រប់ទិសបែបនេះ?
គឺចាប់តាំងពីតុលាការក្រុងភ្នំពេញបានចាប់ខ្លួននិងបានកាត់ទោសសកម្មជនគណបក្សសង្រ្គោះជាតិ១១រូប ឲ្យជាប់ពន្ធនាគារចន្លោះពី៧ទៅ២០ឆ្នាំ កាលពីថ្ងៃទី២១កក្កដា ឆ្នាំ២០១៥មកនោះ ស្ថានភាពនយោបាយនៅកម្ពុជា មិនមានសញ្ញាធូរស្រាលនៅឡើយទេ។ គេនៅចាំថាកាលណោះ គឺនៅមួយថ្ងៃមុនខួបមួយឆ្នាំ នៃកិច្ចព្រមព្រៀងបញ្ចប់ជម្លោះនយោបាយ ថ្ងៃទី២២កក្កដា ឆ្នាំ២០១៤ គឺជាពេលវេលា ដែលស្ថានការណ៍នយោបាយនៅកម្ពុជាតានតឹងរហូតមក។
តានតឹង រហូតដល់ដំណាក់កាលចុងក្រោយនេះ ដែលអនុប្រធានគណបក្សគឺលោក កឹម សុខា ត្រូវបានរដ្ឋសភាបោះឆ្នោតទំលាក់ចេញពីតំណែងអនុប្រធានទី១កាលពីថ្ងៃទី៣០តុលា ការវាយដំអ្នកតំណាងរាស្រ្តបក្សប្រឆាំងឲ្យរងរបួសពីររូបនៅក្នុងបាតុកម្ម មុខរដ្ឋសភាកាលពីថ្ងៃទី២៦តុលា និងចុងក្រោយនេះ គឺករណីរបស់ លោក សម រង្ស៊ី ដែលជាប្រធានគណបក្ស។ លោក សម រង្ស៊ី ដែលត្រូវបង្ខំចិត្តរស់នៅដោយនិរទេសខ្លួនឯងនៅក្រៅប្រទេស ដូចមុនឆ្នាំបោះឆ្នោត២០១៣ គឺដើម្បីគេចចេញពីដីកាតាមចាប់ខ្លួនរបស់តុលាការក្រុងភ្នំពេញ។
មូលហេតុសំអាងហេតុផល នៃការកើនឡើងកំដៅនយោបាយនៅកម្ពុជាពេលនេះ គឺមានទៅ និងមានមក ដូចពាក្យចាស់លោកពោលគឺ «បើទំពក់វាមិនទៅ ភ្នៅក៏វាមិនមក» ឬក៏ថា «បើមិនមានផ្សែង ក៏មិនមានភ្លើង» ដូច្នោះអញ្ចឹងដែរ។ ស្ថានភាពបែបនេះ ទំនងជាមិនបញ្ចប់នៅត្រឹមនេះទេ ហើយរឿងរ៉ាវថ្មីៗ និងប្លែកៗជាច្រើនទៀត នឹងបន្តកើតឡើងជាបន្តបន្ទាប់ទៅលើគណបក្សប្រឆាំង ពីពេលនេះ រហូតដល់ការបោះឆ្នោតក៏ថាបាន។
ប្រឈមមុខនឹងសម្ពាធនយោបាយដែលរកមុខដោះមិនទាន់ឃើញនៅពេលនេះ ហើយគណបក្សប្រឆាំង ក៏ត្រូវប្រឈមមុខ នឹងការប្រកួតប្រជែងជាមួយនឹងគណបក្សថ្មីៗដែលទើបតែចាប់បដិសន្ធិឡើងផងដែរ។ គិតត្រឹមថ្ងៃទី២៥វិច្ឆិកា ឆ្នាំ២០១៥នេះ មានគណបក្សថ្មីដល់ទៅ៥ហើយ ដែលបានបង្កើតឡើង មិនដល់រយៈពេលមួយឆ្នាំស្រួលបួលផង នោះគឺ ទី១៖ គណបក្សប្រជាធិបតេយ្យមូលដ្ឋានរបស់លោក យ៉េង វីរៈ គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ គណបក្សអំណាចខ្មែរ របស់លោក សួន សេរីរដ្ឋា គណបក្សខ្មែរសាមគ្គីរបស់លោកស្រី ឡាក់ សុភាព និងគណបក្ស កម្ពុជាសេរីភាព (CLP) របស់លោក ជា ចំរើន ដែលទើបតែលាលែងពីសមាជិកភាពគណបក្សកាន់អំណាចនៅសប្តាហ៍មុននេះ។
គណបក្សថ្មីៗទាំងអស់នេះ សុទ្ធតែអះអាងថាបង្កើតឡើង គឺដើម្បីចាំត្រងយកក្រុមអ្នកគាំទ្រ គណបក្សប្រឆាំងដែលអន់ចិត្ត តួយ៉ាងដូចជា គណបក្សសំបុកឃ្មុំសង្គមប្រជាធិបតេយ្យរបស់លោក ម៉ម សូណង់ដូ, គណបក្សប្រជាធិបតេយ្យមូលដ្ឋានរបស់លោក យ៉េង វីរៈ ដែលមានប្រភពចេញមកពីក្រុមមេដឹកនាំអង្គការសង្គមស៊ីវិល និងគណបក្សខ្មែរសាមគ្គីរបស់លោកស្រី ឡាក់ សុភាព ដែលចាកចេញពីគណបក្សសង្រ្គោះជាតិជាដើម។
បន្ថែមលើនេះ គណបក្សអំណាចខ្មែររបស់លោក សួន សេរីរដ្ឋា ដែលវិលត្រឡប់មកពីសហរដ្ឋអាមេរិកកាលពីដើមខែតុលា និងគណបក្ស កម្ពុជាសេរីភាព របស់លោក ជា ចំរើន នេះ គឺសុទ្ធសឹងតែជាគូប្រជែងថ្មីរបស់គណបក្សប្រឆាំង បន្ថែមលើគណបក្សតូចៗជាច្រើនទៀតដែលត្រៀមលេចមុខនៅក្នុងការបោះឆ្នោតជាតិខាងមុខ រួមទាំងគណបក្សហ្វ៊ុនស៊ិនប៉ិចរបស់សម្តេចក្រុមព្រះនរោត្តម រណឬទ្ធិ និងគណបក្សសម្ព័ន្ធដើម្បីប្រជាធិបតេយ្យរបស់លោក ខឹម វាសនាទៀតផង។
គណបក្សទាំងនេះ នឹងដាក់ចេញនូវគោលនយោបាយថ្មីៗ ប្លែកៗ ឬប្រហាក់ប្រហែលនឹងគោលនយោបាយរបស់គណបក្សប្រឆាំងដើម្បីធ្វើការប្រកួតប្រជែង។ ព្រោះចង់មិនចង់ វត្តមានរបស់គណបក្សថ្មីៗ និងគណបក្សវ័យចំណាស់ៗទាំងអស់នេះ នឹងទាក់ទាញនូវការគាំទ្រមួយផ្នែកពីក្រុមអ្នកគាំទ្រគណបក្សប្រឆាំង ច្រើនជាង ក្រុមអ្នកគាំទ្រដែលបោះឆ្នោតឲ្យគណបក្សកាន់អំណាច។
ដូច្នេះ តើវាសនារបស់គណបក្សប្រឆាំងធំជាងគេនៅកម្ពុជា ដែលបានឆក់យកបេះដូងរបស់អ្នកគាំទ្រច្រើន នៅក្នុងការបោះឆ្នោតជាតិកាលពីខែកក្កដាឆ្នាំ២០១៣កន្លងទៅនោះ នឹងទៅជាយ៉ាងណា បើសម្ពាធមានទាំងក្នុង និងមានទាំងក្រៅបែបនេះ?
យ៉ាងណាក៏ដោយ ក្រុមអ្នកវិភាគបានមើលឃើញថា អ្វីដែលគណបក្សប្រឆាំងគួរធ្វើនៅពេលនេះ គឺរក្សាភាពស្ងៀមស្ងាត់ ហើយរត់រកតុចរចាតាមរយៈវប្បធម៌សន្ទនា។ ហើយទន្ទឹម គ្នានេះ ថ្នាក់ដឹកនាំគណបក្សប្រឆាំងទាំងពីរ ក៏អាចប្រែក្លាយកាលៈទេសៈដូចបច្ចុប្បន្ននេះ ទៅជាឱកាសនៃការបែងចែកការងារគ្នាធ្វើផងដែរ ពោលគឺ ម្នាក់ត្រូវពង្រឹងការងារនៅក្នុងស្រុក ចំណែកឯម្នាក់ទៀត ត្រូវពង្រឹងការងារនៅក្រៅស្រុក។
គណបក្សប្រឆាំង ដែលកំពុងស្ថិតនៅចន្លោះនៃសម្ពាធនយោបាយ និងការប្រជែងជាមួយគណបក្សថ្មីៗនេះ ក៏កំពុងតែរងសម្ពាធ ពីក្រុមអ្នកគាំទ្ររបស់ខ្លួនផងដែរ។ ក្រុមអ្នកគាំទ្រ មួយចំនួន ដែលកំពុងឲ្យពិន្ទុទៅលើមេដឹកនាំរបស់ខ្លួន ពិសេសលោក សម រង្ស៊ី ដែលមិនហ៊ានវិលចូលស្រុកវិញ កាលពីយប់ថ្ងៃទី១៦វិច្ឆិកាកន្លងទៅ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ